Matiu 28:1-20
28 To Gbọjẹzan lọ godo, dile ai azán tintan* osẹ lọ tọn to hinhọ́n, Malia Magdaleni po Malia diẹ po wá nado pọ́n yọdò lọ.+
2 Podọ pọ́n! aigba sisọsisọ daho de ko jọ, na angẹli Jehovah* tọn ko jẹte sọn olọn bo wá bli zannu lọ sẹ̀, bosọ to aisinsin to e ji.+
3 Awusọhia etọn taidi abì, podọ avọ̀ etọn wé taidi osin-agó.+
4 Mọwẹ, nuṣọ́tọ lọ lẹ sisọ bo taidi oṣiọ, na yé dibuna ẹn wutu.
5 Ṣigba, angẹli lọ dọna yọnnu lọ lẹ dọmọ: “Mì dibu blo, na n’yọnẹn dọ Jesu he yin hùhù do pòtin ji lọ dín wẹ mì te.+
6 E ma tofi, na e ko yin finfọn, kẹdẹdile e ko dọ do.+ Mì wá, mì pọ́n fie e yin titẹ́ do dai.
7 Mì sọ yawu yì bo dọna devi etọn lẹ dọ ewọ ko yin finfọn sọn oṣiọ lẹ mẹ, na mì pọ́n! e ko jẹnukọnna mì jei Galili.+ Finẹ wẹ mìwlẹ na mọ ẹn te. Mì pọ́n! yẹn ko dọna mì.”+
8 Enẹwutu, yé yawu tọ́n sọn yọdò lọ kọ̀n, po obu po gọna ayajẹ daho, bo họ̀nwezun nado yì dọna devi etọn lẹ.+
9 Podọ pọ́n! Jesu pé yé bo dọmọ: “Mì kudo lewhenu!” Yé sẹwá bo tẹdo afọ etọn lẹ go bosọ litaina* ẹn.
10 To whenẹnu, Jesu dọna yé dọmọ: “Mì dibu blo! Mì yì bo dọna mẹmẹsunnu ṣie lẹ, na yé nido yì Galili, podọ finẹ wẹ yé na mọ mi te.”
11 Dile yọnnu lọ lẹ to aliji jei, delẹ to nuhọ́tọ lẹ+ mẹ biọ tòdaho lọ mẹ bo dọ nuhe ko jọ lẹpo na yẹwhenọgán lẹ.
12 Podọ to whenue omẹ ehelẹ ko pli hẹ mẹho lẹ bo dewé dopọ pó godo, yé na fataka-kuẹ susu awhànfuntọ lọ lẹ
13 bo dọmọ: “Mì dọ dọ, ‘Devi etọn lẹ wá to zánmẹ bo fìn in to whenue míwlẹ to amlọndọ.’+
14 Podọ eyin ayimatẹn-gán lọ wá sè ehe, mí na basi zẹẹmẹ whẹho lọ tọn* na ẹn bo na de mì sọn tukla mẹ.”
15 Enẹwutu, yé yí fataka-kuẹ lọ lẹ bo basi kẹdẹdile yè ko dọna yé do, podọ otàn ehe sọ gbayipe to Ju lẹ ṣẹnṣẹn kakajẹ azán ehe gbè.
16 Ṣigba, devi 11 lọ lẹ yì Galili+ to osó he ji Jesu ko do dope na yé do.+
17 To whenue yé mọ ẹn, yé litaina* ẹn, ṣigba mẹdelẹ tindo ayihaawe.
18 Jesu sọ dọnsẹpọ bo dọna yé dọmọ: “Aṣẹ lẹpo ko yin nina mi to olọn mẹ podọ to aigba ji.+
19 Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ,+ bosọ nọ baptizi yé+ to oyín Otọ́ tọn, Visunnu tọn, po gbigbọ wiwe tọn po mẹ,
20 bo nọ plọn yé nado payi nuhe yẹn ko degbe etọn na mì lẹpo go.+ Podọ mì pọ́n! yẹn tin po mì po to azán lẹpo gbè kakajẹ vivọnu titonu* lọ tọn.”+
Nudọnamẹ Odò Tọn
^ Enẹ wẹ, azán he nọ yin yiylọ todin dọ Sẹgbe. Na Ju lẹ, e yin azán tintan osẹ tọn.
^ Kavi “dẹ́ do odò na.”
^ To paa mẹ, “na diọlinlẹn.”
^ Kavi “dẹ́ do odò na.”
