Matiu 2:1-23
2 To whenuena Jesu ko yin jiji to Bẹtlẹhẹm+ Jude tọn to azán Hẹlọdi*+ ahọlu lọ tọn lẹ gbè godo, pọ́n! sunwhlẹvu-pọntọ* lẹ sọn Whèzẹtẹn-waji wá Jelusalẹm,
2 bo dọmọ: “Fie wẹ ewọ he yin jiji taidi ahọlu Ju lẹ tọn lọ te?+ Na mí mọ sunwhlẹvu etọn to whenuena mí tin to Whèzẹtẹn, podọ míwlẹ ko wá nado litaina* ẹn.”
3 To whenue Ahọlu Hẹlọdi sè ehe, e biọ bẹwlu mẹ, gọna mẹhe tin to Jelusalẹm lẹpo.
4 To whenẹnu, e ylọ yẹwhenọgán lẹ gọna wekantọ gbẹtọ lẹ tọn lẹpo pli bo kàn fie Klisti* lọ na yin jiji te sè yé.
5 Yé dọna ẹn dọmọ: “To Bẹtlẹhẹm+ Jude tọn mẹ wẹ, na mọ wẹ e ko yin kinkandai gbọn yẹwhegán lọ gblamẹ do dọ:
6 ‘Podọ hiẹ, Bẹtlẹhẹm he tin to aigba Juda tọn ji E, hiẹ ma yin tòdaho he whè hugan to ayimatẹn-gán Juda tọn lẹ ṣẹnṣẹn to aliho depope mẹ, na hiẹ mẹ wẹ ogán de na tọ́n sọn, he na yin lẹngbọhọtọ na omẹ ṣie lẹ, yèdọ Islaeli.’”+
7 Enẹgodo, Hẹlọdi ylọ sunwhlẹvu-pọntọ lọ lẹ pli to nuglọ bo yí sọwhiwhe do dindona sọn yé dè, ojlẹ he mẹ sunwhlẹvu lọ sọawuhia te.
8 To whenuena e to dido yé hlan Bẹtlẹhẹm, e dọmọ: “Mì yì bo yí sọwhiwhe do dín ovi pẹvi lọ, podọ eyin mì mọ ẹn, mì lẹkọwa dogbè na mi, na yẹnlọsu nido yì nado litaina ẹn.”
9 To whenue yé ko sè nuhe ahọlu lọ dọ godo, yé tọ́nyi, podọ pọ́n! sunwhlẹvu he yé ko mọ to whenuena yé tin to Whèzẹtẹn lọ+ jẹnukọnna yé kaka bo wá nọte to aga to fie ovi pẹvi lọ tin te.
10 To whenue yé mọ sunwhlẹvu lọ, yé jaya tlala.
11 Podọ to whenuena yé biọ owhé lọ gbè, yé mọ ovi pẹvi lọ po Malia onọ̀ etọn po, bọ yé jẹklo bo litaina* ẹn. Yé sọ hùn nuhe mẹ adọkunnu yetọn te lẹ bo na ẹn nunina lẹ—yèdọ sika, nuyọnwan gblingblin po zuya po.
12 Ṣigba, na yé mọ avase yí sọn Jiwheyẹwhe dè to odlọ mẹ+ ma nado lẹkọyi Hẹlọdi dè wutu, yé gbọn aliho devo lẹkọyi otò yetọn mẹ.
13 To whenuena yé ko lẹkọyi godo, pọ́n! angẹli Jehovah* tọn sọawuhia Josẹfu to odlọ mẹ,+ bo dọmọ: “Fọ́n, ze ovi pẹvi lọ po onọ̀ etọn po bo họnyi Egipti bosọ nọ finẹ kakajẹ whenue yẹn na vọ́ dọhona we, na Hẹlọdi ko jlo na jẹ ovi pẹvi lọ dín ji nado hù i.”
14 Enẹwutu, Josẹfu fọ́n bo plan ovi pẹvi lọ po onọ̀ etọn po to zánmẹ bo yì Egipti.
15 E sọ nọ finẹ kakajẹ whenue Hẹlọdi kú. Enẹ hẹn nuhe Jehovah* dọ gbọn yẹwhegán etọn gblamẹ di, dọmọ: “N’ylọ visunnu ṣie jẹgbonu sọn Egipti.”+
16 Enẹgodo, to whenue Hẹlọdi mọdọ sunwhlẹvu-pọntọ lọ lẹ ko blu emi, e biọ adi sinsinyẹn mẹ, podọ e domẹhlan bo hù yọpọ sunnu lẹpo he tin to Bẹtlẹhẹm podọ to agbegbe etọn lẹpo ji, bẹsọn owhe awe mẹvi lẹ ji wá odò, sọgbe hẹ ojlẹ he e ko yí sọwhiwhe do dindona sọn sunwhlẹvu-pọntọ lọ lẹ dè.+
17 Gbọnmọ dali, nuhe yin didọ gbọn yẹwhegán Jelemia gblamẹ yin hinhẹndi, dọmọ:
18 “Ogbè de yin sisè to Lama, yèdọ avi po avihàndido sinsinyẹn po. Laheli+ wẹ to avivi na ovi etọn lẹ, podọ e ma jlo nado yin homẹmiọnna, na yé ma tin ba wutu.”+
19 To whenue Hẹlọdi ko kú, pọ́n! angẹli Jehovah* tọn sọawuhia Josẹfu to odlọ mẹ+ to Egipti
20 bo dọmọ: “Fọ́n, ze ovi pẹvi lọ po onọ̀ etọn po bo yì aigba Islaeli tọn ji, na mẹhe to okú* ovi pẹvi lọ tọn dín lẹ ko kú.”
21 Enẹwutu, e fọ́n bo ze ovi pẹvi lọ po onọ̀ etọn po bosọ yì aigba Islaeli tọn ji.
22 Ṣigba, to whenue e sè dọ Alkẹlausi wẹ to gandu do Jude ji to otẹn Hẹlọdi otọ́ etọn tọn mẹ, e dibu nado yì finẹ. Humọ, na e mọ avase yí sọn Jiwheyẹwhe dè to odlọ mẹ wutu,+ e họnyi aigba Galili tọn ji.+
23 E sọ wá sawhé do tòdaho de mẹ he nọ yin yiylọdọ Nazalẹti,+ na nuhe yin didọ gbọn yẹwhegán lẹ gblamẹ nido sọgan yin hinhẹndi dọmọ: “Ewọ na yin yiylọdọ Nazalẹtinu.”*+
Nudọnamẹ Odò Tọn
^ Kavi “nujlẹtọ.”
^ Kavi “dẹ́ do odò na.”
^ Kavi “Mẹsia; Mẹyiamisisadode.”
^ Kavi “dẹ́ do odò na.”
^ Kavi “alindọn.”
^ Vlavo sọn hogbe Heblugbe tọn lọ “tọ́nkun” mẹ.
