1 Kọlintinu lẹ 2:1-16
2 Enẹwutu, mẹmẹsunnu lẹ emi, to whenue yẹn wá mì dè, yẹn ma wá nado yí ohó vivi+ kavi nuyọnẹn jijlá do lá aṣli wiwe+ Jiwheyẹwhe tọn na mì gba.
2 Na yẹn basi nudide nado yin mẹhe ma yọ́n nudepope to ṣẹnṣẹn mìtọn adavo Jesu Klisti, yèdọ mẹhe yin hùhù do pòtin ji.+
3 Yẹn sọ wá mì dè to madogán mẹ, to obu mẹ podọ po sisọsisọ daho po;
4 yẹn masọ yí hogbe linlẹndiọnamẹ nuyọnẹn tọn lẹ zan to hodidọ ṣie po yẹwhehodidọ ṣie po mẹ gba adavo to dohia gbigbọ po huhlọn po tọn mẹ,+
5 na yise mìtọn ma nado sinai do nuyọnẹn gbẹtọ tọn ji, ṣigba do huhlọn Jiwheyẹwhe tọn ji.
6 Todin, mí nọ dọho nuyọnẹn tọn to mẹhe whèwhín lẹ ṣẹnṣẹn,+ ṣigba e ma yin nuyọnẹn titonu* ehe tọn kavi dehe yin ogán titonu ehe tọn lẹ tọn gba, yèdọ mẹhe na yin hinhẹn zun ovọ́ lẹ.+
7 Ṣigba, mí nọ dọho nuyọnẹn Jiwheyẹwhe tọn to aṣli wiwe de mẹ,+ yèdọ nuyọnẹn whiwhla lọ, he Jiwheyẹwhe ko dehia jẹnukọn, whẹpo titonu lẹ do tin, na gigo mítọn.
8 Nuyọnẹn ehe wẹ depope to ogán titonu* ehe tọn lẹ mẹ ma yọnẹn,+ na eyin yé ko yọ́n ẹn wẹ, yé ma na ko hù Oklunọ gigonọ lọ.*
9 Ṣigba, kẹdẹdile e yin kinkandai do dọmọ: “Nukun ma ko mọ podọ otó ma ko sè, mọjanwẹ ahun gbẹtọ tọn ma ko lẹn nuhe Jiwheyẹwhe ko wleawu etọn dai na mẹhe yiwanna ẹn lẹ.”+
10 Na míwlẹ wẹ Jiwheyẹwhe ko yí gbigbọ etọn+ do de yé hia,+ na gbigbọ lọ nọ dindona nulẹpo, etlẹ yin onú sisosiso Jiwheyẹwhe tọn lẹ.+
11 Na mẹnu to gbẹtọ lẹ mẹ wẹ yọ́n onú gbẹtọ tọn lẹ adavo gbigbọ gbẹtọ tọn he to ohò etọn mẹ? Mọdopolọ ga, mẹde ma ko yọ́n onú Jiwheyẹwhe tọn lẹ, adavo gbigbọ Jiwheyẹwhe tọn.
12 Todin, e ma yin gbigbọ aihọn tọn wẹ mí mọyi gba, ṣigba gbigbọ he wá sọn Jiwheyẹwhe dè,+ na mí nido sọgan yọ́n nuhe Jiwheyẹwhe ko gbọn homẹdagbe dali na mí lẹ.
13 Onú ehelẹ wẹ mí to ohó etọn dọ ga, e ma yin po ohó he nuyọnẹn gbẹtọvi tọn plọnmẹ lẹ po gba,+ ṣigba po dehe gbigbọ lọ plọnmẹ lẹ po,+ dile mí yí ohó gbigbọ tọn lẹ do to zẹẹmẹ onú gbigbọ tọn lẹ tọn basi.*
14 Ṣigba, gbẹtọ agbasanọ ma nọ kẹalọyi nuhe yin gbigbọ Jiwheyẹwhe tọn tọn lẹ, na nulunu wẹ yé yin na ẹn; podọ ewọ ma sọgan yọ́n yé, na gbigbọ-liho wẹ yé nọ yin dogbapọnna te wutu.
15 Ṣigba, gbẹtọ gbigbọnọ nọ gbadopọnna nulẹpo,+ ṣigba ewọ lọsu wẹ mẹdepope ma nọ gbadopọnna.
16 Na “mẹnu wẹ ko yọ́n ayiha Jehovah* tọn, na e nido sọgan plọnnu in?”+ Ṣigba, míwlẹ tindo ayiha Klisti tọn.+
Nudọnamẹ Odò Tọn
^ Kavi “hù Oklunọ gigonọ lọ do pòtin ji.”
^ Kavi “mí to onú gbigbọ tọn lẹ kọndopọ hẹ ohó gbigbọ tọn lẹ.”
