1 Kọlintinu lẹ 1:1-31
1 Paulu, he yin yiylọ nado yin apọsteli+ Klisti Jesu tọn de gbọn ojlo Jiwheyẹwhe tọn dali, podọ Sọstene mẹmẹsunnu mítọn,
2 to wekanhlan agun Jiwheyẹwhe tọn he to Kọlinti,+ hlan mìwlẹ mẹhe ko yin hinhẹn zun wiwe to kọndopọ mẹ hẹ Klisti Jesu,+ bo yin yiylọ nado yin omẹ wiwe lẹ, to pọmẹ hẹ mẹlẹpo he to oyín Oklunọ mítọn Jesu Klisti,+ Oklunọ yetọn po míwlẹ tọn po ylọ to filẹpo:
3 Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn po Oklunọ Jesu Klisti po dè.
4 Yẹn nọ dopẹna Jiwheyẹwhe ṣie to whepoponu do ota mìtọn mẹ, na nukundagbe majẹhẹ Jiwheyẹwhe tọn he yin nina mì to Klisti Jesu mẹ wutu;
5 na to nulẹpo mẹ, mì ko yin hinhẹn zun adọkunnọ to ewọ mẹ, to nugopipe gigọ́ nado dọho mẹ podọ to oyọnẹn gigọ́ mẹ,+
6 kẹdẹdile kunnudide gando Klisti go+ ko yin hinhẹn lodo to ṣẹnṣẹn mìtọn do,
7 sọmọ bọ mìwlẹ ma do gbọagba nunina depope tọn, dile mì yí jejejininọ do to tenọpọn osọhia Oklunọ mítọn Jesu Klisti tọn.+
8 Ewọ nasọ hẹn mì lodo kakajẹ opodo, na mì nikaa hùn dotẹnmẹ dote na whẹsadokọnamẹ depope to azán Oklunọ mítọn Jesu Klisti tọn gbè.+
9 Nugbonọ wẹ Jiwheyẹwhe,+ mẹhe gblamẹ mìwlẹ yin yiylọ nado tindo haṣinṣan* hẹ Visunnu etọn Jesu Klisti Oklunọ mítọn te.
10 Todin, mẹmẹsunnu lẹ emi, yẹn vẹ̀ mì gbọn oyín Oklunọ mítọn Jesu Klisti tọn gblamẹ dọ mìmẹpo ni nọ dọ nudopolọ, podọ kinklan depope ni ma tin to ṣẹnṣẹn mìtọn blo,+ ṣigba dọ mì ni tin to kọndopọ mẹ mlẹnmlẹn to ayiha dopolọ mẹ podọ to aliho nulẹnpọn tọn dopolọ mẹ.+
11 Mẹmẹsunnu lẹ emi, mẹdelẹ sọn whédo Kloe tọn mẹ ko hẹn zun yinyọnẹn na mi gando mì go dọ gbemanọpọ lẹ tin to ṣẹnṣẹn mìtọn.
12 Nuhe dọ yẹn te wẹ yindọ dopodopo mìtọn to didọ dọmọ: “Paulu tọn wẹ yẹn,” “Ṣigba, Apolo tọn wẹ yẹn,”+ “Ṣigba, Kefa* tọn wẹ yẹn,” “Ṣigba, Klisti tọn wẹ yẹn.”
13 Be Klisti yin mimá wẹ? Paulu ma yin hùhù do pòtin ji do ota mìtọn mẹ, kavi e yinmọ wẹ? Kavi mì yin bibaptizi to oyín Paulu tọn mẹ wẹ?
14 Yẹn dopẹna Jiwheyẹwhe dọ yẹn ma baptizi mẹdepope to mì mẹ adavo Klispu+ po Gaiu+ po,
15 na mẹdepope nikaa dọ dọ mì yin bibaptizi to oyín ṣie mẹ.
16 Mọwẹ, yẹn sọ baptizi whédo Stefana tọn ga.+ Na mẹhe pò lẹ tọn, yẹn ma yọnẹn eyin yẹn baptizi mẹdevo depope.
17 Na Klisti do mi hlan, e ma yin nado yì baptizi, ṣigba nado lá wẹndagbe lọ;+ podọ e ma yin po hogbe nuyọnẹn tọn po gba, na yatin* Klisti tọn ma nado yin hinhẹn zun ovọ́.
18 Na nulunu wẹ hodidọ gando yatin* lọ go yin na mẹhe to dindọn lẹ,+ ṣigba huhlọn Jiwheyẹwhe tọn wẹ e yin na míwlẹ he to yinyin whinwhlẹngán.+
19 Na e ko yin kinkandai dọmọ: “Yẹn na hẹn nuyọnẹn nuyọnẹntọ lẹ tọn gble, bọ zinzin weyọnẹntọ lẹ tọn wẹ yẹn na gbẹdai.”*+
20 Fie wẹ nuyọnẹntọ lọ te? Fie wẹ wekantọ* lọ te? Fie wẹ nudọntọ titonu* ehe tọn lọ te? Be Jiwheyẹwhe ma ko hẹn nuyọnẹn aihọn tọn zun nulú ya?
21 Na to whenuena e yindọ, to nuyọnẹn Jiwheyẹwhe tọn mẹ, aihọn lọ ma ko gbọn nuyọnẹn etọn titi dali+ yọ́n Jiwheyẹwhe,+ homẹhun Jiwheyẹwhe nado whlẹn mẹhe to yiyise lẹ gán gbọn nulunu+ he yin yẹwheho etọn dọ lọ dali.
22 Na Ju lẹ to ohia lẹ biọ+ podọ Glẹkinu lẹ to nuyọnẹn dín;
23 ṣigba míwlẹ to yẹwheho Klisti he yin hùhù do pòtin ji tọn dọ, ehe yin ahlidanu de na Ju lẹ, ṣigba nulunu na akọta lẹ.+
24 Etomọṣo, na mẹhe yin yiylọ lẹ, yèdọ Ju lẹ po Glẹkinu lẹ po, Klisti yin huhlọn Jiwheyẹwhe tọn podọ nuyọnẹn Jiwheyẹwhe tọn.+
25 Na nuhe nọ yin pinpọnhlan di nulunu Jiwheyẹwhe tọn yọnnuin hú gbẹtọ lẹ, podọ nuhe nọ yin pinpọnhlan di madogánnọ Jiwheyẹwhe tọn dohuhlọn hú gbẹtọ lẹ.+
26 Mẹmẹsunnu lẹ emi, na mìwlẹ mọdọ to whẹho mìtọn mẹ, susu mẹhe yin yiylọ lẹ tọn ma yin nuyọnẹntọ to agbasa-liho,*+ susu yetọn ma yin huhlọnnọ, podọ susu yetọn ma tọ́n sọn whẹndo he diyin lẹ mẹ,+
27 ṣigba Jiwheyẹwhe de nuhe aihọn nọ pọnhlan di nulunu lẹ, nado dowinyan nuyọnẹntọ lẹ; podọ Jiwheyẹwhe de nuhe aihọn nọ pọnhlan di madogánnọ lẹ, nado dowinyan nuhe yin huhlọnnọ lẹ;+
28 Jiwheyẹwhe sọ de nuhe aihọn nọ pọnhlan di nuhe ma yin nujọnu lẹ podọ nuhe nọ yin nukunpẹvi yí do pọ́n lẹ, nuhe ma tin lẹ, nado hẹn nuhe tin lẹ zun ovọ́,+
29 na mẹdepope* nikaa doawagun to Jiwheyẹwhe nukọn.
30 Ṣigba, na ewọ tọn wutu wẹ mìwlẹ do tin to kọndopọ mẹ hẹ Klisti Jesu, mẹhe ko lẹzun nuyọnẹn sọn Jiwheyẹwhe dè na mí, podọ dodowiwa,+ hinhẹn zun wiwe+ po tundote gbọn ofligọ dali po,+
31 na e nido sọgan yin kẹdẹdile e ko yin kinkandai do dọmọ: “Mẹhe to awagundo, gbọ e ni doawagun to Jehovah* mẹ.”+
Nudọnamẹ Odò Tọn
^ Kavi “mimá.”
^ Sọ nọ yin yiylọdọ Pita.
^ Kavi “na sisẹ́ do apadopo.”
^ Enẹ wẹ, Osẹ́n yọnẹntọ akonka.
^ Kavi “sọgbe hẹ nujinọtedo gbẹtọvi tọn.”
^ To paa mẹ, “agbasalan depope.”
