Salmos 119:1-176
-
Ojeguerohory Ñandejára ñeʼẽ porãite.
-
¿Mbaʼéichapa umi imitãva ikatu ojapo iporãva? (9).
-
“Che ningo ahayhu umi ne mandamiénto” (24).
-
“Mbaʼeichaite piko ahayhu nde léi” (97).
-
“Antende hetave mbaʼe entéro umi che mboʼeharakuéragui” (99).
-
“Ne ñeʼẽ ningo peteĩ lámpara chegiáva” (105).
-
Nde eréva siertogua memete (160).
-
Umi ohayhúva Ñandejára léi oiko pyʼaguapýpe (165).
-
א [Álef]
119 Ovyʼa umi ndojapóiva mbaʼeve ivaíva,*
umi oikóva Jehová léi heʼiháicha.+
2 Ovyʼa umi ojapóva Ñandejára heʼíva,*+
umi oñehaʼãva ipyʼaite guive oservi porã chupe.*+
3 Haʼekuéra ndoikói ojapo mbaʼeveichagua inhustísia,oiko guei Ñandejára rapére.+
4 Ñandejára, nde remanda oréverojapo hag̃ua nde eréva guive.+
5 Che ningo aikose nde reipotahaichaite,*+
siémpre ajapo hag̃ua nde remandáva.
6 Upéicha ndapytamoʼãi atĩ+
astudia vove umi ne mandamiénto.
7 Che aaprende vove nde léi,ndarekomoʼãi mbaʼeve ivaíva che korasõme ha ikatúta romombaʼeguasu nde reipotaháicha.
8 Ñandejára, che ajapóta la nde remandáva,anína núnka chereja cheaño.
ב [Behth]
9 ¿Mbaʼéichapa umi mitãrusu ha mitãkuña ikatu siémpre ojapo iporãva?
Oñatende porã vaʼerã hikuái oiko hag̃ua ne ñeʼẽ heʼiháicha.+
10 Ñandejára, che roservise che pyʼaite guive,chepytyvõna ani hag̃ua amboyke umi ne mandamiénto.+
11 Che areko ne ñeʼẽ che korasõme peteĩ tesóroicha,+ani hag̃ua apeka ne kóntrape.+
12 Ñandejára, chemboʼemína umi ne mandamiénto.
Jehová, nde remerese enterove nemombaʼeguasu.
13 Che amombeʼu umi léinde remeʼẽ vaʼekue chéve.
14 Che avyʼaiterei nde chemomanduʼa haguére umi nde léi* rehe,+umíva ovaleve chéve g̃uarã pláta ha órogui jepe.+
15 Ajepyʼamongetáta* umi instruksión nde remeʼẽvare,+ha siémpre añatende porãta ani hag̃ua ajei nde rapégui.+
16 Che ahayhu umi nde léi,ha núnka ndacheresaraimoʼãi umi mbaʼe nde erévagui.+
ג [Guímel]
17 Ñandejára, che ningo nde siérvo, nembaʼeporãna chendiveikatu hag̃uáicha aikove ha ajapo nde eréva.+
18 Cheresapeʼána ahechakuaa hag̃uambaʼeichaitépa iporã umi mbaʼe oĩva nde léipe.
19 Che ningo ajogua peteĩ extranhéro oikóvape tetã ahénope,+anína remokañy chehegui umi ne mandamiénto.
20 Che* aikuaaseterei nde leikuéra,upévante voi areko che akãme tódo el tiémpo.
21 Nde rekondena umi oñemombaʼeguasúvape,oñemaldesíma chupekuéra pórke nokumplíri umi ne mandamiénto.+
22 Ñandejára, haʼekuéra chedespresia ha oñembohory cherehe.
Anive repermiti ojapo cherehe upéicha, che ningo akumpli umi mbaʼe nde eréva.*
23 Umi orekóva autorida jepe, oñembyaty oñeʼẽ hag̃ua che kóntrape,péro che asegínte ajepyʼamongeta* umi mbaʼe nde remandávare.
24 Che ningo ahayhu umi ne mandamiénto,*+
umíva haʼete peteĩ konsehéro chéve g̃uarã.+
ד [Dáleth]
25 Ñandejára, che* ningo añenóma kuri pe yvýpe,+epermitína chéve asegi aikove nde repromete haguéicha.+
26 Che amombeʼupaite ndéve la ajapóva, ha nde chegia tape porãre.
Chemboʼemína umi nde léi.+
27 Chepytyvõna antende hag̃ua umi instruksión nde remeʼẽva.
Péicha ajepyʼamongetáta* umi mbaʼe porãita rejapóvare.+
28 Che* ndarekói konsuélo, upévare ni ndakevéi.
Ñandejára, chemombaretemína repromete haguéicha.
29 Emomombyry chehegui pe tape ivaíva,+cheguerohorýna por favór ha chemboʼe nde léi.
30 Che adesidíma asegitaha ajapo iporãva,+pórke aikuaa porã nde redesidíva siémpre oĩ porãha.
31 Che amombaʼeterei nde léi,* añakarama hatã voi hese.+
Jehová, anína repermiti añemotĩ.+
32 Kyreʼỹme akumplíta* ne mandamiénto,pórke nde chepytyvõ antende porãve hag̃ua umíva.*
ה [He]
33 Jehová, chemboʼemína+ aguata hag̃ua nde rapére,ikatu hag̃uáicha ajapo nde remandáva aikove aja pukukue.+
34 Chepytyvõna cheentendído hag̃ua,ikatu hag̃uáicha akumpli nde léi.
Péicha asegíta umíva che pyʼaite guive.
35 Ñandejára, che ningo amombaʼeterei umi ne mandamiénto,chegiána aiko hag̃ua nde remandaháicha.+
36 Chepytyvõna ahayhu hag̃ua che pyʼaite guive umi nde léi,*
ha ani hag̃ua apensa chejehénte ha aipota potave heta mbaʼe.+
37 Chepytyvõ anive hag̃ua amaña umi mbaʼe vaíre, ndovaléiva mbaʼeverã.+
Chegia aguata hag̃ua nde rapére ikatu hag̃uáicha aikove.
38 Ekumplína pe promésa rejapo vaʼekue nde siérvope,péicha ojekyhyjéta ndehegui.*
39 Che ningo akyhyje che enemigokuéra oñembohorypárõ g̃uarã cherehe, anína reheja upéva oiko.
Che aikuaa nde siémpre rehusga porãha.+
40 Emañamína mbaʼeichaitépa che amombaʼe umi ne instruksión.
Nde ningo ndehústo, upévare ajerure ndéve ani hag̃ua reheja amano.
ו [Waw]
41 Jehová, ehechaukána cherayhuetereiha.*+
Chesalvána repromete* haguéicha.+
42 Péicha ikatúta añedefende oĩramo oñembohorýva cherehe.
Che ningo ajerovia nde erévare.
43 Umi mbaʼe nde eréva ningo siertogua memete, chepytyvõna siémpre añeʼẽ hag̃ua umívare.
Che ajerovia* nde rehusga porãha.
44 Che siémpre ajapóta nde léi heʼíva,asegíta akumpli opa árare.+
45 Che akumplise nde remandáva,upévare trankílo porã aikóta akorre peteĩ lugár isegúro porãvape.*+
46 Che aiméramo jepe umi rréi renondépe añeʼẽta nde léi* rehe,ni mbaʼevéicharõ natĩmoʼãi.+
47 Che amombaʼeterei umi ne mandamiénto,ahayhu voi umíva.+
48 Ñandejára, ahupíta che po ha añemboʼéta ndéve, péicha ahechaukáta mbaʼeichaitépa ahayhu umi ne mandamiénto.+
Che ajepyʼamongetáta* umi mbaʼe nde remandávare.+
ז [Záyin]
49 Nemanduʼána pe promésa* rejapo vaʼekuére nde siérvope,upéva omeʼẽ chéve esperánsa.
50 Ha avei chekonsola ahasa asy jave.+
Ne ñeʼẽ ningo chepytyvõ aikove hag̃ua.
51 Umi oñemombaʼeguasúva oñembohorypa cherehe.
Péro che ndajeíri nde rapégui, akumpli nde léi.+
52 Jehová, chemanduʼa mbaʼéichapa ymaite guive reporohusga porã,+ha upéva tuicha chekonsola.+
53 Umi iñañáva chembopochyeterei,pórke haʼekuéra omboyke nde léi.+
54 Aime aimehápe,*
che purahéipe chemanduʼa umi mbaʼe remandávare.
55 Pyharekue chemanduʼa nde rérare Jehová,+upéva chepytyvõ akumpli hag̃ua nde léi.
56 Péicha ajepokuaa ajapo,pórke che siémpre akumpli ne instruksión.
ח [Jehth]
57 Jehová, nde hína che erénsia,+che aprometéma ajapotaha la nde eréva.+
58 Cheguerohorymína+ repromete haguéicha chéve,ajerure asy ndéve* che pyʼaite guive.+
59 Che ajepyʼamongeta aiko lájare,ha akambia ajapo jey hag̃ua umi mbaʼe nde remandáva.*+
60 Che ajapura ha ndaikói aperde rei tiémpoakumpli hag̃ua umi ne mandamiénto.+
61 Umi iñañáva omoĩ peteĩ trámpa chéve g̃uarã,péro che siémpre chemanduʼa nde léire.+
62 Ñandejára, pyharepyte apuʼã aagradese hag̃ua ndéve+
rehusga porã haguére siémpre.
63 Umi nderrespetáva ha siémpre osegíva ne instruksión,umíva hína che amígo.+
64 Jehová, opárupi ko yvy ape ári ojekuaa mbaʼéichapa reporohayhu ha nderefallái avavéndi.+
Chemboʼemína umi nde léi.
ט [Tehth]
65 Jehová, nde retrata porã nde siérvope,péicha rekumpli pe repromete vaʼekue.
66 Ñandejára, chemboʼéna cheentendído hag̃ua ha aikuaa hag̃ua heta mbaʼe.+
Che ajerovia ne mandamientokuérare.
67 Tuichaiterei ajavy kuri ha apeka, upévare heta asufri,péro koʼág̃a che ajapo la nde remandáva.+
68 Ñandejára, nde ningo nevuéno ha opa mbaʼe rejapóva iporã.+
Chemboʼemína ne mandamientokuéra.+
69 Umi oñemombaʼeguasúva ijapu ha hetaiterei mbaʼe heʼi che kóntrape.
Che katu che pyʼaite guive asegi ne instruksión.
70 Umi oñemombaʼeguasúva ipyʼahatã,*+
péro che ahayhueterei nde léi.+
71 Iporã voi raʼe la asufri,+péicha aaprende porãve nde léi.
72 Pe léi nde remeʼẽva ideprovechoiterei chéve,+ovaleve heta óro ha plátagui.+
י [Yohdh]
73 Ñandejára, nde ningo nde pópe cheprepara ha chekrea vaʼekue,chepytyvõna antende hag̃ua ne mandamientokuéra.
Péicha ikatúta aaprende la nde reipotáva.+
74 Ñandejára, umi nderrespetáva ovyʼa cherechávo,pórke ohechakuaa che arekoha esperánsa ne promésare.*+
75 Jehová, che aikuaa porã nde siémpre rehusga porãha,+nde rehechauka ndefielha chekorrehívo.+
76 Ñandejára, nde reporohayhu ha núnka nderefalláiva avavéndi,*+
upévare chekonsolamína por favór, nde ningo repromete chéve upéva.
77 Che ningo ahayhueterei nde léi,+cheporiahuverekóna asegi hag̃ua aikove.+
78 Aipota oñemotĩ umi oñemombaʼeguasúva,pórke reiete iñaña chendive hikuái.*
Che ajepyʼamongetáta* ne instruksión rehe.+
79 Aipota umi nderrespetáva ou jey che ykére,umi persóna oikuaáva umi mbaʼe nde remandáva.*
80 Che korasõite guive akumplise nde léi,+ni peteĩva voi namboykeséi, péicha núnka nañemotĩmoʼãi.+
כ [Kaf]
81 Hiʼãitereíma* og̃uahẽ pe tiémpo nde chesalva hag̃ua.+
Che areko esperánsa ne promésare.*
82 Cheresa kaneʼõmba ahaʼarõ aja rekumpli ne promésa.+
Ha añeporandu: “¿Arakaʼe piko la chekonsoláta?”.+
83 Ajogua peteĩ mbaʼyru* ojehejántemava tatatĩme ha isekopáva.
Péro ndacheresaráiri umi mbaʼe nde remandávagui.+
84 Ñandejára, che ningo nde siérvo, ¿mboy tiémpo piko ahaʼarõ vaʼerã gueteri?
¿Arakaʼe piko rehusgáta umi chepersegívape?+
85 Umi oñemombaʼeguasúva ojoʼo peteĩ póso chereity hag̃ua,haʼekuéra ndoikói nde léi heʼiháicha.
86 Che ndajapói mbaʼeve ivaíva, péro haʼekuéra chepersegi, chepytyvõmína.+
Aikuaa ikatuha ñakonfia entéro umi ne mandamiéntore.
87 Umi oñemombaʼeguasúva haimetéma chejuka,péro che namboykéi umi mbaʼe remandáva.
88 Ñandejára, nde ningo reporohayhu ha núnka nderefallái avavéndi.*
Upévare cheprotehéna, péicha aikovéta ha ajapóta la nde eréva.*
ל [Lámedh]
89 Jehová, ne ñeʼẽ opytátaopa ára g̃uarã pe yvágaicha.+
90 Nde núnka nderefallái avavéndi, ha resegíta péicha entéro umi henerasión oúvandi.+
Nde remoĩ hendápe porã ko yvy, ha upépe osegíta opyta.+
91 Nde redesidi mbaʼéichapa ombaʼapóta umi ne kreasión,umíva iñeʼẽrendu ndéve peteĩ esklávo iñeʼẽrenduháicha, ha péicha osegi ombaʼapo porã koʼág̃a peve.
92 Ndahayhúirire nde léi,che amano vaʼerãmoʼã añeñandu vaietérõ guare.+
93 Núnka ndacheresaraimoʼãi nde léigui,pórke ne instruksión chepytyvõ ani hag̃ua amano.+
94 Ñandejára, che ningo nembaʼe, chesalvána por favór.+
Che añehaʼã ajapo nde eréva.+
95 Umi hénte aña opeska cherehe chejuka hag̃ua,péro che añatende porã ajapo hag̃ua la nde eréva.*
96 Che ahecháma heta mbaʼe iporãitereíva,péro ne mandamientokuéra iporãiteve umívagui.
מ [Mem]
97 Mbaʼeichaite piko ahayhu nde léi.+
Ajepyʼamongeta* hese tódo el día.+
98 Nde léi siémpre chegia tape porãre,upévare chearanduve che enemigokuéragui.+
99 Che ajepyʼamongeta* umi mbaʼe erévare,*
upévare antende hetave mbaʼe entéro che mboʼeharakuéragui.+
100 Aiko lájare ojehecha aikuaaha hetave mbaʼe umi ijedávagui,che asegi rupi ne instruksión.
101 Che ajapose rupi nde léi heʼíva,ni mbaʼevéicharõ ndahái tape vaíre.+
102 Che núnka namboykéi nde léi heʼívande cherekomboʼe porã rupi.
103 Ne ñeʼẽ ningo heʼẽ asy che jurúpe,pe eiretégui jepe heʼẽve.+
104 Ne instruksión chegia cheentendído hag̃ua,+upévare che ndachaʼéi umi mbaʼe ivaívare.+
נ [Nun]
105 Ñandejára, ne ñeʼẽ ningo peteĩ lámpara chegiáva aguata porã hag̃ua,ha peteĩ lus ohesapéva che rape.+
106 Che ahuráma ajapotaha nde léi heʼíva,ha akumplíta la aprometéva.
107 Jehová, hetáma ningo ahasa asy,+epermitína chéve asegi aikove nde repromete haguéicha.+
108 Jehová, eguerohorýna pe ofrénda voluntária ajapóva rombotuicha hag̃ua,*+
ha chemboʼe umi nde léi.+
109 Che ningo ajapeligra ha en kualkiér moménto ikatu amano.*
Péro che ndacheresaráiri nde léigui.+
110 Umi iñañáva omoĩ chéve ñuhã,péro che siémpre asegi umi mbaʼe remandáva.+
111 Che núnka ndahejamoʼãi nde léi,*
pórke umíva ombovyʼa che korasõ.+
112 Che adesidíma che pyʼaite guive siémpre ajapotaha umi mbaʼe remandáva.
Cheñeʼẽrendúta aikove aja pukukue.
ס [Sámekj]
113 Che ahayhueterei nde léi Ñandejára,+péro ndachaʼéi umi ndojapóivare ipyʼaite guive nde eréva.*+
114 Ñandejára, nde ningo peteĩ eskúdo cheprotehéva, ha peteĩ lugár isegúro porãva.+
Che areko esperánsa ne promésare.*+
115 Peẽ hénte aña, peñemomombyrýke chehegui,+upéicha che ikatúta akumpli Ñandejára mandamiénto.
116 Ñandejára, chepytyvõna repromete* haguéicha chéve,+péicha asegíta aikove.
Che areko esperánsa nderehe, anína chereja rei.*+
117 Chepytyvõna ajesalva hag̃ua,+péicha siémpre añatende porãta ajapo hag̃ua nde remandáva.+
118 Nde rerrechasa umi nopenáivape nde léire,+pórke haʼekuéra ijapu ha oporombotavy.
119 Umi iñañávape ytýicha* remombo.+
Che ahayhu ha amombaʼe nde léi.*
120 Che aryrýi asusũ pórke akyhyje ndehegui,aikuaa reporohusgataha ha upéva chemongyhyje.
ע [Áyin]
121 Ñandejára, che ningo chehústo ha siémpre ajapo iporãva.
Anína chereja che enemigokuéra pópe.
122 Eprometéna chéve reñangarekotaha cherehe.
Anína repermiti chemaltrata umi oñemombaʼeguasúva.
123 Cheresa kaneʼõmba ahaʼarõ aja nde chesalva+
ha rekumpli ne promésa* ndopytareimoʼãiva.+
124 Ñandejára, chemboʼéna nde leikuéra,+ehechaukána chéve cherayhuetereiha ha siémpre reĩtaha che ykére.*+
125 Che ningo nde siérvo, chepytyvõna cheentendído hag̃ua,+ikatu hag̃uáicha antende nde léi.*
126 Jehová, umi hénte ningo ndojapói nde léi heʼíva,upévare og̃uahẽma pe tiémpo rekastiga hag̃ua chupekuéra.+
127 Upévare che ahayhu ne mandamientokuéra,ahayhuve voi pe órogui, pe óro iporãvévagui* jepe.+
128 Upévare chéve g̃uarã entéro umi ne instruksión iporãiterei,+che ndachaʼéi umi mbaʼe ivaívare.+
פ [Pe]
129 Che* asegi ne mandamientokuéra*
pórke umíva iporãiterei.
130 Nde orepytyvõ rontende hag̃ua umi mbaʼe eréva, ha péicha rehesape ore rape.+
Ne ñeʼẽ ombokatupyry umi ndoikuaáivape heta mbaʼe.+
131 Che ajurupeʼa ha asuspira voi,pórke ahenduseterei umi ne mandamientokuéra.+
132 Ñandejára, eñatendemína cherehe ha cheguerohory,+nde péichama redesidi retratataha umi ohayhúvape nde réra.+
133 Chegiána ne ñeʼẽ rupive aguata hag̃ua tape porãre,ha ani reheja pe ivaíva ipuʼaka cherehe.+
134 Ñandejára, chesalvána umi hénte iñañávagui,ha che asegíta ajapo nde eréva.
135 Che ningo nde siérvo, ehechaukána cheguerohoryha*+
ha chemboʼe nde léi.
136 Ñandejára, che resay ningo ýicha osyry,pórke umi hénte ndojapói nde léi heʼíva.+
צ [Tsadhéh]
137 Jehová, nde ningo ndehústo+
ha siémpre rehusga porã.+
138 Ikatu rojerovia umi mbaʼe nde erévare*
pórke siémpre iporã.
139 Ñandejára, ahechávo che enemigokuéra hesaraiha ne ñeʼẽgui,añandu peteĩ tata okarúva cherehe pórke che rorrespetaiterei.+
140 Che ningo nde siérvo ha ahayhueterei ne ñeʼẽ,+pórke ne ñeʼẽ iporã ha ipotĩ.+
141 Umi hénte chedespresia, che ndahaʼéi mbaʼevete chupekuéra g̃uarã.+
Upéicharõ jepe, che ndacheresaráiri umi ne instruksióngui.
142 Ñandejára, nde hustísia ndopamoʼãi arakaʼeve,+ha nde léi heʼíva siertogua memete.+
143 Umi provléma ningo oupa che ári ha hetáma ahasa asy,upéicharõ jepe, amombaʼeterei umi ne mandamiénto.
144 Ñandejára, umi nde léi* ningo ihústo opa ára g̃uarã,chepytyvõna cheentendído+ hag̃ua, péicha ikatúta asegi aikove.
ק [Qohf]
145 Jehová, che pyʼaite guive ajerure ndéve ajúda, cherendumína por favór.
Che ajapóta la remandáva guive chéve.
146 Ñandejára, ajerure ndéve sokórro, chesalvána por favór.
Ajapóta la nde eréva.*
147 Kuarahy osẽ mboyve che apuʼãma ajerure hag̃ua ndéve ajúda,+pórke che areko esperánsa umi mbaʼe reprometévare.*
148 Pyharepyte katu apáyajepyʼamongeta* hag̃ua nde erévare.+
149 Jehová, cherendumína, nde ningo reporohayhueterei ha nderefallái avavéndi.*+
Nde ndehústo, chepytyvõna asegi hag̃ua aikove.
150 Umi hénte notĩriva hembiapo vai hag̃ua* ou cheataka.
Haʼekuéra omboykete nde léi.
151 Jehová, nde reime che ykére,+opaite mbaʼe oĩva nde léipe siertogua memete.+
152 Ymáma aikuaa hague ne mandamientokuéra,*
umíva nde voi redesidi opytataha opa ára g̃uarã.+
ר [Rehsch]
153 Ñandejára, emañána mbaʼeichaitépa asufri,ejúna chesalva,+ che ningo ndacheresaráiri nde léigui.
154 Edefendéna che káso ha chesalva.+
Epermitína chéve asegi aikove, nde repromete kuri chéve upéva.
155 Umi iñañáva ndojesalvamoʼãi,pórke ndoikuaaséi mbaʼeve ne mandamientokuéragui.+
156 Jehová, nde ningo reiporiahuvereko enterovépe.+
Nde ndehústo, upévare chepytyvõna aikove hag̃ua.
157 Umi che enemígo ha umi chepersegíva hetaiterei,+upéicharamo jepe che asegi ajapo nde remandáva.*
158 Chéve chembojeguaru umi itraisionérova,pórke haʼekuéra ndojapói nde eréva.+
159 Jehová, nde ningo reporohayhueterei ha nderefallái avavéndi,* upévare chepytyvõna asegi hag̃ua aikove.+
Ndéngo rehecha mbaʼeichaitépa che ahayhu nde léi.
160 Opa mbaʼe nde eréva ningo siertogua memete,+ha entéro mbaʼe nde redesidíva oĩ porã ha opytáta pára siémpre.
ש [Sin] térã [Schin]
161 Umi orekóva autorida+ reiete chepersegi,péro che asegi arrespeta che pyʼaite guive umi mbaʼe nde eréva.+
162 Umi mbaʼe nde eréva chembovyʼaiterei,+peteĩ persóna ovyʼaháicha otopárõ peteĩ tesóro iporãitereíva.
163 Che ndaikuaaséi mbaʼeve umi japúgui, ndachaʼeiete umívare.+
Péro ahayhueterei nde léi.+
164 Ñandejára, che ningo 7 vése al día romombaʼeguasu,nde rehusga porãiterei rupi.
165 Ñandejára, umi ohayhúva nde léi oiko pyʼaguapýpe,+ha mbaʼeve nomoñepysangái chupekuéra,* siémpre osegi nde rapére.
166 Jehová, che ningo ajapo ne mandamiénto heʼíva,ha ahaʼarõ nde chesalva, upéva la che esperánsa.
167 Che* ajapo umi mbaʼe nde eréva,*
ha ahayhueterei voi umíva.+
168 Che asegi umi ne instruksión ha ajapo opa mbaʼe nde eréva,*
pórke nde reikuaa porã entéro mbaʼe ajapóva.+
ת [Taw]
169 Jehová, aipotaite rehendu che ajerure jave ndéve ajúda.+
Chepytyvõna cheentendído hag̃ua, repromete haguéicha chéve.+
170 Cherendumína por favór ajerure jave ndéve ajúda,chesalvána repromete* haguéicha.
171 Ñandejára, che tódo el tiémpo romombaʼeguasúta,+pórke nde siémpre chemboʼe nde leikuéra.
172 Ne mandamientokuéra iporãiterei,upévare che purahéipe chemanduʼáta umi mbaʼe erévare.+
173 Ñandejára, chepytyvõna,+che adesidíma ajapotaha umi mbaʼe nde remandáva.+
174 Jehová, aipotaitereíma ningo chesalva,che ahayhueterei nde léi.+
175 Ñandejára, ehejána taikove* ikatu hag̃uáicha rombotuicha,+chepytyvõna nde léi rupive.
176 Che ningo añedesatina peteĩ ovecha okañývaicha,+ ejúna chereka jey.
Che ningo nde siérvo ha ndacheresaráiri ne mandamientokuéragui.+
Nóta
^ Térã: “siémpre iñeʼẽrendúva”.
^ Térã: “rrekordatório”.
^ Hebréope: “oheka chupe”.
^ Hebréope: “Che rape siémpre toĩ hekoitépe”.
^ Térã: “rrekordatório”.
^ Térã: “Astudiáta”.
^ Térã: “Che álma”.
^ Térã: “rrekordatório”.
^ Térã: “astudia”.
^ Térã: “rrekordatório”.
^ Térã: “che álma”.
^ Térã: “astudiáta”.
^ Térã: “Che álma”.
^ Térã: “rrekordatório”.
^ Hebréope: “apersegíta”.
^ Ikatu avei: “chepytyvõ che korasõ ojerovia hag̃ua”.
^ Térã: “rrekordatório”.
^ Ikatu avei: “pe promésa rejapo vaʼekue umi okyhyjévape ndehegui”.
^ Térã: “ere”.
^ Térã: “ahaʼarõ”.
^ Térã: “peteĩ lugár tuicha porãvape”.
^ Térã: “rrekordatório”.
^ Térã: “astudiáta”.
^ Hebréope: “ne ñeʼẽre”.
^ Térã: “Pe óga aikohápe extranhéroicha”.
^ Térã: “che amohuʼũ nde rova (aipota repukavy)”.
^ Térã: “rrekordatório”.
^ Hebréope: “ikorasõ noñandúi mbaʼeve, haʼete ñandy”.
^ Térã: “che ahaʼarõha ne ñeʼẽ”.
^ Térã: “rehechauka mborayhu ifiélva”.
^ Ikatu avei: “ijapu hikuái”.
^ Térã: “astudiáta”.
^ Térã: “rrekordatório”.
^ Térã: “Che álma omano mbotáma”.
^ Térã: “Che ahaʼarõ ne ñeʼẽ”.
^ Térã: “rehechauka mborayhu ifiélva”.
^ Térã: “rrekordatório”.
^ Térã: “rrekordatório”.
^ Térã: “Astudia”.
^ Térã: “astudia”.
^ Térã: “rrekordatório”.
^ Hebréope: “omeʼẽva che juru”.
^ Térã: “Che álma oĩ siémpre che pópe”.
^ Térã: “Nde rrekordatório ningo che erénsia opa ára g̃uarã”.
^ Térã: “umi kuimbaʼe ipyʼamokõivare”.
^ Térã: “Che ahaʼarõ ne ñeʼẽ”.
^ Térã: “ere”.
^ Térã: “ani reheja añemotĩ”.
^ Hebréope ojepuru peteĩ palávra heʼiséva umi mbaʼe kyʼa osẽva oñemboyku jave pláta ha óro.
^ Térã: “rrekordatório”.
^ Térã: “ñeʼẽ”.
^ Térã: “mborayhu ifiélva”.
^ Térã: “rrekordatório”.
^ Térã: “oñerrefinávagui”.
^ Térã: “Che álma”.
^ Térã: “rrekordatório”.
^ Hebréope: “Eheja nde rova tomimbi nde siérvo ári”. Térã: “Epukavy”.
^ Térã: “rrekordatório”.
^ Térã: “rrekordatório”.
^ Térã: “rrekordatório”.
^ Térã: “ahaʼarõ ne ñeʼẽ”.
^ Térã: “astudia”.
^ Térã: “rehechauka mborayhu ifiélva”.
^ Térã: “hekovai ha itieʼỹva”.
^ Térã: “rrekordatório”.
^ Térã: “rrekordatório”.
^ Térã: “rehechauka mborayhu ifiélva”.
^ Térã: “ndaipóri ita omoñepysangáva chupekuéra”.
^ Térã: “Che álma”.
^ Térã: “rrekordatório”.
^ Térã: “rrekordatório”.
^ Térã: “ere”.
^ Térã: “che álma toikove”.