Salmos 103:1-22
David purahéi.
103 Pehejamíntena chéve* tamombaʼeguasu Jehovápe.
Che pyʼaite guive ambotuicháta héra porãite, Ñandejára réra sagrádo hína.
2 Pehejamíntena chéve* tamombaʼeguasu Jehovápe,pono núnka cheresarái la ojapo vaʼekuégui.+
3 Haʼe ningo operdona umi mbaʼe vai rejapóva,+ha omonguera entéro ne mbaʼasy.+
4 Ñandejára ndesalva ani hag̃ua remano,*+
haʼe ohechauka nderayhuetereiha* ha ndeporiahuverekoha.+
5 Ñandejára omeʼẽ ndéve hetaiterei mbaʼe porã+ reikove aja pukukue,ikatu hag̃uáicha reñembopyahu jey peteĩ ágilaicha.+
6 Jehová ihústo ha siémpre ojapo iporãva,+haʼe odefende umi osufrívape.+
7 Ñandejára ogia Moiséspe tape porãre.+
Ñandejára omombeʼu Israélpe umi mbaʼe haʼe ojapo vaʼekue.+
8 Jehová ñandeporiahuvereko ha ñanembyasy.+
Haʼe hína peteĩ Dios ndaipochyreíriva, Ñandejára siémpre ñanderayhueterei ha ndofallái ñanendive.*+
9 Haʼe ndoikomoʼãi imanduʼa tódo el tiémpo ñande pekádore,+ni ndopytamoʼãi ipochy ñanderehe pára siémpre.+
10 Ñande japeka ha ñamerese kuri Ñandejára ñandekastiga, péro haʼe ndojapói upéva.+
Ivai kuri upe jajapóva, péro haʼe nomeʼẽi ñandéve la ñamereséva.+
11 Pe yvága mombyryeterei oĩ ko yvýgui, ndaikatúi ñamedi,péicha avei ndaikatúi ñamedi mbaʼeichaitépa haʼe ohayhu* isiervokuéra iñeʼẽrendúvape.+
12 Pe kuarahyresẽ ningo mombyryeterei oĩ pe kuarahyreikégui,upéicha Ñandejára omomombyry ñandehegui umi ñane rembiapo vaikue.+
13 Peteĩ túa ningo oiporiahuvereko ifamiliakuérape,upéicha avei Jehová oiporiahuvereko umi orrespetávape chupe.+
14 Haʼe ningo oikuaa porã mbaʼéichapa ñandeapo vaʼekue,+ha ndahesaráiri ñande yvynteha.+
15 Umi pásto pyaʼe ipiruháicha, umi hénte pyaʼe omano,+haʼete umi yvoty kaʼaguy sapyʼaiténte ipotýva.+
16 Ha upéi ou peteĩ yvytu atã ha ohundipa,ha ni hendague ndojekuaavéi.
17 Péro Jehová ohayhuetereíta* opa ára g̃uarã* umi orrespetávape chupe.
Haʼe ojapóta hustísia+
ifamiliakuéra ha entéro idesendiénte rehehápe.+
18 Ñandejára otratáta péicha umi okumplívape ikompromíso hendive,+ha umi iñeʼẽrendúvape chupe opa mbaʼépe.
19 Jehová omoĩ itróno yvágape ha avave ndaikatumoʼãi omonguʼe upégui,+irréino omanda opaite mbaʼére.+
20 Pemombaʼeguasu Jehovápe enterove peẽ anhelkuéra+ pendepoderósova,peẽ peneñeʼẽrendúva chupe+ ha pejapóva haʼe heʼíva.
21 Enterove peẽ ehérsito yvagapegua, pemombaʼeguasu Jehovápe,+peẽ peservíva Ñandejárape ha pejapóva haʼe oipotáva.+
22 Entéro ikreasión tomombaʼeguasu Jehovápe.
Haʼe ogoverna opárupi, upévare toñemombaʼeguasu chupe entéro lugárpe.
Che* amombaʼeguasúta Jehovápe che pyʼaite guive.
Nóta
^ Térã: “che álmape”.
^ Térã: “che álmape”.
^ Hebréope: “pe yvykuágui”.
^ Térã: “ohechauka mborayhu ifiélva”.
^ Térã: “ohechauka mborayhu ifiélva”.
^ Térã: “etérno ymaite guive ha pára siémpre”.
^ Térã: “ohechaukáta mborayhu ifiélva”.
^ Térã: “che álma”.
