Cava na Veika Vakayalo? Au Rawa ni Tamata Vakayalo Keu Sega Mada ga ni Lotu?

SARAVA/ROGOCA

Kena isau vakaivolatabu

Ena iVolatabu e dau vakaibalebaletaki na ka vakayalo, vua e dua e vu dina mai lomana me vakamarautaka na Kalou, e saga tale ga me bucina na rai vakalou. Na tamata vakayalo ena saga me salavata nona ivakarau ni bula kei na ivakatagedegede ni Kalou, qai muria na veidusimaki ni yalo tabu. a—Roma 8:5; Efeso 5:1.

Dau vakamacalataki vakalevu ena iVolatabu na itovo ni tamata vakayalo kei na tamata vakayago. Kena ivakaraitaki, “na tamata vakayago e sega ni ciqoma na ka e vakatakila na yalo tabu ni Kalou,” se ivakavuvuli ni Kalou. (1 Korinica 2:14-16) Ia na tamata vakayalo ena dau lomasavu, qai saga na bula veiyaloni. O koya e vakayago tu ga na nona rai ena ‘dau vuvu se veivala.’ (1 Korinica 3:1-3) O ira tale ga na dauvakaucaca ra qai tawasea na itokani dina, era vakatokai mera “tamata vakamanumanu e sega ni laurai vei ira na ka vakayalo.”—Juta 19; Vosa Vakaibalebale 16:28. b

Ena ulutaga qo

E vu mai vei na veika vakayalo?

Eda buli meda ucuya na Kalou, kena ibalebale eda taleitaka tale ga na veika vakayalo. (Vakatekivu 1:27) Sa rauta me levu era mareqeta ra qai via kila e levu tale na veika vakayalo ena gauna era mai kila kina.

Eda dau vinakata meda vakaraitaka na itovo e kilai kina na Kalou o Jiova c me vaka na vakacegu, yalololoma, kei na sega ni veivakaduiduitaki. (Jemesa 3:17) Na Kalou tale ga e solia nona yalo tabu me uqeti keda meda talairawarawa ina nona ivakaro.—Cakacaka 5:32.

Cava e bibi kina na ka vakayalo?

Na ka vakayalo e vu ni “bula kei na vakacegu.” (Roma 8:6) Qo e dua na isolisoli talei mai vua na Kalou.

Bula: E yalataka na Kalou ni na vakaicovitaki ira na tamata vakayalo ena bula tawamudu.—Joni 17:3; Kalatia 6:8.
Vakacegu: Qo na vakacegu e solia Kalou. Era meca ni Kalou o ira era kauaitaka tiko ga na veika vakayago. (Roma 8:7) Na Kalou ena vakaicovitaki ira era saga mera vakalevutaka nodra veika vakayalo, ena “vakacegu ni Kalou e uasivia na vakasama kece.” (Filipai 4:6, 7) Na lomavakacegu qori ena vukei ira mera vakila tiko ga na marau.—Maciu 5:3.

O na bucina vakacava na veika vakayalo?

Vulica qai talairawarawa ena ivakaro ni Kalou. Saga mo wilika na iVolatabu, e tu kina na vakasama ni Kalou ra qai ‘uqeti ena yalo tabu’ na tagane era vola. (2 Pita 1:21) Na ka o na vulica kina ena uqeti iko me vakayalo, me dina tale ga nomu qarava na Kalou. Ena dusimaki iko tale ga na yalo tabu me salavata kei na inaki ni Kalou.—Joni 4:24.
Masuta na veivuke ni Kalou. (Luke 11:13) Ena vukei iko na Kalou mo vakaraitaka na itovo vakayalo. (Kalatia 5:22, 23) Ena solia tale ga vei iko na vuku mo vosota na ituvaki dredre.—Jemesa 1:5.
Veimaliwai kei ira na tamata vakayalo. Era na vukei iko mo kaukaua vakayalo. (Roma 1:11, 12) Ia ke o veimaliwai kei ira na tamata e veicalati nodra rai kei na rai ni Kalou, era na vakamalumalumutaki iko vakayalo.—Jemesa 4:4.

Ena vinakati meu lotu meu qai tamata vakayalo?

Nomu lewena e dua na lotu e sega ni kena ibalebale ni o sa tamata vakayalo. E kaya na iVolatabu: “Ke dua e nanuma ni sa qarava tiko na Kalou ena iqaraqaravi e vakadonuya o koya ia e sega ni lewa vinaka na yamena, e vakaisina tikoga na lomana e tawayaga tale ga nona lotu.”—Jemesa 1:26, ivakamacala e ra.

Ia e kaya na iVolatabu ni o ira na tamata vakayalo era qarava na Kalou ena sala e vakadonuya. Era kila ni dua ga na yalo tabu ni Kalou. Na yalo tabu qori sa qai uqeti ira mera qarava na Kalou ena “dua ga na yago” se dua ga na ivavakoso, ra qai maroroya na ‘duavata e vakavuna na yalo tabu, nira vauci vata ena veiyaloni.’—Efeso 4:1-4.

Rai cala me baleta na veika vakayalo

Rai cala: Na ka vakayalo e okati kina nona qara e dua na na sala me marau kina.

Ka dina: Na iVolatabu e vakamacalataki ira na tamata vakayalo era dusimaki ena rai ni Kalou. Era sega ni saga me vinaka ga nodra itovo, ia era muria na veidusimaki ni Kalou ena ka kece era cakava. Era vakadinadinataka ni o Jiova na Dauveibuli, ra qai muria nona ivakatagedegede me salavata kei na nona inaki.—Same 100:3.

Rai cala: Ena saga e dua me vakararawataki koya me rawa ni tamata vakayalo kina.

Ka dina: Na ka mosimosi e cakava e dua e yagona e vakaraitaka ni via lewa ga nona sokalou, e vakayago tu ga nona ivakarau ni rai. (Kolosa 2:18, 23) Na iVolatabu e semata na bula vakayalo ina marau, sega ni ka mosimosi.—Vosa Vakaibalebale 10:22.

Rai cala: Na vakatevoro kei na vakabauta ni bula tale tiko na yalo, ena uqeta na veika vakayalo.

Ka dina: Na vakatevoro, ya nodra rawa ni veivosaki na mate kei ira na bula. Ia e kaya na iVolatabu ni o ira na mate era sega sara ga ni kila e dua na ka. (Dauvunau 9:5) E okati me vakatevoro nona veitaratara voleka e dua, kei ira na ka bula vakayalo era talaidredre vua na Kalou. Na ivakarau qori e vakacudruya na Kalou, ena tarova tale ga nona toso vakayalo e dua.—Vunau ni Soro 20:6; Vakarua 18:11, 12.

Raicala: Era ka vakayalo na veika bula kece.

Ka dina: E lagiti na Kalou ena ka kece e bulia. (Same 145:10; Roma 1:20) Ia o ira ga na ibulibuli uasivi ni Kalou e rawa nira bucina mera tamata vakayalo. Era sega ni rawa ni veitokani kei na Kalou na manumanu, nira muria ga na vuku era sucukaya mai qai dau vakayago tu ga na ka era cakava. (2 Pita 2:12) Na iVolatabu e vakaduiduitaka na tamata vakayalo, kei na na itovo se rai vakamanumanu.—Jemesa 3:15; Juta 19.

a Ena iVolatabu na vosa taumada e vakadewataki me “yalo,” e kena ibalebale na “icegu.” E rawa tale ga ni vakaibalebaletaki ina dua na ka e sega ni lauirai, ia e vakilai na kena kaukaua. Na iVolatabu e vakamacalataka na Kalou me ka Vakayalo Kaukaua Duadua. Na tamata vakayalo ena yavutaka nona vakatulewa ena ka e vinakata na Kalou, kei na veidusimaki ni yalo tabu.

b Na iVolatabu e dau vakayagataka na vosa “vakayago,” me dusi ira na tamata e vakayago tu ga nodra rai. Ra qai vakamuai tu ena nodra gagadre se ka ga era vinakata. E sega sara ga ni via muria na ivakatagedegede ni Kalou.

c E tukuni ena iVolatabu ni yaca ni Kalou o Jiova.—Same 83:18.