iMatai ni iVola Vei Ira mai Korinia 3:1-23
3 Ia o yau raveitacini, au a sega ni vosa vei kemuni me vaka au vosa vei ira na tamata vakayalo,+ vei ira ga era vakayago, era vaka na gone dramidrami+ ena ka e baleti Karisito.
2 Au a vagunuvi kemuni ena sucu, sega ni kakana dina, ni oni se malumalumu. Qo mada ga oni se malumalumu tiko ga,+
3 oni vakayago tu ga.+ Oni dau vuvu, oni veivala, e vakaraitaka sara tu ga qo na nomuni tamata vakayago+ kei na nomuni vakamuri ira na tamata ni vuravura, se vakacava?
4 Ni kaya e dua: “Au nei Paula,” ia e kaya e dua tale: “Au nei Apolosa,”+ e sega ni vakaraitaka qo ni oni tamata ga?
5 O cei gona o Apolosa? O cei o Paula? Keirau italai+ ga moni mai vakabauta kina, me salavata kei na isolisoli ni Turaga vei keda yadua.
6 Au tea o yau,+ e vakasuasuataka o Apolosa,+ na Kalou ga e vakatubura,
7 E sega kina ni dua na ka o koya e tea, se o koya e vakasuasuataka, na Kalou ga, ni o koya e vakatubura.+
8 E tautauvata ga o koya e tea kei koya e vakasuasuataka, ia ena vakaicovitaki na tamata yadua me vaka na ka e cakava.+
9 Nida cakacaka vata kei na Kalou. O kemuni na were teivaki ni Kalou, na vale ni Kalou.+
10 Au a viria e dua na yavu+ me vaka na loloma soli wale ni Kalou vei au, niu nona matai maqosa, e qai mai taravale kina e duatani tale. Ia me raica matua na tamata yadua se vakacava tiko nona taravale ena yavu qo.
11 E sega ni dua e rawa ni viria e dua tale na yavu, ni sa viri oti tu na yavu, oya o Jisu Karisito.+
12 Ke dua e tara ena yavu ya na vale e caka ena koula, siliva, vatutalei tale eso, na kau, na co madu, se na tolonicovuata madu,
13 ena vakavotui na we ni cakacaka ni tamata yadua ena siga ni veivakatovolei, ni na qai vakavotuya na ka kece na bukawaqa,+ ena kilai tale ga kina na cakacaka ni tamata yadua.
14 Ena vakaicovitaki o koya e dei tu ga na ka e tara.
15 Ke vakamai na nona cakacaka e dua, sa na maumau na ka e cakava, ia ena vakabulai o koya. Ke vaka kina, ena vaka ga e bula mai na bukawaqa.
16 Oni sega ni kila ni oni valenisoro ni Kalou,+ qai tiko vei kemuni na yalo ni Kalou?+
17 Ke dua e vakarusa na valenisoro ni Kalou, ena vakarusai koya na Kalou, ni ka tabu na valenisoro ni Kalou,+ ya o kemuni.
18 Me kua ni dua e vakaisini koya: Ke dua vei kemuni e nanuma ni vuku ena veika ni vuravura qo,* me okati koya me lialia me rawa ni qai vuku.
19 Baleta na vuku ni vuravura qo e ka sesewa vua na Kalou, ni volai: “E toboki ira na vuku ena nodra ilawaki.”+
20 E volai tale ga: “E kila o Jiova* ni ka wale na nodra vakasama na vuku.”+
21 O koya gona, me kua ni dua e sakitaka na tamata, ni ka kece e nomuni,
22 se o Paula se o Apolosa se o Kifa*+ se na vuravura se na bula se na mate se na veika era tu qo se na veika ena yaco mai, na ka kece e nomuni,
23 ia o kemuni oni nei Karisito,+ o Karisito e nona na Kalou.
