Vola o Joni 17:1-26
17 E tukuna na ka kece qo o Jisu qai tacake i lomalagi, e kaya: “Tamaqu, sa yaco mai na gauna. Moni vakalagilagi luvemuni me rawa ni vakalagilagi kemuni na luvemuni,+
2 me vaka na nomuni solia vua me lewa na tamata kece,+ me na solia tale ga o koya na bula tawamudu+ vei ira kece oni solia vua.+
3 Ena rawata na bula tawamudu,+ o koya e vulica tiko ga na veika me baleti kemuni* na Kalou dina duadua ga,+ kei Jisu Karisito oni tala mai.+
4 Au sa vakalagilagi kemuni e vuravura+ ena noqu vakaotia na cakacaka oni lesia meu cakava.+
5 O koya gona Tamaqu, ni vakalagilagi au e yasamuni ena lagilagi a tu vei au niu se tiko e yasamuni ni bera o vuravura.+
6 “Au sa vakatakila na yacamuni vei ratou oni solia vei au e vuravura.+ Eratou nomuni, ia oni soli ratou vei au, eratou sa mai muria tale ga na nomuni vosa.
7 Eratou sa mai kila qo ni ka kece oni solia vei au e vu ga vei kemuni.
8 Niu sa solia vei ratou na vosa oni a solia vei au,+ eratou sa ciqoma, eratou kila sara ga niu matataki kemuni mai,+ eratou vakabauta tale ga ni oni talai au mai.+
9 Au masulaki ratou, au sega ni masulaki vuravura, au masulaki ratou ga oni solia vei au, ni ratou nomuni,
10 na ka kece e noqu e nomuni,+ na ka e nomuni e noqu, au sa mai vakalagilagi tale ga ena kedratou maliwa.
11 “Au sa sega tale ni tiko e vuravura, ni ratou se tiko e vuravura,+ ia o yau au sa lako yani vei kemuni. Tamaqu Yalosavasava, ni taqomaki ratou+ ena vuku ni yacamuni oni a vakatokai au kina, me ratou duavata kina me vaka na nodaru duavata.+
12 Niu a tiko vata kei ratou au dau taqomaki ratou+ ena vuku ni yacamuni oni a vakatokai au kina. Au taqomaki ratou qai sega ni dua e vakarusai,+ vakavo ga o koya e dodonu me rusa+ me vakayacori kina na ka e tukuni ena tikinivolatabu.+
13 Ia qo au sa lako yani vei kemuni, au tukuna tiko na ka kece qo niu se tiko e vuravura me ratou marau kina vakalevu ena vukuqu.+
14 Au sa solia vei ratou na nomuni vosa, ia e cati ratou o vuravura ni ratou sega ni vakavuravura+ me vaka ga na noqu sega ni vakavuravura.
15 “Au sega ni kerea moni kauti ratou tani e vuravura, moni taqomaki ratou tiko ena vuku i koya na vunica.+
16 Eratou sega ni vakavuravura+ me vaka ga na noqu sega ni vakavuravura.+
17 Ni vakasavasavataki ratou ena ka dina,+ e ka dina na nomuni vosa.+
18 Me vaka ga nomuni talai au i vuravura, au sa talai ratou tale ga i vuravura.+
19 Au sa vakasavasavataki au ena vukudratou, me ratou vakasavasavataki tale ga ena ka dina.
20 “Au sega ni masulaki ratou ga qo, o ira tale ga era vakabauti au ena nodra vosa,
21 mera duavata kece kina,+ me vaka ga na nomuni duavata kei au kei na noqu duavata kei kemuni Tamaqu,+ mera duavata tale ga kei kedaru, me kila kina o vuravura ni oni talai au mai.
22 Au sa vakalagilagi ira me vaka na nomuni vakalagilagi au, mera duavata me vaka nodaru duavata.+
23 Au duavata kei ira, oni duavata kei au, mera duavata sara kina, me kila o vuravura ni oni talai au mai, oni lomani ira tale ga me vaka nomuni lomani au.
24 Tamaqu, au vinakata mera tiko tale ga ena vanua au tiko kina+ o ira oni solia vei au, mera raica na nomuni vakalagilagi au, ni oni lomani au ni bera na ivakatekivu kei vuravura.+
25 Tamaqu yalododonu, e sega sara ni kilai kemuni o vuravura,+ ia au kilai kemuni,+ o iratou tale ga qo eratou sa kila ni oni talai au mai.
26 Au sa vakatakila vei ratou na yacamuni au na vakatakila tiko ga,+ me rawa ni ratou veilomani ena loloma vata ga oni lomani au kina, meu duavata tale ga kei ratou.”+
iVakamacala e ra
^ Se “kilai kemuni.”
