Vei Ira mai Roma 8:1-39
8 O ira gona era duavata kei Karisito Jisu era na sega ni totogitaki.
2 Baleta na lawa ni yalo tabu e vakabulai ira na duavata kei Karisito Jisu, sa sereki kemuni+ mai na lawa ni ivalavala ca kei na mate.
3 Na ka e sega ni rawata na Lawa+ ena vuku ni malumalumu+ vakatamata, e rawata na Kalou ena nona talai Luvena+ mai ena yago vakatamata+ me kauta laivi na ivalavala ca. Ni cakava qo, sa vakataulewataka kina na ivalavala ca ena yago ni tamata,
4 meda vakayacora kina na veika dodonu e lavaki ena Lawa+ ena noda muria ga na itovo vakayalo, sega ni itovo vakayago.+
5 Ni o ira na vakayago era na vakabibitaka ga na ka vakayago,+ o ira na vakayalo era na vakabibitaka ga na ka vakayalo.+
6 E vu ni mate na vakasamataki tiko ga ni ka vakayago,+ ia e vu ni bula kei na vakacegu na vakasamataki tiko ga ni ka vakayalo.+
7 Baleta na vakasamataki tiko ga ni ka vakayago e veimecaki kei na Kalou,+ e sega ni muria na lawa ni Kalou, ni sega ga ni rawa ni muria.
8 O ira gona era vakayago e sega ni rawa nira vakamarautaka na Kalou.
9 Ia o kemuni oni sega ni vakayago, oni vakayalo ga+ ke tiko vei kemuni na yalo ni Kalou. Ia e sega ni wili me nei Karisito o koya e sega ni tiko vua na ivakarau ni yalo i Karisito.
10 Ia ke duavata kei kemuni o Karisito,+ dina ni mate na yagomuni ena vuku ni ivalavala ca, ena qai vakabulai kemuni na yalo tabu ena vuku ni nomuni yalododonu.
11 Ia ke tiko vei kemuni na yalo i koya e vakaturi Jisu mai na mate, ena vakabula tale ga na yagomuni malumalumu qori+ o koya e vakaturi Karisito Jisu mai na mate+ ena vuku ni yalona e tiko vei kemuni.
12 O koya gona raveitacini, eda sega ni vakaroti meda muria na ka vakayago kei na kena gagadre.+
13 Ke vakayago na nomuni bula oni na mate sara ga. Ia ke oni vakamatea na nomuni ivakarau ni bula vakayago+ ena veivuke ni yalo tabu, oni na bula.+
14 O ira kece e dusimaki ira na yalo ni Kalou era okati mera luve ni Kalou.+
15 Ni oni sega ni rawata na yalo ni veivakabobulataki moni rere kina, ia oni rawata na yalo tabu moni ciqomi kina moni luvena, e vakavuna tale ga na yalo tabu ni Kalou meda kacivaka: “Apa,* Tamada!”+
16 Na yalo tabu ga e vakadeitaka e lomada+ nida luve ni Kalou.+
17 O koya gona, ke da sa wili meda luvena, eda sa itaukei tale ga—eda taukena na ka e vakarautaka na Kalou, ia eda itaukei vata+ kei Karisito—ke da rarawa vata,+ eda na qai vakalagilagi vata.+
18 Niu vakabauta ni rarawa eda sotava ena gauna qo e ka wale sara ni vakatauvatani kei na lagilagi ena vakatakilai vei keda.+
19 Nira sa nanamaki tu na kabuli* kece ina gauna mera vakaraitaki kina na luve ni Kalou.+
20 Sa mai vakamalumalumutaki tu mera tawayaga na kabuli kece,+ e dina nira sega ni vinakata, ia e yaco ga ena vuku i koya e vakamalumalumutaka. Ena gauna vata qori, era vakanuinui tu
21 mera sereki tale ga na kabuli+ mai na nodra bobula tu ina ca, mera qai vakila na galala lagilagi era vakila tu na luve ni Kalou.
22 Eda kila nira vutugu ra qai rarawa tu na kabuli kece me yacova mai qo.
23 E sega ni o koya ga qori, eda vutugu tale ga o keda+ na rawata na isevu ni ka e vakarautaki ena vukuda, ya na yalo tabu, da qai waraka tiko me okati keda na Kalou meda luvena,+ me na qai sereki na yagoda ena ivoli.
24 Eda a vakabulai ena inuinui qo. Ia na inuinui e laurai e sega ni inuinui, eda na vakanuinuitaka vakacava na ka eda raica?
25 Ia nida nuitaka+ na ka eda sega ni raica,+ eda na waraka ga ena vosota na ka eda nuitaka qori.+
26 E vaka kina na yalo tabu, ni dau vukei keda ena noda malumalumu,+ ni so na gauna eda lecava na ka meda masulaka, ena qai vakamamasu ena vukuda na yalo tabu ena vutugu e sega ni cavuti rawa.
27 Ia o koya e dikeva na lomada+ e kila na ibalebale ni ka e tukuna na yalo tabu, ni ka e kerea ena vukudra na yalosavasava e salavata kei na loma ni Kalou.
28 Eda kila ni cakava vakamatau na Kalou na ka kece me vinaka vei ira na lomani koya, o ira na kacivi me vaka na nona inaki.+
29 Ni tiko eso e kauaitaki ira sara ga e liu o koya, sa lesi ira oti tale ga mera vakatotomuria na bula i Luvena+ me ulumatua kina o koya,+ ra le levu na tacina.+
30 Me kena ikuri, o ira ga e lesia+ e kacivi ira tale ga,+ o ira e kaciva, e okati ira mera yalododonu.+ Ia o ira e okata mera yalododonu ena vakalagilagi ira tale ga.+
31 Na cava tale meda qai kaya ena ka kece qo? Ke noda ito na Kalou, o cei ena saqati keda?+
32 E sega mada ga ni bureitaka na Luvena ia e soli koya ena vukuda kece,+ me qai sega vakacava ni solia tale ga vei keda ena nona loloma levu na veika tale eso?
33 O cei me na beitaki ira na digitaki ni Kalou?+ Na Kalou sara ga sa okati ira mera yalododonu.+
34 O cei me via veivakalewai? A mate o Karisito Jisu, ia sa vakaturi mai, sa tiko ena ligaimatau ni Kalou,+ e vakamamasu tale ga ena vukuda.+
35 O cei me na tawasei keda mai na loloma i Karisito?+ Me na tawasei keda na veika rarawa, na veika dredre, na veivakacacani, na viakana, na luvawale, na veika rerevaki se na iseleiwau?+
36 Me vaka e volai: “Ena vukumuni keimami vakamatei kina ena veigauna kece, keimami vaka na sipi e lai vakamatei.”+
37 Sega, eda qaqa ga+ ena ka kece qo ena vuku i koya e lomani keda.
38 E dei tu na lomaqu ni na sega ni rawata na mate, na bula, na agilosi, na veimatanitu, na veika era tu nikua se veika ena yaco mai, na kaukaua cava ga,+
39 se dua na ka mai cake se ka e ra, se dua tale na kabuli, me tawasei keda mai na loloma ni Kalou e mai vakaraitaka o Karisito Jisu na noda Turaga.
iVakamacala e ra
^ E vosa vakaIperiu se vakaArame, e kena ibalebale “I Tamada!”
^ E vakaibalebaletaki vakalevu vei keda na tamata.
