Vosa Vakaibalebale 10:1-32
10 Na vosa vakaibalebale i Solomoni.+
Na gone vuku e vakamarautaki tamana,+Ia na gone lialia e vakararawataki tinana.
2 Na iyau e rawati ena ivakarau ca ena sega ni yaga,Ia na cakadodonu ena veivakabulai mai na mate.+
3 O Jiova ena sega ni vakatara na yalododonu me viakana,+Ia ena saqata na nodra gagadre na tamata ca.
4 Na vakasavuliga ena vakavuna na dravudravua,+Ia na liga gugumatua ena rawati kina na iyau.+
5 Na gone yalomatua ena kumuna na vuaniqele ena vulaikatakata,Ia na gone e vakamadua na nona ivalavala ena mocelutu ena gauna ni tatamusuki.+
6 Na veivakalougatataki e tau ena uluna na yalododonu,+Ia na gusuna na tamata ca e vunia na ivalavala kaukaua.
7 Na kena ivakananumi* na yalododonu e veivakalougatataki,+Ia na yacadra na tamata ca ena rusa ga.+
8 Na tamata lomavuku ena muria na ivakavuvuli,*+Ia o koya e vosa vakalialia ena buturaki sobu.+
9 O koya e lako ena yalodina ena lako doudou,+Ia o koya e vakavevea na nona sala ena laurai.+
10 O koya e bobomataidua ena veidabui, e vakatuburarawa,+O koya e vosa vakalialia ena buturaki sobu.+
11 Na gusuna na yalododonu e ivurevure ni bula,+Ia na gusuna na tamata ca e vunia na ivalavala kaukaua.+
12 Na veicati e vakatubura na veileti,Ia na loloma e ubia na cala kece.+
13 Na tebenigusuna na tamata yalomatua e laurai kina na vuku,+Ia ena tau na kuita e dakuna na yalowai.+
14 O ira na vuku era binia na kilaka,+Ia na gusuna na lialia e sureta na leqa.+
15 Na nona iyau na tamata vutuniyau e nona koro kaukaua.
Era leqa na dravudravua ni sega vei ira na ka.+
16 Na nona cakacaka na yalododonu e tini ina bula,Ia na vua ni nona cakacaka na tamata ca e tini ina ivalavala ca.+
17 O koya e muria na veivakavulici e sala ni bula,*Ia o koya e beca na veivunauci e vakasesea eso tale.
18 O koya e vunia na veicati e vosa lasu,+Kei koya e veitukuniyaka na itukutuku ca* e lialia.
19 Ni levu na vosa, ena sega ni tarovi rawa na cala,+Ia o koya e lewa vinaka na tebenigusuna e vuku nona ivalavala.+
20 Na yamena na yalododonu e vaka na siliva talei,+Ia na loma ni tamata ca e yaga vakalailai.
21 Na tebenigusuna na yalododonu e vakania* e levu,+Ia o ira na lialia era mate nira yalowai.+
22 Na veivakalougatataki i Jiova e veivakavutuniyautaki,+E sega ni kuria o koya ena ka rarawa.*
23 Na ivalavala vakamadua e ka ni qito vua na tamata sesewa,Ia o koya e yalomatua e taukena na vuku.+
24 Na ka e rerevaka na tamata ca ena yacovi koya,Ia ena soli vua na yalododonu na ka e gadreva.+
25 Ni lako tani na cagi kaukaua, ena yali vaka kina na tamata ca,+Ia o koya na yalododonu e yavu tudei.+
26 Me vaka na viniqa e batida kei na kubou e matada,E vaka kina na tamata vucesa vua e tala.*
27 Na rerevaki Jiova e vakabalavutaka na bula,+Ia na nodra yabaki na tamata ca ena vakalekalekataki.+
28 Na ka era nuitaka na yalododonu e vakavumarau,+Ia na nodra inuinui na tamata ca ena matewale.+
29 Na sala i Jiova e nona idrodro o koya e sega ni cala,+Ia era na rusa kina na daucaka ca.+
30 Na tamata yalododonu ena sega sara ni vakabalei,+Ia o ira na tamata ca era na sega ni tawani vuravura.+
31 Na gusuna na yalododonu e vakatubura* na vuku,Ia na yame dau veivakacalai ena musu laivi.
32 Na tebenigusuna na yalododonu e kila na ka vinaka,Ia na gusudra na tamata ca e veivakacalai.
iVakamacala e ra
^ Se “irogorogo.”
^ Ipe., “ivakaro.”
^ Se rawa ni “e lakova na sala ni bula.”
^ Se “itukutuku sega ni vakadeitaki.”
^ Se “tubera.”
^ Se “leqa.”
^ Se “nona itaukei ni cakacaka.”
^ Se “vuataka.”