iVola Vei Ira mai Kolosa 2:1-23
2 Au vinakata moni kila na levu ni noqu sasaga ena vukumuni, ena vukudra tale ga mai Leotisea,+ kei ira kece era se bera ni raici au.
2 Me vakacegui kina na lomadra,+ mera vakaduavatataki tale ga ena loloma.+ Me nodra kina na iyau kece e vakadeitaki ena vuku dina, mera rawata kina na kilaka dodonu me baleta na ka vuni tabu ni Kalou, oya o Karisito.+
3 E vunitaki matua vua na iyau kece ni vuku kei na kilaka.+
4 Au tukuna tiko qo me kua kina ni dua e vakacalai kemuni ena vosa kamikamica.
5 E sega ni tiko kei kemuni na yagoqu, na yaloqu ga e tiko kei kemuni, au marau niu raica ni oni dau tuvana vakamatau na ka kece,+ e dei tale ga nomuni vakabauti Karisito.+
6 O koya gona, ni oni sa ciqomi Karisito Jisu na Turaga, moni muria tiko ga na nona veidusimaki,
7 me ti sara na wakamuni, moni tarai cake vua,+ moni tudei ena vakabauta,+ me vaka oni a vakavulici kina, me vuabale tale ga na nomuni vakavinavinaka.+
8 Ni qarauna de dua e tagavi kemuni bulabula ena vuku vakavuravura kei na vosa ni veicavilaki+ e yavutaki ena ivakavuvuli vakatamata kei na ivakavuvuli e vakabibitaki e vuravura, e sega ni salavata kei na ivakavuvuli i Karisito,
9 ni vakavotui kece ena nona bula na itovo ni Kalou.+
10 Ena vukuna e tu kece kina na ka vei kemuni, ni o koya na ulu ni veimatanitu kei na lewa kece.+
11 Oni sa cilivi tale ga ena nomuni duavata kei koya, oni sega ni cilivi ena liga, ia ena nomuni biuta tani na yagomuni valavala ca,+ ni qo na veicilivi ena vuku i Karisito,+
12 ni oni bulu vata kei koya ena nona papitaiso,+ kei na nomuni duavata kei koya, oni vakaturi+ vata kina ena nomuni vakabauta na ka e rawati ena cakacaka veivakurabuitaki ni Kalou ni a vakaturi koya mai na mate.+
13 Kena ikuri, oni a mate tu ena nomuni valavala ca kei na ituvaki tawacili ni yagomuni, e qai vakabulai kemuni kei Karisito na Kalou.+ Ena nona yalololoma, e vosota kina na noda ivalavala ca kece+
14 qai bokoca na lawa e volai ena liga+ e keda meca voli, e volai kina na ivakaro+ e saqati keda tiko,+ e kauta tani ena nona vakota ena kaunirarawa.*+
15 Ena vuku ni tikina qo, e vakamalumalumutaki ira kina na veimatanitu kei na veiliutaki, e kauti ira yani e matanalevu mera saravi nira sa vakavuai,+ e liutaki ira ena tayabe ni qaqa.
16 O koya gona, me kua ni dua e lewai kemuni ena ka moni kania kei na ka moni gunuva+ se na ka e vauca na soqo se vula vou+ se siga ni vakacecegu.+
17 Na ka kece qori era iyaloyalo ga ni ka me na yaco mai,+ ia na ka dina e nei Karisito.+
18 Me kua ni dua e kovea na nomuni icovi+ o koya e dau veivakaisini nona yalomalumalumu, e qaravi ira na agilosi, “e sakitaka voli na nona raivotu,”* qai qaciqacia ni rui vakatamata na nona rai,
19 ia e sega ni dei tiko ga vua na uluda,+ o koya e vakatau kina na tubu ni yago taucoko ena kena ivakatagedegede e solia na Kalou. Era cakacaka vata na isema kei na ua ni yago mera vakarautaka na ka kece e gadrevi me duavata tiko kina na yago taucoko.+
20 Ke oni mate vata kei Karisito ena veika e vauca na ivakavuvuli e vakabibitaki e vuravura,+ na cava ga oni bula tiko kina me vaka oni tiki kei vuravura, ena nomuni muria na ivakaro:+
21 “Kua ni taura, kua ni tovolea, kua ni tara”
22 na ka kece era vakarusai nira sa vakayagataki, me vaka na ivakaro kei na ivakavuvuli vakatamata?+
23 Na ivakaro kece qori e kena irairai nira yavutaki vakavuku vei ira na via lewa ga na nodra sokalou, e veivakaisini nodra yalomalumalumu, era vakararawataka na yagodra,+ ia e sega ni yaga ena nodra valuta na gagadre ni yago.
iVakamacala e ra
^ Raica na iVakamacala ni Vosa.
^ Se “butuka yani.” Lavetaki ena vosa era dau cavuqaqataka na italatala ni lotu butobuto ni lotutaki e dua me lewe ni nodra lotu.
