iVola i Juta 1:1-25
1 O yau o Juta na dauveiqaravi i Jisu Karisito, au taci Jemesa.+ Vei kemuni na kacivi,+ e lomani kemuni na Kalou na Tamada, oni maroroi tu moni nei Jisu Karisito:+
2 Me vakalevutaki mada ga vei kemuni na yalovinaka, na vakacegu, kei na loloma ni Kalou.
3 Kemuni na noqu itokani lomani, au vinakata dina meu volavola yani me baleta na veivakabulai eda nuitaka kece.+ Ia au raica ni dodonu meu uqeti kemuni moni vala vakaukaua moni taqomaka na vakabauta+ a soli vakadua ga vei ira na yalosavasava.
4 Vakabibi niu raica nira curu lo mai eso na tagane e sa tukuni ira tu mai na Vosa ni Kalou nira na lewai. Era sega ni doka na Kalou, era vakatanitaka na nona loloma soli wale ni noda Kalou me ulubale ni nodra ivalavala vakasisila,*+ era cakitaki koya duadua ga e taukeni keda, na noda Turaga o Jisu Karisito.+
5 Oni sa kila vinaka tu na ka kece qo, ia au via tukuna tale vei kemuni ni a vakabula o Jiova* e dua na ilawalawa tamata mai na vanua o Ijipita,+ ia e muri e qai vakarusai ira na sega ni vakaraitaka nira vakabauta.+
6 Era sega ni tudei tale ga na agilosi ena nodra vanua nira biuta na nodra itikotiko dodonu,+ sa vakarautaka o koya na kedra ivesu tawamudu ena butobuto loaloa me yacova na siga ni veilewai levu.+
7 E vaka kina o Sotoma kei Komora kei ira na koro voleka, nira ucui ira na agilosi ya ena torosobu ni nodra veiyacovi tawadodonu* kei na nodra vakaceguya ga nodra gagadre ca.+ Era totogitaki gona ena bukawaqa tawamudu.+ O koya gona, e dodonu meda vuli kina.
8 E vaka kina o ira na tagane qo, era dau tadra, era vakadukadukalitaka na yagodra, era sega ni dokai ira na veiliutaki, era vosavakacacataki ira tale ga e vakadonui ira na Kalou.+
9 Ia ni rau veiletitaka na yago i Mosese+ o Maikeli+ na agilosi turaga+ kei na Tevoro, a sega ni siova o Maikeli me tauca vua na vosa kaukaua ni veilewai,+ e kaya ga: “Me cudruvi iko mada ga o Jiova.*
10 Ia o ira na tagane qo era vosavakacacataka na ka kece era sega sara ga ni kila,+ na ka era kila e tautauvata ga kei na ka e kila na manumanu lecaika,+ na ka qo e vakaleqai ira voli.
11 Era rarawa nira muria na sala i Keni,+ era ciciva na sala ca i Pelami+ mera saumi kina, era rusa tale ga ena vosa ni veivorati+ i Kora!+
12 O ira qo na vatu e dromu e lomaniwai nira kana vata kei kemuni ena nomuni kana ni veilomani.+ Era ivakatawa era nanuma ga na ketedra ra qai sega ni rere,+ era o e sega na kena uca e veikauyaki ena cagi,+ era kau ena vulaitubutubu, ia e sega na vuadra nira sa mate vakarua,* e cavuraki tale ga na wakadra,
13 era biau voravora e kauta mai na vuso nira vakavuna ga na nodra madua,+ era kalokalo e sega na sala tudei e muria, era na biu ena butobuto loaloa me tawamudu.+
14 O ira tale ga qo a parofisaitaki ira o Inoki,+ na ikavitu ni itabatamata mai vei Atama ni a kaya: “Raica! Sa lako mai o Jiova* kei na iwiliwili levu* ni nona agilosi savasava,+
15 me vakataulewa vei ira na tamata kece,+ me totogitaki ira na beci koya ena vuku ni nodra ivalavala ca kei na veika lolovira kece era cavuta vua na tamata ivalavala ca.”+
16 O ira qo era dau vosakudrukudru,+ era dau didivaka na kedra ituvaki, era muria ga na nodra gagadre ca,+ na gusudra e sakitaki ira ga, ra qai veicavilaki mera rawaka kina.+
17 Vei kemuni na wekaqu lomani, ni nanuma na veika era sa tukuna oti na yapositolo ni noda Turaga o Jisu Karisito,
18 era dau kaya vei kemuni: “Ena iotioti ni gauna era na basika na dauveivakasewasewani, era na cakava ga na ka e beci kina na Kalou.”+
19 O ira sara ga qo era vakavuna na veisei,+ era tamata vakamanumanu,* e sega ni laurai vei ira na ka vakayalo.*
20 Ia kemuni na wekaqu lomani, moni vakaukauataki ena yavu ni nomuni vakabauta savasava, ni masu ena veiuqeti ni yalo tabu,+
21 ni tiko ga ena loloma ni Kalou,+ ni oni waraka tiko na yalololoma i Jisu Karisito na noda Turaga ni oni nuitaka tiko na bula tawamudu.+
22 Kena ikuri, moni yalololoma tiko ga+ vei ira na lomalomarua,+
23 ni vakabulai ira+ ena nomuni dreti ira mai na bukawaqa. Ni lomani ira tiko ga eso tale, ia moni qaqarauni, ni oni cata mada ga na isulu e takava na yago.+
24 Vei koya ena taqomaki kemuni moni kua ni tarabe, moni kua tale ga ni tauviduka+ ena mata ni nona itutu lagilagi ena marau levu,
25 na Kalou duadua ga na noda iVakabula, ena vuku i Jisu Karisito na noda Turaga, me vakalagilagi ni o koya ga e cecere, e kaukaua, qai tu vua na lewa ena veigauna sa oti, ena gauna qo, kei na gauna e sega ni mudu. Emeni.
iVakamacala e ra
^ Se “ivalavala vakamadua.” Kirisi, a·selʹgei·a. Raica na iVakamacala ni Vosa.
^ Raica na iVakamacala ni Vosa.
^ Se “mate vakadua.”
^ Se “na udolu vakatini.”
^ Se “tamata vakayago.”
^ Kir., “na yalo.”
