Isaiah 60:1 kenkan dɛ: ‘Soɛr, hyerɛn; na wo kan aba, na Jehovah n’enyimnyam ahyerɛn wo do.’ Nsɛm afofor a ɔwɔ Isaiah tsir 60 no mu no ma yehu dɛ, nna Zion anaa Jerusalem a nna dɛm aber no ɔyɛ Judah n’ahenkurow no ho asɛm na wɔreka. a (Isa. 60:14; 62:​1, 2) Jerusalem kurow a wɔkaa ho asɛm no so, ogyina hɔ ma Israelman no nyina. Nsɛm a Isaiah kae yi ma nsɛmbisa ebien bi soɛr: Odzi kan, ebɛn aber na Jerusalem ‘soɛree’ na ɔhyerɛɛn ne kan, na osii dɛn yɛɛ dɛm? Otsia ebien, nkɔm a Isaiah hyɛɛ no reba mu wɔ hɛn aber yi so do anaa?

Ebɛn aber na Jerusalem ‘soɛree’ na ɔhyerɛɛn ne kan, na osii dɛn yɛɛ dɛm? Mfe 70 a Jewfo no dze kɛyɛɛ nkowaa wɔ Babylon nyina, nna Jerusalem kurow no adan amamfo. Afei so, nna asɔrfie no asɛɛ koraa. Naaso aber a Mediafo na Persiafo dzii Babylon do konyim no, nna Israelfo a wɔwɔ Babylon Ahenman no mu no nyina botum asan akɔ hɔn kurow mu na wɔaasan akɔsom Jehovah nokwar mu bio. (Ezra 1:​1-4) Ofi afe 537 A.H.B. reba no, ɔbɛyɛ dɛ anokwafo binom a wofi mbusuakuw 12 no mu no bi sanee kɔr hɔn kurow mu. (Isa. 60:4) Wokodurii no, wɔhyɛɛ ase bɔɔ afɔr maa Jehovah, wodzii hɔn afahyɛ ahorow no, na wɔhyɛɛ ase dɛ wɔresan esi asɔrfie no. (Ezra 3:​1-4, 7-11; 6:​16-22) Ofitsi dɛm aber no rokɔ no, Jehovah n’enyimnyam hyɛɛ ase hyerɛnee wɔ Jerusalem do, kyerɛ dɛ, ɔhyerɛnee wɔ Nyankopɔn no nkorɔfo a nna wɔasan aba hɔn kurow mu no do. Osian iyi ntsi, Israelmba no bɛyɛɛ dɛ kan maa aman ahorow a wonnyim Jehovah a nna woetwa hɔnho ehyia no.

Naaso, nkɔm ahorow a Isaiah hyɛɛ dɛ ndzɛmba bɛsan ayɛ yie no, ɔnnyɛ ne nyina na ɔbaa mu wɔ Jerusalem do. Ebɛnadze ntsi na yɛreka dɛm? Israelfo pii annkɔ do enntsie Nyankopɔn. (Neh. 13:27; Mal. 1:​6-8; 2:​13, 14; Matt. 15:​7-9) Ekyir yi, wɔpoow Jesus Christ a nna ɔyɛ Messiah no mpo. (Matt. 27:​1, 2) Osian iyi ntsi, wɔ afe 70 H.B. no, wɔsanee sɛɛ Jerusalem kurow no nye asɔrfie no bio.

Nna Jehovah aka ato hɔ dada dɛ biribi a ɔtse dɛm besi. (Dan. 9:​24-27) Dza osii no ma yehu pefee dɛ, ɔnnyɛ dza nna osi Jehovah n’enyiwa do nye dɛ ɔbɛma nkɔnhyɛ a ɔwɔ Isaiah tsir 60 no nyina aba mu wɔ tsetse Jerusalem do.

Nkɔm a Isaiah hyɛɛ no reba mu wɔ hɛn aber yi so do anaa? Nyew, naaso ɔfa “Jerusalem a ɔwɔ sor” no ho. Ɔsomafo Paul kyerɛɛw no ho asɛm dɛ: “Ɔno nye hɛn nyina hɛn na.” (Gal. 4:26) Jerusalem a ɔwɔ sor no yɛ Nyankopɔn n’ahyehyɛdze no ne fa a ɔwɔ sor a abɔfo anokwafo ahyɛ mu ma no. Jesus na Christianfo 144,000 a wɔasera hɔn no ka Jerusalem a ɔwɔ sor no ne mba no ho. Enyidado a nna Paul wɔ dɛ ɔbɔkɔ sor no, dɛm nkorɔfo yi so wɔ bi. Christianfo a wɔasera hɔn no ka bɔ mu yɛ “ɔman krɔnkrɔn” anaa “Nyankopɔn Israel” no.—1 Pet. 2:9; Gal. 6:16.

Jerusalem a ɔwɔ sor no sii dɛn ‘soɛree’ na ‘ɔhyerɛnee’? Ɔnam ne mba a wɔasera hɔn a nna wɔwɔ asaase yi do no do na ɔyɛɛ dɛm. Ma yɛmfa dza ɔtoo hɔn no ntoto nkɔnhyɛ a ɔwɔ Isaiah tsir 60 no ho nhwɛ.

Asomafo no hɔn wu ekyir no, awaafo dze hɔn ator nkyerɛkyerɛ no kataa nokwar nkyerɛkyerɛ do. Iyi maa Christianfo a wɔasera hɔn no kɔr sum mu. Dɛm ntsi, nna ɔsɛ dɛ ‘wɔsoɛr.’ (Matt. 13:​37-43) Dɛm aber no, wɔbɛyɛɛ Babylon Kɛse a ogyina hɔ ma ator som a wɔwɔ wiadze nyina no no nkowaa.  Hɔn a wɔasera hɔn no kɔr do yɛɛ nkowaa kesii “wiadze n’ewiei,” na afe 1914 na dɛm aber no hyɛɛ ase. (Matt. 13:​39, 40) Wɔannkyɛr biara na wɔdzee hɔnho fii nkowaasom mu wɔ 1919, na ntsɛmara na wɔtseew hɔnho guu asɛnka edwuma no mu. Dza wɔyɛe yi maa kan no hyerɛnee. b Mber rokɔ do no, nyimpa ahorow a wofifi amanaman nyina mu no baa kan no ho. Nyimpa binom a wɔka Nyankopɔn Israel ho no so ka ho bi. Wɔfrɛ dɛm nkorɔfo yi “ahemfo” wɔ Isaiah 60:3.—Nyi. 5:​9, 10.

Daakye, Christianfo a wɔasera hɔn no bɛma kan a ofi Jehovah hɔ no ahyerɛn kɛse paa. Wobesi dɛn ayɛ dɛm? Sɛ wowie hɔn som edwuma wɔ asaase yi do a, hɔn so bɔkɔ akɛyɛ “Jerusalem Fofor” no mufo. Anaa dɛ mbrɛ Bible no ka no, wɔbɔkɔ akɛka 144,000 a wɔnye Christ bɔbɔ mu ayɛ asɔfo na ahemfo no ho. Wɔsan so frɛ hɔn Christ n’ayefor.—Nyi. 14:1; 21:​1, 2, 24; 22:​3-5.

Jerusalem Fofor yi bedzi dwuma tsitsir bi ma nkɔnhyɛ a ɔwɔ Isaiah 60:1 no aaba mu. (Fa Isaiah 60:​1, 3, 5, 11, 19, 20 toto Nyikyerɛ 21:​2, 9-11, 22-26 ho.) Tsetse no, nna Jerusalem na Israel ahemfo no tsena dzi tum. Dɛmara so na Jerusalem Fofor no nye Christ befi sor edzi tum wɔ wiadze fofor no mu. Naaso Jerusalem Fofor no si dɛn ‘fi sor Nyankopɔn no nkyɛn sian’? Ɔno nye dɛ, wɔbɛyɛ ndzɛmba yie wɔ asaase yi do. Nyimpa a wosuro Nyankopɔn a wofi amanaman nyina mu no “bɛnantsew ne kan mu,” na wɔbɛgye hɔn efi bɔn na owu mu korakora. (Nyi. 21:​3, 4, 24) ‘Wobesiesie ndzɛmba nyina’ dɛ mbrɛ Isaiah nye nkɔnhyɛfo afofor hyɛɛ ho nkɔm no. (Andw. 3:21) Ofitsi aber a Christ bɛyɛɛ Ɔhen no na wɔhyɛɛ ase dɛ worisiesie ndzɛmba nyina, na ɔbɔkɔ do ara kesi dɛ ne Mfrenhyia Apem Tumdzi no bɛba n’ewiei.