Nyew. Siantsir ahorow a odzidzi do yi da no edzi dɛ yɛyɛ Christianfo:

• Yɛbɔ mbɔdzen dɛ yebedzi Jesus Christ ne nkyerɛkyerɛ nye ne ndzeyɛɛ no ekyir pɛɛ.​—1 Peter 2:21.

• Yɛgye dzi dɛ Jesus nye obi tsitsir a yɛnam no do benya nkwagye, na “dzin fofor biara nnyi wi yi ase a wɔdze ama wɔ nyimpa mu a otwar dɛ wɔgye hɛn nkwa wɔ mu.”​—Ndwuma 4:12.

• Sɛ nkorɔfo bɛyɛ Jehovah Adasefo a, wonuma hɔn wɔ Jesus dzin mu.​—Matthew 28:18, 19.

• Yɛbɔ hɛn mpaa wɔ Jesus dzin mu.​—John 15:16.

• Yɛgye dzi dɛ Jesus nye adasamba Tsir, anaa nyia wɔapaw no dɛ onnya tum wɔ nyimpa biara do.​—1 Corinthfo 11:3.

Naaso wɔ akwan pii do no, yɛyɛ soronko fi nyamesom ekuw ahorow a wɔfrɛ hɔn Christianfo no ho. Dɛ nhwɛdo no, yɛgye dzi dɛ Bible no kyerɛkyerɛ dɛ Jesus yɛ Nyankopɔn Ba, na ɔnnkã Baasakor biara ho. (Mark 12:29) Yɛgye dzi dɛ ɔkra wu, na dɛ biribiara nnyi Kyerɛwnsɛm no mu a ɔkyerɛ dɛ Nyankopɔn yɛ nyimpa ayakayakadze wɔ hellgya mu afebɔɔ. Na yɛnngye nndzi dɛ ɔsɛ dɛ hɔn a wodzi enyim wɔ nyamesom mu no nya abɔdzin ahorow bi a ɔma wɔkrɔn sen afofor.​—Ɔsɛnkafo 9:5; Ezekiel 18:4; Matthew 23:8-10.