1 Pierre 2:1-25
2 Nde, jôka’ané mbia mboon ase, medu’an, minleme mibaé, minyamete a minso’o mise.
2 Aval ane mintyene mi bon, yeka’ané wôk évé* menyañe me nji bo mfulan a jôm éziñe ya mejô me Zambe, ndemben a zen éte, mi ne yaé a bi nkôtan,
3 amu mi tye’eya* na Tate a ne mbamba môt.
4 Nté mia subu be nye, vevee ako’o bôte be nga wua fé, ve a too di é nga toban a di é ne dia e mise me Zambe,
5 mia fe, aval ane bevevee mekok, mia lôñebane nda ya nsisime na mi bo ésaé prêtre é ne étyi, ndemben a zene ya Yésus Krist, mi ve mimveane ya nsisime Zambe a yene mvaé.
6 Amu é ne njôan éfuse ya Mintilane na: “Tama yenan! Ma bôé akok é ne ntoban e Sion, mbôka’a ako’o ya jua é ne édima, a nyu a liti mbunan akok éte a ye ke same* môs éziñ.”
7 Akok éte, é ne dia mfa’a wônan amu mi ne bebuni, ve asu ba be nji bo bebuni, “ako’o belôñe menda be nga ben, akok éte nde é nga su’ulane bo nlô ako’o ya jua”*
8 a “ako’o bôte ba kolé ôbak a beta akok a kpwé bôte si.” Amu be nga bo mejô me Zambe melo, a teléban amu jam éte.
9 Ve mi ne “mvoñe bôt é ne ntoban, beprêtre be ne bejô bôt, ayoñ é ne étyi, bôte Zambe a bili asu dé émiene na, ba yiane kañete bôte ya mesi me ne ôyap bitôto’o bi mame”* ya Nyu a nga loone mia na mi kôlô dibi été, a zu beta éfufube wé été.
10 Ôsusua, mi nji be ayoñe bôt, ve éyoñe ji, mi ntoo ayoñe bôte Zambe; ôsusua, be nji be be mvama’ane mia, ve éyoñe ji, be nga mvamane mia.
11 A bôte ma nye’e, ma jô mia, mia mi ne beyeñ a mintabe na mi ke ôsu a tyi minkômbane ya minsôn, mmie mite mia wosane mia.*
12 Ba’alané mbamba ntabane wônan ézezañe meyoñ, ndemben, éyoñe ba bôte mia ajô na mi ne mbia be bôt, be ne yen a mise map, mbamba be mame mia bo a su’ulane ve Zambe duma, éyoñ a ye zu tyi’i bôte mejô.
13 Amu Tate, sila’ané miabebiene si éjôé môta binam ase, nge be njô bôt ane nyu a dañe wo,
14 nge be bengovina, mbe a nga lôme mfa’a ya foñesô bôte ba bo mbia be mam, a se’e ba ba bo mbamba be mam.
15 Amu nkômbane Zambe ô ne na, mi bo mvaé, ndembene mi ne dibe* menyu me bôte be ne mekut, ba kobô mia abé amu ndimane wop.
16 Bo’ané ane bôte be ne fili, mi bela’ane fili jenan, sa ke ane ébuta’a* ya mbia be mam, ve ane alo Zambe.
17 Sema’ané kane bôt ése, nyeka’ané bobejañe bese ya nsisim,* kooné Zambe woñ, semané njô bôt.
18 Bebo bisaé be sili’i bebiene si éjôé bemasa bap a woñ ôse wo yiane be, sa ke ve ba be ne mbamba fulu a ba ba kañese asimesane bôte befe, ve to’o ba be nji bo tyi’ibi ya nyiñ a be.
19 Amu é ne mvaé éyoñe môt a jibi meve’ele,* nge jibi minjuk ékotekot été, amu a kômbô ba’ale mone môte ya nleme wé mvo’é mise me Zambe.
20 Amu mfi ôvé ô ne na mi wu ébôm a jibi je, amu mia te bo abé? Ve nge mia jibi minjuk amu mia bo mvaé, dili éte é ne mvaé e mise me Zambe.
21 Amu, jame di nde ñhe mi nga loobane de, amu Krist fe a nga jibi mintaé ajô denan, a li’i mia éve’ela, nje éte mia yiane tôñe bibô’a mebo bié.
22 A nji bo nsem éziñ, a be nji koone medu’ane méziñ anyu dé.
23 Éyoñe be nga ta nye,* a nji bulane meta* mete, éyoñ a nga tôbane minjuk, a nji si’ili bôt, ve a nga futi ndi jé ése be Nyu a tyi’i mejô zôsô.
24 Émien a nga be’e minseme miangane nyule jé élé yôp, ndembene bi wu mfa’a ya* minsem a nyiñ amu zôsô. “A zene ya meveñe mé, mi nga mane bo mvo’é.”
25 Amu mi mbe ane mintômba mi nga yale fé, ve éyoñe ji, mi bulaneya be mba’ale a ntebele ya binyiñe bienan.*
Notes
^ Nge ke, “yi.”
^ Nge ke, “yemelaneya.”
^ Nkobô Grec, “woban ôson.”
^ Nkobô Grec, “nlô ako’o ya aku’u nda.”
^ Nalé a tinane na, mefulu mé a mam a bo ma bo na bôte be ve nye duma a ékaña’a.
^ Éfia Grec, psukhê. Lañe’e Atinane bifia, “Ényiñ.”
^ Nkobô Grec, “ka’ate.”
^ Nge ke, “atyebe.”
^ Nkobô Grec, “bobejañe ya si ése.”
^ Nge ke, “mintaé; ôsame.”
^ Nge ke, “jô nye mbia mejô.”
^ Nge ke, “jô mbia mejô.”
^ Nge ke, “mane a.”
^ Éfia Grec, psukhê. Lañe’e Atinane bifia, “Ényiñ.”