Kaat Matéô 6:1-34
6 “Yoña yihe le ni bana bañ lem i boñ mam ma téé sép i bisu bi bôt le ndi ba yimbe bé;+ ibale hala, n’a kôhna bé bibom gwo ki gwo yak Isoñ nan nu a yé i ngii.
2 Jon i ngéda u nti makébla ma konangoo,* u bôk ndugi bañ hem sép kiki bôt ba bihéñba ba mboñ ikété mandap ma bibégés ni i minloñ, inyu boñ le ba kôhna lipém li bôt ba binam. Me nkal bé maliga le, ba mal kôhna bibom gwap gwobisôna.
3 Ndi we, i ngéda u nti makébla ma konangoo, u nwas bañ le woo woñ waé u yi jam woo woñ walôm u yé boñ,
4 inyu boñ le makébla moñ ma konangoo ma tina bañ i mbamba.* Ha nyen, Isoñ nu a ntehe mam ma sôli* a’ sayap we.+
5 “Nlélém jam ki, i ngéda ni nsoohe, ni boñ bañ kiki bôt ba bihéñba,+ inyule ba ngwés ba nsoohe bitétéé i mandap ma bibégés ni i makanda ma minloñ minkeñi le bôt ba tehe bo.+ Me nkal bé maliga le, ba mal kôhna bibom gwap gwobisôna.
6 Ndi we ibale u nsoohe, jôp ikété tuñ yoñ. I ngéda u mal kwés likôga, soohe Isoñ nu u ntehe bé.*+ Ha nyen, Isoñ nu a ntehe mam ma sôli a’ sayap we.
7 I ngéda ni nsoohe, ni tiimba bañ pot minlélém mi mam, tiimba ni tiimba, kiki bôt ba matén ba mboñ, inyule ba nhoñol le b’a emble bo mu kiki ba mbulus bibuk.
8 Jon ni ba bañ kiki bo, inyule Isoñ nan a nyi mam ma yé bé nseñ+ ilole ni mbat nye mo.
9 “Jon haana nyen ni nlama soohe:+
“‘A Tata wés nu a yé i ngii, jôl joñ+ li tééba lipubi.*+
10 Ane yoñ+ i loo. Sômbôl yoñ+ i bôña hana ’isi,+ kiki i ngii.
11 Ti bés koga yés len inyu hilo hini;+
12 nwéhél ki bés bibéba gwés,* kiki yak bés di nwéhél i bôt ba mboñ bés béba.+
13 U nwas bañ le di kwo ikété manoodana,*+ ndi tohol* bés i moo ma mut mbe.’+
14 “Ibale ni nwéhél bôt mahôha map, yak Isoñ nan nu a yé i ngii a’ nwéhél bé;+
15 ndi ibale ni nwéhél bé bôt mahôha map, to Isoñ nan a’ nwéhél bé bé mahôha manan.+
16 “I ngéda ni nsôga je,*+ ni waa modop kiki bôt ba bihéñba, inyule ba nkañ masu* inyu boñ le bôt ba tehe le ba nsôga je.+ Me nkal bé maliga le, ba mal kôhna bibom gwap gwobisôna.
17 Ndi we, i ngéda u nsôga je, hoo môô mu ño woñ, u jôwa ki su woñ,
18 inyu boñ le sôga yoñ je i ba bañ le bôt ba tehe we, ndi ndik inyu Isoñ nu u ntehe bé.* Ha nyen, Isoñ nu a ntehe mam ma sôli a’ sayap we.
19 “Ni waa téédana bébomede nkus hana ’isi,+ i homa masek* ni mañglét bi nje, yak homa bôt ba wip ba mbôk inyu nip.
20 Ndi téédana bébomede nkus i ngii,+ i homa masek to mañglét bi nje bé,+ i homa to bôt ba wip ba mbôk bé inyu nip.
21 Inyule i homa nkus woñ u yé, nyoo nyen yak ñem woñ w’a ba.
22 “Jis li yé lambe i nyuu.+ Jon ibale jis joñ li mbéñge ndigi loñge jam,* nyuu yoñ yosôna y’a bai.*
23 Ndi ibale jis joñ li mbéñge béba jam,*+ nyuu yoñ yosôna y’a ba jiibe. Ibale mapubi ma yé ikété yoñ ma yé toi jiibe, wee jiibe lini li yé toi likeñi!
24 “Mut nye ki nye a nla bé ba nkol u bet iba; inyule a’ oo ndigi wada, a gwés nuu numpe;+ tole a’ adbe wada, a yan nuu numpe. Ni nla bé ba minkol mi Nyambe ni mi Lingwañ.+
25 “Inyu hala nyen me nkal bé le: Ni waa tôñ+ inyu biniñ* binan, inyu yom n’a je tole inyu yom n’a nyo, tole inyu manyuu manan le kii n’a haba.+ Baa niñ* i gwé bé mahee iloo bijek, yak nyuu iloo mambot?+
26 Tiblana béñge dinuni di ngii,+ di nwes bé mbôô to bumbul, to kot bijek ikété mandugi,* ndi Isoñ nan nu a yé i ngii a njés tjo. Baa ni gwé bé mahee iloo tjo?
27 Njee ikété nan a nla kônde to linut* jada mu niñ yé inyule a ntôñ?+
28 Inyuki ni ntôñ inyu mambot? Ni ôt biniigana mu mbônji i bikai, ni béñge kiki i nañ; i ntumbba bé ni nson, i mbañ bé to bôñgô;*
29 ndi me nkal bé le, to Salômô+ ikété lipém jé jolisôna, a bi haba bé loñge kiki mbônji yada mu.
30 Jon, ibale hala nyen Nyambe a nlémés mbônji i bikai, i i yé ha len, ndi yani i léña ikété juu, baa a ga eñg bé bé iloo hala, a bé bôt ba hémle ititigi?
31 Jon kekikel ni tôñ bañ,+ to kal le: ‘D’a je kii?’ tole: ‘D’a nyo kii?’ tole: ‘D’a haba kii?’+
32 Inyule i mam mana momasôna mon bôt ba matén ba nyéñ ni nwai. Ngo Isoñ nan nu ngii a nyi le ni gwé ngôñ ni mam mana momasôna.
33 “Jon kena ni bisu i yéñ ndugi Ane lôñni telepsép i Nyambe, ndi yak mana mam mape momasôna m’a kôndba bé.+
34 Jon kekikel ni tôñ bañ inyu yani,+ inyule yani a’ bana yé nduña. Hiki kel i gwé yé yé nduña.
Ndoñi
^ Béñge Ndoñi bibuk.
^ Tole “ma tina i nditi.”
^ Tole “mam ma yé i nditi.”
^ Tole “nu a yé i nditi.”
^ Tole “li pubhana; li yôña kiki jam lipubi.”
^ Ni hop Grikia, “nwéhél bés mapil més.”
^ Ni hop Grikia, “u jubus bañ bés ikété manoodana.”
^ Tole “sôñ.”
^ Tole “ba nyôiba.”
^ Tole “ni nkôôba yén njal.”
^ Tole “nu a yé i nditi.”
^ Buk i hop Grikia ba ngwélél hana i mpôdôl ntén tandi u u mpuue, u jek mabadô.
^ Tole “li yé mbôô.” Ni hop Grikia, “li ta bé nkabak.”
^ Tole “y’a ba nyonok ni mapubi.”
^ Tole “li nkon.” Ni hop Grikia, “li yé béba; li yé libe.”
^ Tole “nom.”
^ Tole “nom.”
^ Hala wee, mandap i het ba ntéédana bijek.
^ Ni hop Grikia, “hikéñéé hi woo.” Béñge Ndoñi bibuk.
^ Tole “hios dikôô.”
