Kaat Matéô 2:1-23
2 I mbus ligwéé li Yésu i Bétléhém+ i Yudéa, i dilo di Kiñe Hérôdé,*+ nuna-ki, bayitjôdôt* ba bi lôl i pes likôl, ba pam i Yérusalem,
2 ba bat le: “Nu a ngwéé kiñe Lôk Yuda a yé hee?+ Inyule di ntehe hiôdôt hié i ngéda di bak i likôl, jon di nlo le di ti nye lipém.”*
3 I ngéda ba bi nok hala, Kiñe Hérôdé ni bôt ba Yérusalem bobasôna ba kon woñi.
4 Ha nyen Kiñe Hérôdé a kot baéga biprisi bobasôna ni bayimbén ba litén bobasôna, a bat bo hee Kristô* a nlama gwééne.
5 Ba kal nye le: “I Bétléhém+ nu Yudéa, inyule haana nyen mpôdôl a tila:
6 ‘We, a Bétléhém nu nkoñ u Yuda, bangomin ba bipes bi mbok Yuda ba nlama bé yoñ we kiki tison i nlôôha ntitigi, inyule i weeni nyen ñane a’ pémél, nu a’ ba ntééda litén jem Israel.’”+
7 Ha nyen Hérôdé a sébél bayitjôdôt bisôsôli, a tibil yaga bat bo imbe ngéda ba bi tehe hiôdôt.
8 I ngéda a bé ep bo i Bétléhém, a kal bo le: “Kena, ni tibil yaga yéñ hisiina mañge, ibale ni ntehe nye, lona ni kal me inyu boñ le yak me, me kee me ti nye lipém.”
9 I ngéda ba bi mal emble kiñe, ba yoñ njel, ndi nuna-ki, hiôdôt ba bi tehe i ngéda ba bé i likôl,+ hi bôk bo i bisu letee hi ke hi telep i ngii homa hisiina mañge hi bé.
10 Kiki ba ntehe hiôdôt, ba kon maséé iloo hihéga.
11 I ngéda ba bi jôp ikété ndap, ba tehe hisiina mañge bo nyañ le Maria, ha nyen ba ôm maboñ ’isi, ba ti nye lipém.* Ba yoñ ki gôl ni binunumba, ôlibañ ni mire, ikété nkus wap, ba ti nye gwo kiki likébla.
12 Ndi kiki ba bi kôhna mabéhna ma Nyambe ikété eem+ le ba témb ha bañ yak Hérôdé, ba yoñ njel ipe inyu témb i loñ yap.
13 Kiki ba ntémb, nuna-ki, añgel i Yéhôva* i pémél Yôsep ikété eem,+ i kal nye le: “Telep, yoñ hisiina mañge bo nyañ, kee ngwéé i Égiptô, yén ki nyoo letee me kal we le u nyodi inyule ndék ngéda, Hérôdé a’ yéñ hisiina mañge inyu nol nye.”
14 Ha nyen Yôsep a telep i nlélém u, a yoñ hisiina mañge bo nyañ, a ke i Égiptô.
15 A yén ki nyoo letee Hérôdé a wo. Hala a bi yônôs i jam Yéhôva* a pot ni njel mpôdôl wé i ngéda a kal le: “Me bi sébél man wem le a nyodi i Égiptô.”+
16 I ngéda Hérôdé a bi tehe le bayitjôdôt ba nlôk nye, a jôp ikété hiun hikeñi, a ep bôt le ba nol bon bôlôm bobasôna ba Bétléhém ni pes mbok yé yosôna, ibôdôl i nwii ima i sôhôk isi, inoñnaga ni ngéda bayitjôdôt+ ba bi yigye nye le ba bi tehe hiôdôt.
17 Hala a yônôs i jam li bi pôda ni njel mpôdôl Yérémia nu a kal le:
18 “Kiñ i nôga i Rama, maéya ni ngandak minlénd. Rahel+ nyen a ñee bon bé, a ngwés bé to le ba mômôs nye, inyule ba ta ha bé.”+
19 I ngéda Hérôdé a bi wo, nuna-ki, añgel i Yéhôva* i pémél Yôsep i eem+ nyoo i Égiptô,
20 i kal nye le: “Telep, yoñ hisiina mañge bo nyañ, u kena bo i loñ Israel inyule i bet ba yéñék nol* hisiina mañge ba nwo.”
21 Ha nyen a telep, a yoñ hisiina mañge bo nyañ, a jôp i loñ Israel.
22 Ndi i ngéda a bi nok le Arkélaô a nyoñ tel i isañ, a yila kiñe Yudéa, a kon woñi i ke nyoo. Ndi a ke i nkoñ u Galiléa,+ inyule a bi kôhna mabéhna ma Nyambe ikété eem.+
23 A yééne i tison ba nsébél le Nasaret,+ inyu yônôs bini bibuk bi bapôdôl: “B’a sébél nye le mut Nasaret.”+
Ndoñi
^ Béñge Ndoñi bibuk.
^ Bôt ba nwan tjôdôt inyu bo ngambi ni inyu yi mam m’a tagbe i dilo di nlo.
^ Tole “di ôôp i bisu gwé.”
^ Tole “Mésia; Nhook.”
^ Tole “ôôp i bisu gwé.”
^ Béñge Ndoñi bibuk.
^ Béñge Ndoñi bibuk.
^ Béñge Ndoñi bibuk.
^ Tole “tjé niñ.” Béñge Ndoñi bibuk.
