Kaat Matéô 28:1-20
28 I mbus sabat, i maye ma kel, i hilo hi bisu hi sonde, Maria Magdaléna ni nunu Maria numpe ba lo i béñge soñ.+
2 Ndi nuna-ki, hisi hi bi nyeñg ngandak inyule añgel i Yéhôva* i bi lôl i ngii, i ke, i biiñgaha ngok inyu yibil soñ; i mbus, i yén mu ngii.+
3 Añgel i bé bai kiki nwegnwek, yak mbot yé i bé pôp kiki libu li lisuni.*+
4 Ñ, batat ba bé kon nye woñi ngandak, ba sehlaga, ba yila kiki minwok mi bôt.
5 Ndi añgel i kal bôda le: “Ni kon bañ woñi, inyule me nyi le ni nyéñ Yésu nu ba bi nol i kék.+
6 A ta bé hana inyule a ntuge, ndik kiki a bi kal.+ Lona, béñgnana homa mim wé u bak u niñi.
7 Ndi ni pala ke, ni kal banigil bé le a ntuge ikété bawoga, ndi nuna-ki, a mbôk bé i bisu i Galiléa,+ nyoo nyen n’a tehe nye. Ni hôya bañ i jam me nkal bé.” +
8 Jon ba bi pala nyodi i soñ, ba konok woñi ndi ba bak maséé, ba ke ngwéé inyu añle banigil jam li.+
9 Ndi nuna-ki, Yésu a boma bo, a kal le: “Me nyéga bé!” Kiki ba nkôôge nye bebee, ba ôm maboñ i bisu gwé, ba kabda nye mu makôô mé, ba ti ki nye lipém.*
10 Ha nyen Yésu a bi kal bo le: “Ni kon bañ woñi! Kena, leglana lôktata nwin le ba ke i Galiléa, nyoo nyen d’a tehna.”
11 Kiki bôda bana ba bé ke, bahogi ikété bisônda+ bi bi bé tat soñ ba ke, ba jôp i tison, ba añle baéga biprisi mam momasôna ma bi tagbe.
12 I ngéda baéga biprisi lôñni mimañ mi litén ba bi mal hek pék lôñ, ba ti bisônda ngandak batjañtjañ ba silba,
13 ba kal le: “Kala le: ‘Banigil bé ba bi lo ni juu, ba nip mim wé ngéda di bé ke ’ilo.’+
14 Ndi ibale jam lini li mpam i maôô ma ngomin i pes mbok, ni tôñ bañ, d’a kwélés nye.”*
15 Jon ba bi yoñ batjañtjañ ba silba, ba boñ yaga kiki ba bi kal bo; hala nyen ñañ unu u bi tjama ipôla Lôk Yuda letee ni len.
16 Ndi 11 banigil li ke i Galiléa,+ nyoo hikôa i het Yésu a bi kal bo le ba nlama bomna.+
17 I ngéda ba bi tehe nye, ba ti nye lipém,* ndi bape ba bé pééna.
18 Yésu a kôôge bebee, a pôdôs bo, a kal le: “Me nkôhna kunde yosôna i ngii ni ’isi.+
19 Jon kena, ni yilha bôt ba biloñ gwobisôna+ banigil, ni sôblege bo+ i jôl li Tata, ni li Man, ni li mbuu mpubi,
20 ni niigaga bo i nôgôl mam momasôna me bi ti bé oda le ni boñ.+ Ndi nuna-ki, me yé ni bé dilo tjodisôna letee ni mamélél ma nkoñ ’isi.”*+
Ndoñi
^ Béñge Ndoñi bibuk.
^ Jon ba nsébél ni hop Pulasi le neige.
^ Tole “ba ôôp i bisu gwé.”
^ Tole “d’a kwés nye nkaa.”
^ Tole “ba ôôp i bisu gwé.”
^ Tole “mamélél ma hiai hini.” Béñge Ndoñi bibuk.
