Mayj mayja uywatäpjjatap layku ukat jan kikpa amuyunïpjjatap laykuw awisajj chacha warmejj jan waltʼayasipjjaspa. Maysa toqetjja, mä akatjamatwa kuna chhijis utjaspa, jan ukajj yaqha ukham jan waltʼäwinakaw utjarakispa.

Chachapampi jan ukajj warmipamp jan waltʼayasisajja, janis kunas paskaspa ukhamakwa maynejj uñjañ munaspa. Ukampis ukanak askichañatakiw Bibliajj ewjjtʼistu (Mateo 5:23, 24). Uka ewjjtʼanakarjam sarnaqasaw jan waltʼäwinakam sum askichapjjasma.

BIBLIAJJ KAMSISA: ‘Taqe kunas horasanikiwa, parlañ horasas utjarakiwa’ (Eclesiastés 3:1, 7). Jan waltʼäwit parlañatakiw tiempo apstʼasiñama. Kunjamsa jikjjatasta ukat kunsa jan waltʼäwit amuyta uk jan kʼarisisaw chachamaru jan ukajj warmimar qhan yatiyañama (Efesios 4:25). Colerat jikjjataskasasa janiw toqesiñamäkiti. Kunjamtï Bibliajj siskejja, ‘suma arunakamp’ parlañajj utjki ukhajja, ‘chʼajjwañanakajj tukusjjewa’ (Proverbios 15:4; 26:20).

Awisajj kuntï chachamasa jan ukajj warmimas amuyki ukajj janiw jumatakejj askïkaspati, ukhampachasa munasiñampi ukat respetompiw jupar uñjañama (Colosenses 4:6). Jan waltʼäw jankʼak askichañatakiw chʼamachasipjjañama ukat parlasiñsa janiw jaytapjjañamäkiti (Efesios 4:26).

KUNSA LURASMA:

• Kunapachas jan waltʼäwit parlapjjasma ukwa sum amuytʼasiñama

• Chachaman jan ukajj warmiman parlañ tukuyañapwa suytʼañama, ukatwa jumajj parlasma

BIBLIAJJ KAMSISA: ‘Maynit maynikamaw munasipjjañama, purapat jachʼar aptasiñanjja nayrankapjjañamawa’ (Romanos 12:10, NM). Chachamasa jan ukajj warmimasa kunsa amuyi uk amuytʼañataki ukat sum istʼañatakiw chʼamachasiñama, uksti ‘jilapurjam munasisa, llampʼu chuymampiw’ lurañama (1 Pedro 3:8; Santiago 1:19). Janiw istʼir istʼir tukuñamäkiti, jan ukasti lurañanakam jaytasaw jupar sum istʼañama. Jan ukajj “qhepatwa parltʼasiñäni” sasaw munasiñamp sarakisma. Juparojj janiw juma conträkaspas ukham uñjañamäkiti, ukaw jan jankʼak colerasiñatak yanaptʼätam (Eclesiastés 7:9).

KUNSA LURASMA:

• Janis jumatak waljamäkchejja, kuntï chachamasa jan ukajj warmimas siski uk sum istʼañamawa

• Arunakapampejj kun sañsa munaski ukwa sum amuytʼañama, ukjja uñnaqapana ukat parlatapanwa amuyasma

BIBLIAJJ KAMSISA: “Taqe chʼama tukutat jilpacha katoqañajj utji, ukampis [‘inamay parlañansti’, NM] pobrernukstañakiw utji” (Proverbios 14:23). Janiw kunsa lurapjjäta uk amtañak wakiskiti, jan ukasti ukarjam lurañatakiw chʼamachasipjjañama. Ukham chʼamachasiñajj janiw inamayäkaniti (Proverbios 10:4). Kunjamtï Bibliajj siskejja, mayachtʼata kuns lurapjjäta ukhaw jukʼamp luratajj utjani (Eclesiastés 4:9).

KUNSA LURASMA:

• Jan waltʼäw askichañatakejj kunsa sapa maynejj lurapjjasma ukwa amuytʼañama

• Nayrat sipansa, kunjamsa jichhajj jakasipjjta uka toqetwa lupʼiñama