Proverbios 10:1-32
10 Salomón chachan yatiñamp arsut arunakapa.+
Yatiñan wawajja awkiparojj kusisiyiwa,+ukampis jan amuytʼasir wawajja taykaparojj llakisiyiwa.
2 Engañjasin jikjjatat yänakajja* janiw kunatakis sirvkaniti,ukampis cheqapar lurañaw jiwañat salvi.+
3 Jehová Diosajj janiw cheqap sarnaqer jaqerojj jan manqʼatajj sarnaqaykaniti,+ukampis jan wali jaqenakarojja kuntï wal munapki uk janiw churkaniti.
4 Jayra amparanakajj pisin jakasiñwa apanini,+ukampis wali trabajir amparanakajj qamirïñwa apanini.+
5 Yatiñampi sarnaqer wawajja cosecha tiemponwa cosecha apthapi,ukampis mä phenqʼa sarnaqer wawajja cosecha tiempon wal iktʼasi.+
6 Cheqap sarnaqer jaqejj bendicionanakwa katoqani,+ukampis jan wali jaqen chuymapanjja nuwasiñ munañaw utji, ukanak imtʼañatakejj mojjsa arunakwa jupajj parli.
7 Cheqap sarnaqer jaqejja janiw armatäkaniti, bendisitarakïniwa,+ukampis jan wali jaqen sutipajj ñusantaniwa.+
8 Khititï yatiñan chuymanïki ukajja instruccionanakjja* katoqasiniwa,+ukampis khititï jan amuytʼasis parlki ukajja takichataw uñjasini.+
9 Khititï taqpach chuymampi servisa sarnaqki ukajja jan ajjsarasaw sarnaqani,+ukampis khititï thakinakap qʼewinukki ukajja katjayasiniwa.+
10 Khititï jan wali amtampi nayrap chʼirmtʼki ukajja tʼaqesiñanakwa utjayi,+khititï jan amuytʼasis parlki ukajja takichataw uñjasini.+
11 Cheqap sarnaqer jaqen lakapajja jakañ chuririwa,+ukampis jan wali jaqen chuymapanjja nuwasiñ munañaw utji, ukanak imtʼañatakejj mojjsa arunakwa jupajj parli.+
12 Uñisiñajja chʼajjwañanakwa utjayi,ukampis munasiñajja taqe juchanakwa imjjati.+
13 Yatiñajja amuytʼasir jaqen lakapanwa jikjjatasi,+ukampis lawajja jan amuytʼasir jaqen jikhanipatakiwa.+
14 Yatiñan jaqenakajja uñtʼañwa imkatapjje,+ukampis jan amuytʼasir jaqen lakapajj tukjañwa apani.+
15 Qamir jaqen utjirinakapajja* jupatakejj jachʼa perqanakamp muytayat markapawa.
Pobre jaqejja pobrëtap laykojj jan waltʼäwinwa uñjasi.+
16 Cheqap sarnaqer jaqen luratapajj jakañaruw api,ukampis jan wali jaqen luratapajja jucharuw api.+
17 Khititï cheqañchäwit katjjaruski ukajja jakañ thakiruw mayninakar irpi,*ukampis khititï cheqañchäwi jan katoqaski ukajja jan wali thakiruw mayninakar irpi.
18 Khititï uñisiñap imtʼki ukajja kʼarinakwa parli,+khititï jan walinak yaqhanakar parlaski ukajja jan amuytʼasir jaqewa.
19 Walja arunak parlañanjja pantjasiñajj utjakipuniwa,+ukampis khititï lakap controlaski ukajja amuytʼasisaw kuns luri.+
20 Cheqap sarnaqer jaqen lajjrapajja wali suma qollqer uñtasitawa,+ukampis jan wali jaqen chuymapajj jukʼa valoranikiwa.
21 Cheqap sarnaqer jaqen arunakapajj waljaniruw cheqap thaknam irpi,+ukampis jan amuytʼasir jaqenakajj jan amuytʼasirïpjjatap laykuw jiwapjje.+
22 Jehová Diosan bendicionapampiw maynejj qamiripti,+ukamp chikajj janiw kuna llakisiñsa* jupajj apankiti.
23 Jan amuytʼasir mä jaqetakejja jan phenqʼani jan walinak lurañajj anatasiñäkaspas ukhamakiwa,ukampis yatiñajj amuytʼasir jaqetakiwa.+
24 Jan wali jaqerojja kunarutï jupajj ajjsarki ukaw jaljjattani,ukampis cheqap sarnaqer jaqerojja kuntï jupajj munki ukajj churatäniwa.+
25 Kunapachatï jachʼa thayajj paskani ukhajja, jan wali jaqejj janiw utj-jjaniti,+ukampis cheqap sarnaqer jaqejja wiñay aguantir cimientor uñtasitawa.+
26 Mä jayra jaqejja patronapatakejjlaka chʼakhanak kʼallkʼurayir vinagrer uñtasitawa, nayranak chʼisiyir jewqʼer uñtasitarakiwa.
27 Jehová Diosar ajjsarañajj jakañwa jiljjattayi,+ukampis jan wali jaqen maranakapajj jukʼaptayatäniwa.+
28 Kuntï cheqap sarnaqer jaqejj suyki ukajj kusisiñwa apani,+ukampis kuntï jan wali sarnaqer jaqejj suyki ukajj ina chʼusaruw tukusini.+
29 Jan juchani jaqetakejja Jehová Diosan thakipajj mä imantasiñawa,+ukampis jan walinak lurir jaqenakarojja ukajj jan waliruw purtʼasiyi.+
30 Cheqap sarnaqer jaqenakajja janipuniw tinkuyatäpkaniti,+ukampis jan wali jaqenakajja janiw jukʼampejj oraqen jakjjapjjaniti.+
31 Cheqap sarnaqer jaqen lakapatjja yatiñan arunakaw mistu,ukampis jan walinak parlir lakajja wiñayatak amuktʼayatäniwa.
32 Cheqap sarnaqer jaqen lakapajja kunatï sumäki ukwa parli,ukampis jan wali jaqen lakapajja kunatï jan walïki ukwa parli.
Notanaka
^ Jan ukajja, “cosasanakajja”.
^ Hebreo arunjja, “mandamientonakjja”.
^ Jan ukajja, “wali valoran cosasanakapajja”.
^ Ukajja, “jakañar apir thakinkiwa” sasaw jaqokipasirakispa.
^ Jan ukajja, “kuna jan waltʼäwsa”.
