Jehová Diosajj familia uttʼaykäna ukhajja, awk taykaruw wawanakar uywapjjañapatak jaytäna (Colosenses 3:20). Ukhamasti, Jehová Diosar munasiñapatakisa suma amuytʼasiri jaqer tukuñapatakisa, jumaw wawamar yatichañama (2 Timoteo 1:5; 3:15). Ukat chuymapan kunas utji uk yatiñatakisa chʼamachasiñamarakiwa. Cheqansa, luratanakamampiw wawar jukʼamp sum yatichasma. Ukhamajj jumaw nayraqat Diosan Arup chuymamar katoqañama, ukatwa wawar yaticharakïta (Salmo 40:8).

BIBLIAJJ KAMSISA: ‘Jankʼakïpjjañamawa istʼañataki, ukampis janiw jankʼaki kunsa parlapjjañamäkiti’ (Santiago 1:19). Wawanakapajj jan ajjsarasa jupanakamp parltʼasipjjaspa ukwa awk taykanakajj munapjje. Ukatakejja, awk taykaw wawapar istʼañ munapjjatap uñachtʼayapjjañapa. Ukat familian sum jakasiñ utjañapatakisa, jupanakaw yanaptʼapjjañaparaki (Santiago 3:18). “Awk taykajajj toqepjjetaniwa” sasin wawamajj amuyaspa ukhajja, janiw jumamp taqe chuym parlañ munkaspati. Ukhamajj pacienciampiw wawamar uñjañama ukat qawqsa jupar munasta uksa yatiyañamarakiwa (Mateo 3:17; 1 Corintios 8:1).

KUNSA LURASMA:

• Wawamajj jumamp parltʼasiñ munani ukhajj istʼañamawa

• Janiw jan walinak utjki ukhakejj wawamamp parlañamäkiti, jan ukasti sapa kutiw jupamp parltʼasiñama

BIBLIAJJ KAMSISA: “Khititejj chʼikhi kankaña jikjjatki ukajja, kusisiñwa jikjjati” (Proverbios 16:20). Wawamajj kunsa arunakapampejj sañ munaski uk sum amuytʼañamawa. Awisajja, wayn tawaqonakajj jilamp jilampiw parlapjje ukat kunjamsa jikjjatasipjje uk janiw arsuñ munapkiti. “Maynin arunakapa jan sum istʼkasina arsuñajja, jan amuytʼanïña[wa]” (Proverbios 18:13). Ukhamajj wawamar istʼkasajja, janiw jankʼak colerañamäkiti (Proverbios 19:11).

KUNSA LURASMA:

• Wawamar istʼkasajja janiw jankʼak colerasiñamäkiti ukat parlañ tukuyañapwa suyañama

• Waynäkasasa jan ukajj tawaqökasasa kunjamsa jikjjatasiyäta ukat kunsa munayäta ukwa amtañama

BIBLIAJJ KAMSISA: “Wawajjay, istʼam awkimana yatichäwinakapa, janikiy taykaman yatichäwinakapjja jiskʼachamti” (Proverbios 1:8). Jehová Diosajj awk taykaruw wawanak uywapjjañapatak jaytawayi. Ukhamajj panpachaniw wawarojj respetasirïña ukat istʼasirïñ yatichapjjañapa (Efesios 6:1-3). Kunapachatï awk taykajj mä amtar jan puripki ukhajja, wawajj uk amuyiwa (1 Corintios 1:10). Ukat jupan uñjkat toqesipjjaspa ukhajja, janiw wawajj jupanakar respetomp uñj-jjaspati.

KUNSA LURASMA:

• Kunjamsa wawar cheqañchapjjäta uk paniniw amtapjjañama

• Kunjamsa wawar yatichapjjäta uka toqet mayj mayja amuyapjjsta ukhajja, kunatsa chachamasa jan ukajj warmimas ukham amuyi uk amuyañatakiw chʼamachasiñama

BIBLIAJJ KAMSISA: ‘Wawarojj sum sarnaqañapatak sum yaticham’ (Proverbios 22:6). “Jupapachpaw yateqaskani” sañamajj janiw walïkaspati. Wawamar sum yatichañatakejja, kunsa luräta ukat kunjamsa cheqañchäta uk sum amuytʼasiñamawa (Salmo 127:4; Proverbios 29:17). Wawar cheqañchañajj janiw castigañakïkiti, jan ukasti kunatsa awk taykar istʼañajj wakisi ukwa amuytʼayañama (Proverbios 28:7). Jehová Diosan Arupar munasiñapataki ukat yatichäwinakap amuytʼañapatakiw yanaptʼañamaraki (Salmo 1:2). Ukhamatwa kunatï walïki jan walïkaraki uk amuytʼasiñ yateqani (Hebreos 5:14).

KUNSA LURASMA:

• “Diosajj utjaskapuniwa ukat Juparojj confiyasismawa” sasaw wawamar yatichañama

• Kunanakas jan walinak lurañar apaspa uk amuytʼasiñapatakiw wawamar yanaptʼañama. Sañäni, redes sociales ukat Internet satäkis ukanakata. Ukat jan wali jaqenakat amuyasiñapatakiw yanaptʼañamaraki