Proverbios 24:1-34
24 Jan wali jaqenakatjja jan envidiasimti,jupanakamp chikachasiñjja janirak munamti,+
2 kuna laykutejj chuymanakapajj nuwasiñanakatakwa lupʼisipki,*lakanakapas jan wali lurañanakatakwa parlasipki.
3 Yatiñampiw mä utajj lurasi,*+amuytʼasaw utajj sum saytʼayasiraki.
4 Yatiñampiw utan cuartonakapajj phoqantasi,wali valorani taqe kasta suma yänakampi.*+
5 Yatiñani jaqejj wali chʼamaniwa,+yatiñampiw mä jaqejj chʼamap jukʼamp jiljjattayi.
6 Guerrar sarañatakejja suma yatjjattʼat jaqen ewjjtʼapaw wakisi,+walja jaqenakan ewjjtʼapampiw atipjasi.*+
7 Cheqpach yatiñajja jan amuytʼasir jaqetakejj janiw jikjjatañjamäkiti,+marka punkunsa janiw kunsa parlirjamäkiti.
8 Khititï jan walinak lurañ amtki ukarojja,jan walinak amtir jaqe sasaw sapjjani.+
9 Jan wali jaqen jan wali amtatanakapajja juchawa,burlasir jaqetjja jaqenakajj ajjtasipjjewa.+
10 Jumatï llakisiñ urun* aynachtʼat jikjjatasïta ukhajja,jan chʼamaniw uñjasïta.
11 Jiwañar apatäsipki ukanakar salvam,jiwayatäñatak apatäsipki ukanakar salvam.+
12 Jumatï “janiw uka toqet nanakajj yatipkayätti” sasin säta ukhajja,¿janit chuymanak uñantir Diosajj uk amuykani?+
Jïsa, jumar uñjasktam uka Diosajj yatiniwa,sapa mayniruw lurataparjam churani.+
13 Nayan wawaja, miskʼi manqtʼasim, wali sumawa,chʼaqarir miskʼejja lakatakejj wali mosqʼawa.
14 Yatiñajj ukhamarakiw jumatakejj wali sumajja, uk jan armasimti.+
Jumatï yatiñ jikjjatäta ukhajja, jutïrin kusisitaw jakasïta,kuntï suykta ukas phoqasipuniniwa.+
15 Cheqap sarnaqer jaqen utap jakʼanjja jan walinak lurañatakejj jan suyjjatamti,samartʼañ lugarapsa janirak tukjamti.
16 Cheqap sarnaqer jaqejj paqallqo kutis tinkchinejja mayampiw saytʼasini,+ukampis jan wali jaqejja jan waltʼäwin uñjasisajj lanktʼasiniwa.+
17 Kunapachatï enemigomajj tinkkani ukhajja jan jumajj kusisimti,lanktʼaskani ukhas jan chuymamajj kusispanti.+
18 Jumatï ukham luräta ukhajja Jehová Diosajj uk uñjaniwa, janirakiw ukajj jupatakejj walïkaniti,enemigomatakis janirakiw colerjjaniti.+
19 Jan walinak lurir jaqenak kawsajj jan colerasimti,jan wali jaqenakatsa janirak envidiasimti,
20 kuna laykutejj jan wali jaqejj janiw jutïrin kusisit jakaskaniti,+jan wali jaqen lamparapajja jiwtʼaniwa.+
21 Nayan wawaja, Jehová Diosarusa reyirus ajjsaram.+
Kutkatasir jaqenakampejj* jan chikachasimti,+
22 uka jaqenakajj mä akatjamatwa jan walinakan uñjasipjjani.+
¿Kuna jan walinaktï uka jaqenakjjarojj panpachanejj* apanipkani uk khitirak yatispasti?+
23 Aka arunakajja yatiñan jaqenakan arsut arunakarakiwa:
juzgkasin mayni favor saytʼasiñajj janiw walïkiti.+
24 Khititï jan wali jaqerojj “jumajj cheqap sarnaqer jaqëtawa”+ sasin siskani ukarojja,markanakajj maldisipjjaniwa, markanakajj denunciapjjarakiniwa.
25 Ukampis khitinakatï uka jan wali jaqer cheqañchapkani ukanakarojja taqe kunas sumaw sarani,+kunanakatï sumäki ukanakamp bendisitäpjjarakiniwa.+
26 Khititï jan kun imtʼas qhan jayski ukarojja, jaqenakajj respetapjjaniwa.*+
27 Campon trabajiñatak wakichtʼasim, kunanakatï yapu lurañatakejj wakiski ukanaksa wakichtʼarakim,ukatsti utam saytʼayam.*
28 Janitï pruebanakamajj utjkchi ukhajja, jan jaqe masim contrajj testigot saytʼamti.+
Janirak lakamampejj yaqhanakar engañjamti.+
29 Jan akham samti: “Kunjamtï nayar lurkitu ukhamwa juparojj lurarakëjja,kuntï jupajj lurkitu uka pachparakwa nayajj kuttʼayarakëjja”*+ sasa.
30 Mä jayra jaqen oraqepnamaw nayajj pasayäta,+jïsa, jan amuytʼasir jaqen uvas yapupnamaw nayajj pasayäta.
31 Uka yapjja jan wali qoranakampi phoqantatwa nayajj uñjayäta,itapallumpi phoqantatänwa,qala uyunakapas qʼala allthapitänwa.+
32 Uk uñjasajja nayajj wal lupʼiyäta,*uk uñjasasti akwa yateqarakiyäta:
33 mä rat iktʼaña, mä rat ikikipaña,ampar qhomjjartʼasisin mä rat samartʼaña,
34 ukham lurasajj ratukiw pobre jaqer tuküta, mä lunthatas akatjamat atackiristam ukhama,mä armantat jaqes taqe utjirinakam aparkiristam ukhama.+
Notanaka
^ Jan ukajja, “piensasipki”.
^ Jan ukajja, “Yatiñampiw utankirinakarojj chʼamachtʼasi”.
^ Jan ukajja, “cosasanakampi”.
^ Jan ukajja, “salvacionajj utji”.
^ Jan ukajja, “jan wali tiemponakan”.
^ Jan ukajja, “Cambionak utjañap munir jaqenakampejj”.
^ Ukajja, Jehová Diosampita reyimpitwa parlaski.
^ Hebreo arunjja, “lakapat jampʼattʼapjjaniwa”. Ukajja, “Cheqaki jaysañajja jampʼattʼañamp sasiwa” sasaw jaqokipasirakispa.
^ Jan ukajja, “familiam uttʼayam”.
^ Jan ukajja, “kuntï jupajj lurki ukatwa vengasëjja”.
^ Jan ukajja, “piensayäta”.