“Aka Leyinakan libron arunakapatjja yaqhanakarojj parlañamapuniwa, uruy arumaw liytʼañama lupʼiñamaraki, ukhamat kunatï ukan qellqatäki ukarjam sum phoqañamataki. Ukhamatwa taqe kunas sumaru sarani, wali yatiñampirakiw taqe kunsa luräta”.

Josué 1:8

“Jupanakasti cheqpach Diosan Leyinakan librop jachʼat liytʼasipkakïnwa, kuntï uka arunakajj sañ munkäna uksa qhana amuytʼkañ qhanañchapjjarakïna. Ukhamatwa jupanakajj kunatï liytʼaskäna uk markankirinakan amuytʼapjjañapatak yanaptʼapjjäna”.

Nehemías 8:8

“Kusisiñaniw jan wali jaqenakan ewjjtʼanakaparjam jan sarnaqki uka jaqejja [...]. Jan ukasti jupajj Jehová Diosan leyiparojj wal munasi, uruy arumaw Diosan leyipat liytʼi lupʼiraki [...]. Taqe kuntï jupajj lurkani ukajj sumaruw sarani”.

Salmo 1:1-3

“Ukatwa Felipejj uka carror jakʼachasisajj carromp chik tʼijüna, Isaías profetan qellqatanakapat jachʼat liytʼaskir istʼarakïna, ukatjja akham sasaw jupar jisktʼäna: ‘¿Kuntï jumajj liyiskta uk cheqpachapunit amuyta?’ sasa. Jupajj sarakïnwa: ‘¿Cheqpachans jan khitin yatichatajj kunjamarak amuyiriststi?’ sasa”.

Hechos 8:30, 31

 “Jaqenakajj janis Diosarojj uñjapkchejja, jupajj kunjam Diosas ukajja, aka mundojj luratäkäna ukhat aksaruw qhan uñjasi. Kunatï luratäki ukanakanwa jupajj kunjam Diosas ukajj qhan amuyasi, wiñay chʼamapasa cheqpachapun Diosätapas qhan amuyasi. Ukhamajj janiw jupanakajj janiw yatipkayätti sasin sapkaspati”.

Romanos 1:20

“Ukanakat lupʼiskakim, taqe chuyma ukanak lurarakim, ukhamat taqenis nayrar sartatam qhan uñjapjjañapataki”.

1 Timoteo 4:15

“Mayninakajj kunjamäsipkisa ukjja amuyapjjapuniñäni, ukhamat munasiñasa suma luräwinakasa jukʼamp utjañapataki. Tantachäwinakasjja janirak jaytanukupjjañäniti”.

Hebreos 10:24, 25

“Jumanakat maynirutejj yatiñanïñajj faltchejja, Diosar mayiskakpan, ukatsti katoqaniwa, jupajj taqenirus taqe chuyma walja chuririwa, khititejj maykani ukatakis janirakiw coleraskaniti”.

Santiago 1:5