¿Jaypʼéel u kʼaabaʼob Dios yaan?

PAX ICH

Baʼax ku yaʼalik le Bibliaoʼ

Chéen junpʼéel u kʼaabaʼ Dios yaan. Ich hebreoeʼ ku tsʼíibtaʼal yéetel le letraʼob YHWH (יהוה), ich maayaeʼ ku tsʼíibtaʼal bey Jéeoba. a Dioseʼ tu yaʼalaj tiʼ le profeta Isaíasoʼ: «Teneʼ Jéeobaen, letiʼe in kʼaabaʼoʼ» (Isaías 42:8). Teʼ úuchben tsʼíiboʼoboʼ u kʼaabaʼ Dioseʼ ku chíikpajal kex 7 mil u téeneliʼ. Lelaʼ maas yaʼab ke tiʼ le uláakʼ bix u yaʼalaʼal tiʼ Diosoʼ wa tiʼ u kʼaabaʼ uláakʼ máaxoʼob ku yaʼalaʼal teʼ Bibliaoʼ. b

¿Yaan wa uláakʼ u kʼaabaʼob Dios?

Le Bibliaoʼ ku yaʼalikeʼ chéen junpʼéel u kʼaabaʼ yaan, chéen baʼaleʼ yaan jejeláas formas bix kʼaj óolaʼanil. Teʼ kabalaʼ ku chíikpajal baʼax u kʼáat u yaʼal cada junpʼéel tiʼ le bix kʼaj óolaʼaniloʼ. Lelaʼ ku yeʼesik le jatsʼuts modos yaan tiʼ Diosoʼ.

Le bix u yaʼalaʼaltiʼoʼ	Tuʼux ku chíikpajal teʼ Bibliaoʼ	Baʼax u kʼáat u yaʼale
Alá	(Mix tuʼux)	Lelaʼ junpʼéel tʼaan ich árabe u kʼáat u yaʼal «Dios». Yaʼab Bibliaʼob ich árabe bey xan ichil uláakʼ idiomaʼobeʼ ku yaʼalikoʼob le tʼaanaʼ.
Dios	Génesis 1:1	Jeʼel baʼaxak jeʼel u páajtal u adorartaʼaleʼ wa jeʼel baʼaxak jach yaan u muukʼeʼ. Le tʼaan ʼElohímoʼ maases u kʼáat u yaʼal u kiʼichkelmil, u páajtalil yéetel u nojoch poder Jéeoba.
J-kanan Taman	Salmo 23:1	U kʼáat u yaʼaleʼ ku kanáantik le máaxoʼob adorarkoʼ.
Le Alfa yéetel le Omegaoʼ	Apocalipsis 1:8; 21:6; 22:13	Le alfaoʼ letiʼe yáax letra yaan teʼ abecedario griegooʼ yéetel le omegaoʼ letiʼ u tsʼookoʼ. Lelaʼ u kʼáat u yaʼaleʼ minaʼan uláakʼ jaajil Dios, chéen letiʼ. Mix juntúul Dios yanchaj antes tiʼ Jéeoba yéetel desde yanakeʼ mix juntúul xan yanakiʼ (Isaías 43:10).
Le Maas Nojoch Diosoʼ	Salmo 47:2	U kʼáat u yaʼaleʼ minaʼan uláakʼ dios maas nojoch tiʼ letiʼ.
Le Máax desde jach úuch yanakoʼ	Daniel 7:9, 13, 22	Lelaʼ u kʼáat u yaʼaleʼ desde jach úuch yanak, antes tak tiʼ u beetik tuláakal baʼal (Salmo 90:2).
Le Dios ku kʼáatik ka adorartaʼak chéen letiʼoʼ	Éxodo 34:14	Lelaʼ u kʼáat u yaʼaleʼ Jéeobaeʼ maʼ u kʼáat ka chinlakoʼon tu táan uláakʼ diosoʼobiʼ.
Le Máax beetmil tuláakal baʼaloʼ	Isaías 40:28	Lelaʼ u kʼáat u yaʼaleʼ tuláakal le baʼaxoʼob yanoʼ letiʼ beetmil.
Le Dios kiʼimak u yóoloʼ	1 Timoteo 1:11	Lelaʼ ku yeʼesikeʼ le kiʼimak óolaloʼ junpʼéel u jatsʼuts modos Dios (Salmo 104:31).
Le Máax jach maʼalob u kaʼansajoʼ	Isaías 30:20, 21	Lelaʼ ku yeʼesikeʼ Jéeobaeʼ ku nuʼuktikoʼon yéetel ku kaʼanskoʼon utiaʼal u bintoʼon utsil (Isaías 48:17, 18).
Le Nojoch Dios Beetmiloʼonoʼ	Salmo 149:2	Lelaʼ u kʼáat u yaʼaleʼ chéen tu yoʼolal Dios anchaj tuláakal baʼal (Apocalipsis 4:11).
Le Máax uʼuyik le oraciónoʼoboʼ	Salmo 65:2	U kʼáat u yaʼaleʼ ku yuʼubik u oración le máaxoʼob yaan u fejoʼoboʼ.
Le Máax kaʼa manikoʼonoʼ	Isaías 41:14	U kʼáat u yaʼaleʼ ku salvartik máak tiʼ le kʼeban yéetel tiʼ le kíimil tu yoʼolal u kuxtal Jesúsoʼ (Juan 3:16).
Le Rey minaʼan xuʼulultiʼoʼ	Apocalipsis 15:3	U kʼáat u yaʼaleʼ chéen letiʼ jach yaan u páajtalil.
Le nuxiʼ tuunichoʼ	Salmo 18:2, 46	U kʼáat u yaʼaleʼ chéen letiʼ jeʼel u kanáantkoʼon yéetel u salvarkoʼoneʼ
Le Máax salvarkoʼonoʼ	Isaías 45:21	Ku salvartik máak tiʼ le kíimiloʼ yéetel tiʼ le xuʼulsajiloʼ.
Le Máax Jach Santooʼ	Proverbios 9:10	Minaʼan uláakʼ máax maas santo yéetel jach limpio jeʼex letiʼeʼ.
Le Máax yaan tuláakal autoridad tiʼoʼ	Génesis 15:2	U kʼáat u yaʼaleʼ minaʼan uláakʼ máax jach yaan u autoridad jeʼex letiʼeʼ. Ich hebreoeʼ ku yaʼalaʼaltiʼ ’Adhonái.
Le Maas Nojoch Diosoʼ	Daniel 7:18, 27	Minaʼan uláakʼ gobernante maas nojoch jeʼex letiʼeʼ.
Le Dios jach táaj yaan u poderoʼ	Génesis 17:1	U kʼáat u yaʼaleʼ jach chéen letiʼ yaan u poder. Le tʼaan ’El Schaddái yaan ich hebreooʼ, u kʼáat u yaʼal le «Dios jach táaj yaan u poderoʼ». Lelaʼ ku chíikpajal siete u téenel teʼ Bibliaoʼ.
Le Máax gobernartik le ángeloʼoboʼ	Isaías 1:9; Romanos 9:29.	Lelaʼ u kʼáat u yaʼaleʼ letiʼ nuʼuktik tuláakal le ángeloʼoboʼ (Romanos 9:29).
Máax patik kʼat	Isaías 64:8	Le máax beetik le meyajaʼ jeʼel u tsʼáaik tiʼ le kʼat le forma ku tuklik maas maʼaloboʼ. Lelaʼ u kʼáat u yaʼaleʼ yaan u páajtalil yóokʼol le kʼatoʼ. Jéeoba xaneʼ yaan u páajtalil yóokʼol le máakoʼoboʼ wa le kaajoʼoboʼ (Romanos 9:20, 21).
Taatatsil	Mateo 6:9	U kʼáat u yaʼaleʼ letiʼ tsʼáaik le kuxtaloʼ.
Teneʼ Yaan in Kʼuchul in Beetinba le Baʼax Ken in Yéey in Beetkinbaoʼ	Éxodo 3:14	Lelaʼ ku yeʼesikeʼ Jéeobaeʼ jeʼel u páajtal u kʼuchul u beetuba jeʼel baʼaxak bíin kʼaʼabéetchajak utiaʼal u béeykuntik le baʼax u tukultmoʼ. Tsʼoʼoleʼ ku yáantkoʼon k-naʼat baʼax u kʼáat u yaʼal u kʼaabaʼ Dios jeʼex u chíikpajal teʼ Éxodo 3:15.
U Dios le diosoʼoboʼ	Deuteronomio 10:17	Lelaʼ u kʼáat u yaʼaleʼ minaʼan uláakʼ Dios jeʼex letiʼeʼ. Le uláakʼ diosoʼoboʼ mix baʼal u biilaloʼob (Isaías 2:8).
Yuumtsil	Salmo 135:5, U Kayilo’ob u Cajal Jajal Dios	U Yuumil tuláakal baʼal. Ich hebreoeʼ ku yaʼalaʼal ʼAdhóhn yéetel ʼAdhoním.

U kʼaabaʼ jujunpʼéel lugaroʼob ku chíikpajal teʼ Tsʼíiboʼob ich Hebreooʼ

Ichil u kʼaabaʼ jujunpʼéel lugaroʼob yaan teʼ Bibliaoʼ táakaʼan u kʼaabaʼ Diosiʼ. Chéen baʼaleʼ maʼ uláakʼ bix suuk u yaʼalaʼal tiʼ Diosiʼ.

U kʼaabaʼ le lugaroʼ	Tuʼux ku chíikpajal teʼ Bibliaoʼ	Baʼax u kʼáat u yaʼale
Jéeoba-nisí	Éxodo 17:15	Nisíeʼ u kʼáat u yaʼal «Cheʼ Waʼakúuntaʼan Bey Señaleʼ». Lelaʼ ku tsʼáaik naʼatbileʼ Jéeobaeʼ jeʼel u kanáantik tuláakal le máaxoʼob ku náatsʼloʼob tu yiknaloʼ (Éxodo 17:13-16).
Jéeoba-salom	Jueces 6:23, 24	Lelaʼ u kʼáat u yaʼaleʼ «Jéeobaeʼ Jeetsʼelil».
Jéeoba-sama	Ezequiel 48:35, Reina-Valera	Lelaʼ u kʼáat u yaʼaleʼ «Tiaʼan Jéeoba teʼeloʼ».
Jéeoba-yiré	Génesis 22:13, 14	Lelaʼ u kʼáat u yaʼaleʼ «Jéeoba Ken u Tsʼáa Baʼax Kʼaʼabéet».

Baʼaxten kʼaʼabéet k-kʼaj óoltik yéetel u meyajtoʼon u kʼaabaʼ Dios

Dioseʼ u kʼáat ka meyajnaktoʼon u kʼaabaʼ tumen yaʼab u téenel tu beetaj u tsʼíibtaʼal teʼ Bibliaoʼ (Malaquías 1:11).
Jesúseʼ yaʼab u téenel meyajnajtiʼ u kʼaabaʼ Dios. Juntéenjeak ka orarnajeʼ hasta tu yaʼalaj: «Santificartaʼak a kʼaabaʼ» (Mateo 6:9; Juan 17:6).
Utiaʼal a biskaba yéetel Dioseʼ kʼaʼabéet a kanik u kʼaabaʼ yéetel u meyajtech (Salmo 9:10; Malaquías 3:16). Dioseʼ ku yaʼalik tiʼ le máaxoʼob ku biskubaʼob tu yéeteloʼ: «Tumen u yaabiltmeneʼ yaan in salvartik, yaan in kanáantik tumen u kʼaj óol in kʼaabaʼ» (Salmo 91:14).
Le Bibliaoʼ ku yaʼalikeʼ «yaʼab ‹diosoʼob› yéetel yaʼab ‹yuumtsiloʼob›» yaan (1 Corintios 8:5, 6). Chéen baʼaleʼ ku yaʼalik xaneʼ u kʼaabaʼ le jaajil Diosoʼ Jéeoba (Salmo 83:18).

a Jujuntúul máaxoʼob u jach xokmoʼob le idioma hebreooʼ ku yaʼalikoʼobeʼ unaj u traducirtaʼal bey «Yahweh» wa «Yahvé».

b U abreviaciónil u kʼaabaʼ Dioseʼ «Jah», lelaʼ ku chíikpajal kex 50 u téenel teʼ Bibliaoʼ. Por ejemploeʼ le tʼaan Aleluyaoʼ u kʼáat u yaʼal: «Alabartaʼak Jah». (Apocalipsis 19:1; Reina-Valera).