Provébiu 15:1-33
15 ꞌRe dazahi zaꞌra mono nherẽ, damreme wẽ na da te ãma ꞌre idazadaꞌâbâ zaꞌra mono zé hã, te za atãma na dahâimanazéb u hã dawi ãma saprĩ ni. Tazahã, damreme tete na dazadaꞌâbâzé hã te za dazahi hã ãma dama hâimo ni.
2 Iꞌrãi waihuꞌu wẽ mreme hã da te ꞌre wapari zaꞌra mono wamhã, te za rowaihu iwẽ hã da te dasima ꞌre wẽ zaꞌra. Tazahã, isimizaꞌreseꞌõ norĩ hã te za siwaꞌru timreme wasété na si ꞌre mreme zusi.
3 Uburé Danhibꞌapito, titõmo na te ropâ te te ꞌre robꞌmadâꞌâ. Iwẽ norĩ hã te duré iwasété norĩ me uburé te te ꞌre aꞌmadâꞌâ.
4 Damreme iwẽ hã te za rowẽ na ꞌre idahâimana zaꞌra mono zé hã te te dama ꞌre sõmri zaꞌra. Tazahã, dazadawa nhipe hã robzeiꞌõ te te ãma dama ꞌre isani zaꞌra mono na hã te za te te ãma ꞌre danhimro, dapẽꞌẽ ꞌremhã.
5 Isimizaꞌreseꞌõ hã te timama nhimiroti hã te te siwi ꞌre wẽꞌõ pese. Tazahã, niꞌwa tihâimanazé pese zé te te sina ꞌre iꞌuzei mono hã, te ꞌrãi waihuꞌu wẽ na ꞌre hâimana.
6 Wẽ na ꞌre ihâimana mono nhorõwa ꞌremhã te marĩ ahâ na hã ꞌre simiꞌwara. Tazahã, iwasété norĩ ma, te isimarĩ tãma ꞌre ihâimana zaꞌra mono hã ropire te te tãma ꞌre sõmri zaꞌra.
7 Iꞌrãi waihuꞌu wẽ mreme hã te rowaihu iwẽ na hã te te ãma dama ꞌre ropé zaꞌra. Tazahã, isimizaꞌreseꞌõ norĩ, ãne hã te te dama ꞌre ꞌmanharĩ zaꞌra mono õ di.
8 Danhimizama zada iwasété norĩ, Uburé Danhibꞌapito ma, te te ꞌre isõmri zaꞌra mono hã tãma ꞌru ti. Tane nherẽ, iwẽ norĩ, tãma ꞌre imreme zusi mono zép si, tãma wẽ uptabi di.
9 Uburé Danhibꞌapito hã te iwasété norĩ hâimanazé hã te te siwi ꞌre awẽꞌõ pese. Tazahã, iꞌuwaibaba na si ꞌre ihâimana zaꞌra mono hã te te ꞌre azawi pese.
10 Niꞌwa hã bâdâdi iwẽ te te rẽme zahi wamhã, te za robꞌmanharĩ pipa zé hã sitẽme ãwisi. Duré niꞌwa tihâimanazé pese zé hã te te sina ꞌre uzei mono õ wamhã, te za duré dârâ.
11 Uburé Danhibꞌapito nhoꞌremhã, ꞌre idadâꞌâ zaꞌra mono zéb u hã, te ꞌridawa haré na ꞌre romhâimana. E niha te aré bété niꞌwa tipẽꞌẽ ꞌre tinhimirosaꞌrada hã tiwi suwa.
12 Daꞌãma ꞌre iwaꞌẽ mono ma hã tãma wẽꞌõ di, ihâimanazé, da te tãma ipese da hã. Tahawa, niwamhã iꞌrãi waihuꞌu wẽ norĩ nhimirotizéb zô hã sima ꞌre tobꞌuzui mono õ di.
13 Dapẽꞌẽ ꞌre rowẽzé hã te za daꞌubu zei pese. Tazahã, robzeiꞌõ hã te za niha na dapẽꞌẽzeiꞌõ hã dama tisõ.
14 Iꞌrãi waihuꞌu wẽ norĩ hã te rowaihu iwẽ zô si sima ꞌre sõpré. Tane nherẽ, simizaꞌrese ãna ꞌre ihâimana zaꞌra mono hã te tizaihâ na si te te ꞌre robꞌmasi zaꞌra, tinhimizaꞌreseꞌõ zarina.
15 Robzei ãna ꞌre ihâimana zaꞌra mono norĩ hã te za bâtâ bâre ropire na ꞌre hâimana zaꞌra. Tane nherẽ, pẽꞌẽ toi uꞌâsi ꞌre ihâimana zaꞌra mono norĩ hã te za tihâimana ze zém na ꞌre hâimana uꞌâsi zaꞌra.
16 Wẽ uptabi di, danhimarĩꞌõ, Uburé Danhibꞌapito da te ꞌre iwazé pese mono zé hã, danhimarĩ pe dasina dahâtâꞌâ zaꞌẽtẽ na ꞌre idahâimana mono zém nhipai u.
17 Wẽ uptabi di duré, dasai waꞌaba zém norĩ ꞌre idasisawi pese zaꞌra mono siré da te ꞌre ihuri mono da hã, dasisada ꞌre idanhitiꞌru zaꞌra mono ãma powawẽ hâi pese nhi hã da te ꞌre ihuri mono nhipai u hã.
18 Iꞌrãi waꞌro suꞌu norĩ hã te za damreme na dasiꞌwapé hã te te ꞌre poto zaꞌra. Tane nherẽ, atãma na ꞌre ihâimana zaꞌra mono hã te za atãma na te te ꞌre daꞌrãiwahâ zaꞌra.
19 Iwaꞌa norĩ ꞌre inomro mono zé bâdâdi na hã ꞌwabzéré hã ahâ di. Tane nherẽ, sena na ꞌre ihâimana zaꞌra mono norĩ nhibâdâdi hã iharé na si.
20 Daꞌra iꞌrãi waihuꞌu pe hã te za timama ma, te te ãma tãma ꞌre rowẽ zani. Tane nherẽ, daꞌra isimizaꞌreseꞌõ hã te za tarére na tina te te ꞌre iꞌmadâꞌâ mono zarina hã iwazéb õ na ꞌre hâimana.
21 Isimizaꞌreseꞌõ norĩ te tinhimirosaꞌrataꞌõ zarina, marĩ na te te sima ãma ꞌre rowẽ zaꞌra. Tane nherẽ, iꞌrãi waihuꞌu wẽ hã te za bâdâdi awaꞌawi na ꞌre mo, sipiꞌrai ãna marĩ zô hã.
22 Niꞌwam norĩ hã tãma roti ãna ꞌre hâimana zaꞌra mono wamhã, te za marĩ na simirowaꞌõtõ nhibꞌuwa na hã ꞌre hâimana zaꞌra. Tane nherẽ, tãma roti pese na ꞌre ihâimana zaꞌra mono norĩ hã te za iwẽ na te te sima ꞌre romhâimana zaꞌra.
23 Marĩ na da te ꞌre dazadaꞌâbâ wẽ zaꞌra mono wamhã, te za dama ãma rowẽ wazere ni. Duré danhimiroti wẽ bâtâ zarina da te dama ãma ꞌre irowasuꞌu zaꞌra mono hã wẽ uptabi di.
24 Isimizaꞌrese wẽ norĩ hã bâdâdi na rowẽ na ꞌre idahâimana hâ zaꞌra mono zém na si te ꞌre nomro. Bâdâdi, ꞌre idadâꞌâ zaꞌra mono zép te na ꞌre inomro mono da hã mare di.
25 Uburé Danhibꞌapito hã te ꞌrâwi ꞌre isiꞌmadâꞌâ ze zaꞌra mono norĩ nhorõwa hã te te tiwi ꞌre apru. Tane nherẽ, te imrotõ norĩ nhimarĩ hã te te tãma ꞌre abꞌmadâꞌâ pese.
26 Uburé Danhibꞌapito, iwasété norĩ nhimirosaꞌrada hã te duré te te siwi ꞌre awẽꞌõ pese. Tãma iwẽ hã, damreme wẽ na da te dasima ꞌre irobzanhamri zaꞌra mono si.
27 Niꞌwa senai õ na ꞌre ihâimana mono zéb zarina, marĩ zô si sima ꞌre rĩtĩ mono wamhã, te za ropire hã isõrõwa ꞌre, ꞌre ihâimana zaꞌra mono norĩ ma hã te te ꞌre azani. Tane nherẽ, niꞌwa dama rowairébézéb da, dama ipire norĩ ma, piꞌuriwi danhibzari te te siwi ꞌre awẽꞌõ mono wapsi, te za tô rowẽ na hã ꞌre hâimana hâ.
28 Iꞌuwaibaba na si ꞌre ihâimana zaꞌra mono norĩ hã te za te te ꞌre dazadaꞌâbâ zaꞌra mono wana ré, te te sima ꞌre rosaꞌrata zaꞌra aꞌâ, waimri na. Tane nherẽ, iwasété norĩ zadawa hawimhã te imreme wasédé hã ꞌre wairébé.
29 Uburé Danhibꞌapito romhâ na te iwasété norĩ nhiti ꞌre hâimana. Tane nherẽ, te iwẽ norĩ tãma ꞌre imreme zusi mono zé hã te te ꞌre awapari.
30 Niꞌwa ubu toi uꞌâsi na da te ꞌmadâꞌâ wamhã, te za dapẽꞌẽ ꞌremhã ãma dama rowẽ waze. Duré rowasuꞌu wẽ hã da te wapari zaꞌra wamhã, dama rowẽ zaꞌra di.
31 Niꞌwa hã tihâimana pese zé iwẽ hã te te sina ꞌre uzei mono wamhã, te za iꞌrãi waihuꞌu wẽ norĩ me hã ꞌre hâimana uꞌâsi.
32 Niꞌwa roti iwẽ te te siwi wẽꞌõ wamhã, te za ꞌrâwi tihâimanazé hã siwi wamna. Tane nherẽ, niꞌwa tihâimana pese zé te te sina iꞌuzei pe hã te za rowaihu iwẽ hã te te sima ꞌre saꞌẽtẽ uꞌâsi mono.
33 Niꞌwa hã Uburé Danhibꞌapito te te ꞌre wazé pese mono wamhã, te za tinhimizaꞌresezé hã waihuꞌu. Duré niꞌwa dama wapu na ꞌre isiꞌmadâꞌâ mono zarina, te za da te dasiwi ꞌre wazé.
