Provébiu 25:1-28
25 Ã hã Salomahã nhimirowaihuꞌu wẽ zé hâiba amo, Zuda tiꞌai waꞌõtõ nhoꞌõmo ꞌre, apito Ezequiaha nhibꞌaꞌuwẽ te te iꞌrãꞌõtõ zaꞌra zé hã ãne:
2 ꞌRe ihâimana uꞌâsi mono hã dama iwaihuꞌuꞌõ te te wawi ꞌre isuwa zaꞌra mono zarina, wa wasiwi wa te ꞌre wazé pese. Duré dama ipire norĩ te te marĩ wama ꞌre iwasuꞌu hâiꞌré zaꞌra mono zarina, wa duré wa te wasiwi ꞌre wazéb zaꞌra.
3 Apito nhimirosaꞌrada hã dama waihuꞌu õ di. Hâiwa duré tiꞌa zahâpâ uptabi hã romhâ uptabi wa, da te iꞌuwe waihuꞌu õ ne, dama waihuꞌu zaꞌra õ di, apito nhimirosaꞌrada hã.
4 Ẽtẽ waipo prã prata tõmo upto, da te dasima sani zaꞌra wamhã, ãma iromhuriꞌwai ma hã waihuꞌu pese di, marĩ iwẽ te te ãma iꞌmanharĩ da hã.
5 Tane duré, apito hawi iwasété norĩ da te ꞌre sani zaꞌra mono wamhã, te za sena na iꞌuwaibaba na si te te ꞌre idaꞌaꞌmadâꞌâ mono zéb zarina, siptete na hã ꞌre hâimana.
6 Dama ipire norĩ nhoꞌre ꞌre aihâimana mono wamhã, aipire na ꞌre asiꞌmadâꞌâ mono tõ. Tôꞌã!
7 Wẽ uptabi di aré, dama ipire hã ãne te te aima inharĩ da hã: “We ĩzababa asãmra hâ.” Tane nherẽ, wasété di aré, õ hã uburé ipire norĩ nhoꞌa te te aima rowazé wazere wamhã.
8 Aiꞌabaꞌré na daꞌãma rowairébézéb u aimorĩ tõ, marĩ iꞌmadâꞌâzé wasuꞌu da hã. E marĩ wa. Nimahã na za iwasuꞌuzém na ãma iꞌupa na hã da te aiwi upsibi me dâꞌâsina. Ãhã wamhã, e marĩ te za iꞌmanha.
9 Aiwapto ma ꞌre isãmra mono me si marĩ na ꞌrâwi asima rowairébé aba. Tane nherẽ, marĩ dama iwaihuꞌuꞌõ te te aima iwasuꞌuzé hã dama hâiꞌré õ di za.
10 Ãnei õ wamhã, a hã niha marĩ asima itété waihuꞌu õ na te za uburé aiwaihuꞌu zaꞌra ni. Taha zarina niwamhã aiwasuꞌu wasédé isiꞌutõrĩ da hã mare di.
11 Damreme iwẽ hã aiwa bâtâ uwaibaba na da te dama ꞌre iroti zaꞌra mono zé hã, aiwa ẽtẽ waipo pré oru na ropodo ẽtẽ waipo prã prata ꞌmanharĩ na da te ãma isaꞌra ne hã.
12 Niꞌwai ma, iꞌrãiwaihuꞌu wẽ te te tãma ipẽne hã te te iwapari ze zé hã, danhiptõmo hi wasisizé oru na iꞌmanharĩ nhipai u iwẽ uptabi, duré oru na marĩ da te ꞌre iꞌmanharĩ zaꞌra mono norĩ nhipai u zama iwẽ.
13 Rowaꞌro na da te ꞌre iroptehâri zaꞌra mono siwaprã, â idiꞌidi, dama ꞌre ihâimana mono ne, te rowasuꞌuꞌwa iꞌumnha hã isatõrĩꞌwai ma, te te ãma tãma ꞌre rowẽ zani apâ.
14 Niꞌwa te te ropisutu nherẽ, tinhibzari te te dama isõmri õ hã, aiwa hâiwa nhirõtõ hawi rowaꞌu tã ꞌre taꞌa mono da, te te ꞌre isani mono õ ne hã.
15 Dahâimana wahâ zarina, te za dama ipire norĩ hã marĩ na te te ãma ꞌre dazaze zaꞌra. Duré danhimirobzanhamri wẽ hã te za ropire hã te te ꞌre uprosi zaꞌra.
16 Ropĩni hã ꞌmaiꞌupsõmri zaꞌẽtẽ tõ, asõꞌoꞌo õꞌumnhasite.
17 Bâtâ bâre aiwaptoma ꞌre ihâimana mono u hã ꞌre ane mono tõ. E marĩ wa. Aiꞌãma waꞌa wa, asada sitiꞌrui õꞌumnhasite.
18 Sadawa nhipese na dahâiba na te te ꞌre irobzanhamri zaꞌra mono hã simimnhasi uptabi di, aiwa sibꞌézé ꞌwapa ne, duré ti iꞌwanhimoi ꞌwa pese ne, duré brutuꞌumo ꞌwanhiséré ne hã.
19 Ropire hã dazô ꞌre pusi mono wa, dama iꞌumnhasiꞌõ da te ꞌre umnhasi zaꞌra mono wamhã, daꞌwa ꞌre isiwamnarĩ zaꞌra mono ne, duré imorĩꞌõ paraꞌõtõ uwa na ꞌre inomro mono ne, te ta hã marĩ dai õ na dama ꞌre hâimana.
20 Rowahâ zé bâtâ na niꞌwai wi, iꞌuza da te tiwi iwazere ne, duré daꞌwaꞌre, sa na da te ãma iꞌabaꞌré ne, te za tiwi irobzeiꞌõ ma hã taré pese danhoꞌre na hã tãma ꞌre danhoꞌre zaꞌra.
21 Asiꞌru mram na hâimana wamhã, isa hã tãma sõmri; duré ꞌrubu na hâimana wamhã, â hã tãma sõmri.
22 Ãne ꞌre ꞌmanharĩ mono wamhã, te za asiꞌrui ma hã rowazé tãma ꞌre isani mo. Taha zarina te za Uburé Danhibꞌapito iwẽ na hã te te aima ꞌre awaꞌâbâ.
23 Hâiwa nhimiꞌe hawi rowaꞌu, tã te te ꞌre isani uꞌâsi mono ne, te daꞌmadâꞌâ nhitiꞌru na daꞌmadâꞌâzé hã te te dama ꞌre sani zaꞌra.
24 Wẽ di, aibâ ꞌri upsibi hâpâ zaséꞌre ãma, timro nhiti ꞌre ihâimana mono da hã, imro isimiwati pese me ꞌri ꞌre, ꞌre isãmra mono nhipai u.
25 Rowasuꞌu wẽ, romhâ hawi datẽme ꞌre isihutu mono hã, aiwa ꞌrubu ré â wahâ da te ꞌre iꞌâhuri mono ne hã.
26 Â ꞌre ipuꞌu naꞌrata mono zéb ãma â ꞌre isiwamnarĩ mono ne, te sena na ꞌre ihâimana zaꞌra mono hã, iwasété norĩ hâimanazém na hã te te ꞌre sasõmri zaꞌra.
27 Ropĩ da te ꞌre iꞌupsõmri hâ zaꞌra mono hã wẽ õ di. Tane duré wẽ õ di, niꞌwai ãma dawata zô simire sina ꞌre imorĩzé hã.
28 Dahâimana waꞌro zarina ꞌre idasitété waihuꞌu mono õ, te ꞌri ꞌwawi waꞌra ꞌrãihâ ꞌre isipru pese mono ne hã ꞌre hâimana.
