Provébiu 29:1-27
29 Niꞌwa marĩ na te te ꞌre iꞌupai mono zém na nasi da te tãma pẽtẽ nherẽ, pẽꞌẽ tete na dawi ꞌre hâimana uꞌâsi mono wamhã, te za siwaꞌru bâtâ na poꞌre puꞌu õ pese na ropipa hã sô wi.
2 Sena na iꞌuwaibaba na si ꞌre ihâimana zaꞌra mono norĩ, ꞌre siꞌiꞌrãnhoꞌõmo zaꞌra mono wamhã, te za da te ãma dasima ꞌre rowẽ zaꞌra. Tane nherẽ, iwasété norĩ ꞌre siꞌiꞌrãnhoꞌõmo zaꞌra mono wamhã, te za iwẽꞌõ te ꞌre dasiwapsari zaꞌra.
3 Aibâ tiꞌrãiwaihuꞌu wẽ te te sima ꞌre isawi mono na, te za timama ma hã te te ãma tãma ꞌre rowẽ zani. Tane nherẽ, niꞌwa piꞌõi wasété ãma si ꞌre morĩ wamhã, te za tinhimarĩ hã taré pese te te siwi ãma ꞌre aꞌuprosi.
4 Sena na apito dama ꞌre hâimana zaꞌra mono wamhã, te za tiꞌai waꞌõtõ nhoꞌõmo ꞌre, ꞌre idahâimana zaꞌra mono hã siptete na ꞌre hâimana zaꞌra. Tane nherẽ, dama iꞌrãnhoꞌu dapawaꞌâbâzé sipoꞌore da te tãma ꞌre sõmri zaꞌra mono da, te te ãma dawi ꞌre hâimo uptabi mono wamhã, te za tinhimiꞌmadâꞌâ norĩ hã tiꞌai ꞌremhã siwi uprosi.
5 Niꞌwa tisiwaihuꞌu ma, timreme wazidi na senaiꞌõ na, te te ꞌre robzanhamri mono wamhã, te za ꞌrâwi ãma ꞌre simrami, niha timreme na hã.
6 Wasété na ꞌre ihâimana zaꞌra mono norĩ hã, tiwasété na te za tô tinhitobzé hã te te ꞌre waibu. Tane nherẽ, sena na iꞌuwaibaba na ꞌre ihâimana zaꞌra mono norĩ si, te za tô sima iwẽ na tãma rowẽ sina hã ꞌre nomro.
7 Sena na ꞌre ihâimana zaꞌra mono, te simarĩ ãna ꞌre ihâimana zaꞌra mono norĩ ꞌmadâꞌâzé, isimarĩ pese ꞌmadâꞌâzé me aiwam na ꞌre hâimana mono da hã te te sima ꞌre wẽ zaꞌra. Tane nherẽ, wasété na ꞌre ihâimana zaꞌra mono hã, ãne na hã te te ãma ꞌre rosaꞌrata zaꞌra mono õ di, tarére wa tãma zaꞌra hã.
8 Daꞌãma ꞌre iwaꞌẽ zaꞌra mono hã te za ꞌri nhoꞌõmo mono bâ roꞌwaꞌrudu hã te te dawi ꞌre sani zaꞌra. Tane nherẽ, te za ꞌrãiwaihuꞌu wẽ na ꞌre ihâimana zaꞌra mono hã dasisada dahâimana waꞌro zé hã te te dawi ꞌre uprosi zaꞌra, rowẽ na si apâ ꞌre romhâimana mono da.
9 Aibâ isimizaꞌrese wẽ, isimizaꞌreseꞌõ da hâimana da, dama rowairébézéb u morĩ wamhã, te za isimizaꞌreseꞌõ hã taré nasi ãma wasété. Te za duré nasi sahi sina robzanha. Tawamhã roꞌwaꞌrutu uptabi di za.
10 Dapãrĩꞌwa norĩ hã te sena na ꞌre ihâimana zaꞌra mono norĩ zada ꞌre sitiꞌru wairébé. Tane nherẽ, te iwẽ norĩ hã iꞌwawimhã ꞌre simapa zaꞌra.
11 Isimizaꞌreseꞌõ norĩ hã te sõꞌawi ꞌre isahi zaꞌra mono zém na hã ꞌre sihâiꞌré zaꞌra. Tane nherẽ, wẽ na ꞌre ihâimana mono hã te za ariꞌiwi ꞌre hâimana mono da si ꞌre sitété.
12 Dama iꞌrãnhoꞌu dazadawa nhipese na romreme te te ꞌre wapari zaꞌra mono wamhã, te za uburé ipaꞌupariꞌwa norĩ hã tiwasété zaꞌra.
13 Isimarĩꞌõ norĩ, isimarĩꞌõ watiꞌwai me te ãhã si aiwa tãma ꞌre hâimana zahuré: Uburé Danhibꞌapito ma tô robꞌmadâꞌâzéb da hã ito hã te te tãma ꞌre ꞌmanharĩ zaꞌra.
14 Dama ipire hã isimarĩꞌõ ma, iꞌuwaibaba na si te te tãma ꞌre rowairébé zaꞌra mono wamhã, te za iꞌrãnhoꞌõmo na dama ꞌre hâimana hâ zaꞌra.
15 Daꞌra da te ꞌre ihâ zaꞌra mono zéb zarina, te za iꞌrãiwaihuꞌu wẽ hã da te tãma ꞌre sõmri zaꞌra. Tane nherẽ, aiꞌuté ahâri ãna, sihawim na marĩ sima iwẽ na, siwaꞌru te te ꞌre iꞌmanharĩ mono zarina, te za tina wi hã te te ãma ꞌre rowazéb zani.
16 Iwasété norĩ ipire na ihâimana zaꞌra zéb u oto ꞌre sarõtõ zaꞌra mono wamhã, te za dawasétézé hã te te sina hâimo, isarina. Tane nherẽ, sena na ꞌre ihâimana zaꞌra mono norĩ hã te za aptoꞌoré hã iwasété norĩ rereꞌezé hã te te ꞌre ꞌmadâꞌâ zaꞌra.
17 Aiꞌra norĩ ma, te za ꞌre iropipa zaꞌra mo. Ãne wamhã, te za rowẽ hã te te aima sina ꞌre sõmri zaꞌra, duré aipẽꞌẽ ꞌre aima ꞌre irobzei mono zéb zama hã.
18 Tiꞌai waꞌõtõ nhoꞌõmo ꞌre, ꞌRe ihâimana uꞌâsi mono nhimiroti zarina ꞌre idanomro mono õ ãma hã te za siwaꞌru ꞌre dahâimana zaꞌra, isiti. Tane nherẽ, ꞌRe ihâimana uꞌâsi mono nhimiroti te te sima ꞌre itété zaꞌra mono si tãma ꞌre rowẽ uptabi zaꞌra mono di za.
19 Marĩ dai õ di, dama romhuriꞌwai ma damreme na si da te tãma ipẽne hã, õ hã tinhibꞌihâꞌa mreme te te sadaihuꞌu wẽ nherẽ, te te wapari dai õ wa.
20 E aima waihuꞌu pese di, niꞌwa õne haré timreme te te ime hã, simirosaꞌrata ãna. Taha ma hã rowẽ õ di za. Isimizaꞌreseꞌõ ma, tãma rowẽ di za, õhõ nhipai u.
21 Dama romhuriꞌwa aiꞌuté na hâimana ré ihâꞌâ zarina marĩ zô ꞌre isitiꞌru mono, siwaꞌru marĩ da te tãma ꞌre iꞌmanharĩ wẽ uꞌâsi mono hã te za nimahã na hã sima wẽ, uburé marĩ tedeꞌwa na oto ꞌre hâimana mono da.
22 Iꞌrãi waꞌro suꞌu norĩ hã te za damreme na dasiꞌwapé hã te te ꞌre poto zaꞌra, duré roꞌwaꞌrutu zama.
23 ꞌRâwi ꞌre idasiꞌmadâꞌâ ze zaꞌra mono zéb zarina, te za ꞌrâwi ꞌre dasiwazéb zaꞌra. Tane nherẽ, dama dawapu na ꞌre idasiꞌmadâꞌâ mono zéb zarina, te za dama dawazé pese zé hã da te dasina ꞌre sani zaꞌra.
24 Isimisaihuri siré ꞌre ihâimana mono hã, te tô ꞌrâwi tisiꞌru na hã ꞌre hâimana. Dama rowairébézéb ãma sena na dama siwasuꞌu wamhã, te za tô tãma robꞌmanharĩ wasété ni. Tazahã ãne na sena na dama siwasuꞌu õ wamhã, te za ꞌRe ihâimana uꞌâsi mono hã niha hã ropipa tãma pisutu.
25 Simimnhasi uptabi di, ꞌrâwi dasima ꞌre idapahi zaꞌra mono zé hã. Tane nherẽ, niꞌwa ꞌRe ihâimana uꞌâsi mono si te te sina ꞌre umnhasi mono wamhã, te za sima iwẽ na ꞌre hâimana, tãma romnhimimnhasi ãna.
26 Dama ipire hã te te ꞌre idaꞌawẽsãmri mono da hã, te uburé da te dasiꞌãma ꞌre rosaꞌrata ze zaꞌra. Tane nherẽ, te ꞌRe ihâimana uꞌâsi mono si dahâiba mono bâ te te sima ꞌre idaꞌawẽ mono zéb zarina te te dama ꞌre arowairébé, iꞌuwaibaba na.
27 Wẽ na ꞌre ihâimana zaꞌra mono hã te senaiꞌõ na ꞌre ihâimana zaꞌra mono hã te te siwi ꞌre wẽꞌõ pese zaꞌra. Duré wasété na ꞌre ihâimana zaꞌra mono hã te wẽ na ꞌre ihâimana zaꞌra mono hã asa te te siwi ꞌre wẽꞌõ pese zaꞌra, aiwab da.
