Provébiu 24:1-34
24 Rowasété ꞌmanharĩ zei ꞌwa norĩ hâimanazéb zô hã asima ꞌre robꞌruiwapari mono tõ. Duré ta norĩ siré ꞌre iꞌaihâimana mono da hã asima ꞌre rosaꞌrata mono tõ.
2 Ta norĩ hã te te dama ꞌre irobꞌmanharĩ wasété zaꞌra mono da si, te tô te te sima ꞌre rosaꞌrata zaꞌra. Te te daꞌãma ꞌre iroꞌwaꞌrutu zaꞌra mono na si te duré sima te te ꞌre robzanhamri zaꞌra.
3 Rowaihu iwẽ zarina te danhorõwa hã da te dasima ꞌre ꞌri wẽ zaꞌra. Duré danhimizaꞌrese wẽ zarina te ꞌri nhiptete na hã ꞌre simasa.
4 Iꞌrãi waihuꞌu wẽ nhorõwa ꞌremhã ꞌri ꞌre waꞌõtõ mono na hã te marĩ iꞌmadâꞌâ ze si duré iwaꞌâbâ zaꞌẽtẽ si ꞌre simasa.
5 ꞌRãiwaihuꞌu na ꞌre ihâimana mono hã wẽ uptabi di, danhiptete nhipai u hã. Duré danhimizaꞌrese na dahâiba hã pire uptabi di, danhiptete nhipai u.
6 Dasiꞌwapéi u ꞌre danhisisi mono wana ré hã te za aꞌâ da te dasima ꞌre rowaꞌõtõ wẽ zaꞌra. Duré dama roti ahâ na hã wapure di, da te daꞌãma ꞌre iꞌaiꞌuté zaꞌra mono zéb da hã.
7 Rowaihu iwẽ hã isimizaꞌreseꞌõ norĩ ma hã pire uptabi di, te te ꞌre iwaihuꞌu zaꞌra mono da hã. Tawamhã dasiꞌrãꞌõtõ ãma niha na robzanhamri ãma hã te te ꞌre inharĩ waihuꞌu zaꞌra mono da hã mare di.
8 Niꞌwa hã marĩ iwasédé te te ꞌre iꞌmanharĩ mono da si, te te sima ꞌre irosaꞌrata uꞌâsi mono, te za roꞌwaꞌrutu potoꞌwa na da te ꞌre waptẽrẽ zaꞌra.
9 Hâimana nhimizaꞌrese ãna ꞌre ihâimana zaꞌra mono norĩ nhimirowaꞌõno hã ta hã dawasédé. Duré daꞌãma ꞌre iwaꞌẽi zaꞌra mono norĩ hã, uburé dama ꞌru zaꞌra di.
10 Ropire hã bâtâ na asô iwatobro zarina, asibꞌuwa na aihâimana wamhã, te za tô asibꞌuwa na uꞌâ ꞌre aihâimana mo.
11 Niꞌwa tiwasédé te te ꞌmanharĩ õ nherẽ, da te dasiwi wĩrĩ da, da te saprõni wamhã, te za sô airĩtĩ mo, sõꞌreptu da hã.
12 Tawamhã a hã ãté te za inha, niha na iromhâimanazé atei õ na hã. Tane nherẽ, ꞌRe ihâimana uꞌâsi mono ma hã waihuꞌu pese di, aipẽꞌẽ ꞌre niha na we asima irosaꞌrata mono zé hã. Tahawa, te za tô õ hã imono bâ marĩ da te ꞌre iꞌmanharĩ zaꞌra mono zéb zarina, te te dama ꞌre awaꞌâbâ.
13 Ĩꞌra, maꞌãpé ropĩ hã ꞌre ꞌmaiꞌupsõmri uꞌâsi mono, wẽ uptabi wa. Mohõnire sara hawi ipĩni waꞌu aꞌa hã te te ꞌre iꞌasoto zei pese mono ne,
14 tane te duré asimirowaihuꞌu wẽ hã aipẽꞌẽzani ma, ise ne hã ꞌre hâimana. A hã ãne na asina ꞌre uwaimrami mono wamhã, te za iwẽ hã aima ꞌre hâimana. Duré marĩ iwẽ aima ꞌre hâimana mono da, sô ꞌre iꞌasimipari mono hã niwamhã isimini da hã mare di.
15 Iwasété norĩ te te ꞌre iꞌmanharĩ zaꞌra mono ne, a hã, sena na ꞌre ihâimana zaꞌra mono norĩ nhorõwa tiwi ꞌre arési mono da hã, asima ꞌre aiꞌabaꞌréi mono tõ, duré sada ꞌre asiwamnhasi mono tõ, asimirosaꞌrata na hã.
16 E marĩ wa. Sena na ꞌre ihâimana zaꞌra mono ahâ na tihâimanazém na ꞌre rereꞌe mono nherẽ, te za apâ hã ꞌre wahutu zaꞌra, hâiwi tipẽꞌẽ ꞌremhã para na ꞌre simasa mono da hã. Tane nherẽ, iwasété norĩ si hã te za ropipa sô ꞌre iwairébé mono hã te te ꞌre uprosi.
17 Asitobꞌru norĩ niha na tãma ꞌre romhâimana zaꞌra mono wamhã, ãma asima ꞌre rowẽ zaꞌra mono tõ.
18 E marĩ wa. Ãne na asima ꞌre irowẽ mono zé hã Uburé Danhibꞌapito te te aiwi waihuꞌu wamhã, te te tãma rowẽ õ di za. Tawamhã ãté te te ãma ꞌrãiwaꞌõmo õ di za, te te tãma irobꞌmanharĩ wasété zém na hã.
19 Iwasété zaꞌra zarina te te aiwi ꞌre roꞌwaꞌré zaꞌra mono õ di za. Duré niha na ꞌre ihâimana zaꞌra mono zéb zô asima ꞌre robꞌruiwapari mono õ di za.
20 E marĩ wa. Niwa aptoꞌo ré niha na ꞌre ihâimana zaꞌra mono zéb da hã marĩ õ uptabi wa za, aiwa robꞌuiwẽzé idâꞌâ pesere ne wa za.
21 Ĩꞌra, maꞌãpé Uburé Danhibꞌapito hã ꞌre wazé mono, duré dama ipire norĩ zama. Duré ã norĩ da, sada ꞌre ihâimana zaꞌra mono norĩ siré hã ꞌre aihâimana mono tõ.
22 E marĩ wa. Ta norĩ hã saꞌẽtẽ waptu na za te te sima robꞌmanharĩ wasété zaꞌra õꞌumnhasite. E wapu bâ aré, Uburé Danhibꞌapito nhimirobꞌmanharĩzé hã, duré dama ipire norĩ nhimirobꞌmanharĩzé hã.
Nima norĩ rowaihuꞌu wẽ hâimanazé wasuꞌu
23 Ã hã, duré aibâ iꞌrãiwaihuꞌu wẽ norĩ nhimiroti:
Daꞌãma rowairébéꞌwa norĩ, danhiniwĩ ihâimana da hã mare di.
24 Niꞌwa marĩ na upaiꞌwa nherẽ, iꞌupaiꞌõꞌwa na te te dama wasuꞌu wamhã, te za da te tãma ꞌre inharĩ wasété zaꞌra mono zé hã sina ꞌre adu. Te za duré uburé sina daꞌanhitiꞌru zani.
25 Tane nherẽ, marĩ na iꞌupaiꞌwa norĩ ma, iꞌuwaibaba na niha na te te tãma pisutu zaꞌra wamhã, te za rowẽzé hã tãma ꞌre hâimana zaꞌra.
26 Sena na dazadawa nhipese ãna dazadaꞌâbâzé hã dasiwaihuꞌu uptabi na sena na dasima ꞌre idahâimana zaꞌra mono, te wasuꞌu.
27 Uimrehẽne asima ꞌri tõ, asima robꞌre pari aꞌâ. Tawamhã a hã iꞌuwaibaba na te za we iꞌmanha, iꞌaihâimana mono zéb da hã.
28 Daꞌãma rowairébézéb ãma, asiré hã dama wasuꞌu wasété tõ, marĩ ãma hâimana õ nherẽ. Asadawa nhipese na asahâi na hã dama wasuꞌu tõ.
29 Niwamhã ãne hã nharĩ tõ: “Aiwab da, wa za ãma tãma waꞌrã, taha na te te ĩma waꞌâbâ da hã, asa!”
30 Wa hã, aibâ iwaꞌa isimizaꞌreseꞌõ buru waꞌwaibaba hã wa tô roꞌrazâ, duré uwa ꞌru na ite buru waꞌwaibaba na zama.
31 Uburé, ma te roꞌwa wede hã duré warõno hã te te suwa. Duré ẽtẽ na iꞌwawi wara siprum haré hã te nomro.
32 Tawamhã ta hã te ꞌmadâꞌâ wamhã, wa tô ãma rosaꞌrata. Taha zarina wa tô duré waihuꞌu, ãne:
33 Ãté ãne te za inha, “Suru na wa za aꞌâ nhono. Duré wa za nasi aꞌâ ĩnhamra sina ĩꞌrãi waptãꞌãre, aptâꞌâ zé te. Wa za duré aꞌâ ĩsitété sina suru na ĩwaꞌutu da hã nomro.”
34 Tane nherẽ, asõtõ ré, te za roꞌwa na isimisaihuri te te ꞌre idasusi zaꞌra mono ne, ꞌre asimarĩ mono õ zé hã oto asusi.
