Provébiu 10:1-32
10 Daꞌra iꞌrãi waihuꞌu wẽ, te za tihâimanazém na timama ma hã te te ãma ꞌre rowẽ zani pese. Tane nherẽ, daꞌra isimizaꞌreseꞌõ niha na ꞌre ihâimana mono hã te za tina wi te te ãma ꞌre robzeiꞌõ zani.
2 Senai õ na ꞌre idahâimana zaꞌra mono zarina, ꞌre idasisimarĩ pese zaꞌra mono hã taré uptabi, marĩ dai õ di. Tane nherẽ, sena na ꞌre idahâimana zaꞌra mono na hã te za dadâꞌâzé wi ãma ꞌre dasisani zaꞌra.
3 Uburé Danhibꞌapito, wẽ na ꞌre ihâimana zaꞌra mono norĩ hã, mra te te ꞌre sépata zaꞌra mono da, te te ꞌre iꞌaꞌmadâꞌâ rẽme mono da hã, mare di. Tane nherẽ, te za wasété na ꞌre inomro mono norĩ wi, marĩ te te sima ꞌre iwẽ uptabi zaꞌra mono hã te te tiwi ꞌre anhito.
4 Tinhibꞌrata na iwaꞌa norĩ te te ꞌre iromhuri zaꞌra mono õ hã te za tinhimarĩ na hã te te ãma siwi ꞌre tiꞌawi pese zaꞌra. Tane nherẽ, niꞌwa siptete na tinhibꞌrata na te te ꞌre iromhuri pese mono si te za tinhimarĩ hã te te ãma sima ꞌre azani.
5 Iꞌrã waihuꞌu wẽ norĩ hã te za amnho itehârizé bâtâ uwaibaba na te te ꞌre roptehâri zaꞌra. Tane nherẽ, niꞌwa roptehârizé bâtâ na ꞌre isõtõ mono hã, te za rowazém na ꞌre ihâimana mono zé hã te te sima ꞌre sani ꞌrâwi.
6 Wẽ na ꞌre ihâimana zaꞌra mono ma si, te za iwẽ hã da te tãma ꞌre pisutu zaꞌra. Tane nherẽ, iwasété norĩ te te ꞌre idawamnarĩ zaꞌra mono da hã te simirosaꞌrata udâ pese na si ꞌre hâimana zaꞌra.
7 Wẽ na ꞌre ihâimana zaꞌra mono norĩ ãma, te za ꞌre dasipoꞌre puꞌu wẽ uꞌâsi zaꞌra ãma hã. Tane nherẽ, te za iwasété norĩ ãma hã awaꞌawi ꞌre dapoꞌre simrami zaꞌra.
8 Iꞌrãi waihuꞌu wẽ ꞌre ihâimana zaꞌra mono hã te za rotizé iwẽ hã te te sina ꞌre uze zaꞌra. Tane nherẽ, timreme na ꞌrâwi ꞌre isiꞌmadâꞌâ pese mono õ hã te za robzeiꞌõ na tihâimana wẽ zé hã siwi uprosi.
9 Sena na ꞌre ihâimana zaꞌra mono norĩ hã te za sima iwẽ na to sina ꞌre nomro. Tane nherẽ, senai õ na ꞌre ihâimana zaꞌra mono norĩ hã te za da te dasiwi ꞌre upsibi nhamra.
10 Niꞌwa hã sena na niha na ꞌre iromhâimana mono zé hã te te dawi ꞌre tété mono wamhã, te za niha na romhâimanazé hã te te dazada ꞌre azani. Tane nherẽ, niꞌwa hã sena na marĩ na te te dama ꞌre arowasuꞌu mono wamhã, te za te te ãma ꞌre daꞌapẽꞌẽ nomri.
11 Sena na ꞌre ihâimana zaꞌra mono norĩ mreme hã, rowẽ na ꞌre idahâimana zaꞌra mono zém naꞌrata da hã te tô dama ꞌre hâimana. Tane nherẽ, iwasété norĩ te te ꞌre idawamnarĩ zaꞌra mono da hã te timreme zô simrami pese na hã ꞌre hâimana zaꞌra.
12 Danhitiꞌru hã te za dasisada dahâimana wasété zé hã te te dazada ꞌre sani zaꞌra. Tane nherẽ, danhimizawizé hã te za dawasédé da te ꞌre iꞌmanharĩ zaꞌra mono zé hã te te ꞌre azuwa, te te daꞌãma ꞌre iꞌaꞌmadâꞌâ mono õ zarina.
13 Iꞌrãi waihuꞌu wẽ norĩ hã te za rowaihu iwẽ na si ꞌre mreme zusi. Tane nherẽ, niha na simizaꞌrese ãna ꞌre ihâimana zaꞌra mono norĩ hã te za da te tãma ꞌre robꞌmanharĩ wasété zaꞌra.
14 Rowaihuꞌu wẽ na ꞌre ihâimana zaꞌra mono norĩ hã te za uburé tinhimizaꞌre wẽ hã te te sima ãma ꞌre hâimo zaꞌra. Tane nherẽ, isimizaꞌreseꞌõ hã ꞌre mreme zusi mono wamhã, te za ropire hã sisada te te ꞌre sani zaꞌra.
15 Isimarĩ pese norĩ ꞌwawimhã te za isibro hã ꞌre simapa zaꞌra. Tane nherẽ, isimarĩꞌõ norĩ hã te za isibrobꞌõ hã te te ꞌre uprosi, simapa waihuꞌu õ wa, marĩ na.
16 Sena na iwẽ na si ꞌre idahâimana zaꞌra mono zé pawaꞌâ hã, rowẽ na ꞌre idahâimana hâ zaꞌra mono zé, te wasuꞌu. Tane nherẽ, dawasété na si ꞌre idanomro mono zé waꞌâ hã dawasédé da te dasima ãma ꞌre ihâimo zaꞌra mono zép si, te wasuꞌu.
17 Niꞌwa hã tihâimana pesezé te te sina ꞌre iꞌuzei mono hã te za rowẽ na ꞌre idanomro mono zép te bâdâdi na hã ꞌre mo. Tane nherẽ, niꞌwa te te sina ꞌre iꞌuzei mono õ hã te za bâdâdi te te ꞌre iꞌupai mono zém na hã isiti ꞌre pusi.
18 Niꞌwa hã ꞌre isitiꞌrui mono zé te te dawi ꞌre udâ mono wamhã, isadawa nhipese na isimirobzanhamrizé, te wasuꞌu. Duré niꞌwa hã dabâsi na te te ãma ꞌre iropéi mono hã, te simizaꞌreseꞌõ na si ꞌre hâimana.
19 Niꞌwa hã te te ꞌre robzanhamri hâ mono wamhã, te za tiwasédé te te ꞌre iꞌmanharĩ mono zéb u hã ꞌrâwi pesere oto ꞌre hâimana. Tane nherẽ, niꞌwa hã niha na ꞌrâwi timreme na ꞌre siꞌmadâꞌâ mono wamhã, te za ta hã ꞌrãi waihuꞌu wẽ ré ꞌre hâimana.
20 Iwẽ norĩ mreme hã te aiwa ẽtẽ waipo prã prata uptabi ne hã ꞌre hâimana zaꞌra. Tane nherẽ, iwasété norĩ nhimirosaꞌrada hã tarére hã, marĩ dai õ di.
21 Iwẽ norĩ mreme hã, te za daꞌahâ uptabi ma hã te te ꞌre robꞌmanharĩ wẽ zaꞌra. Tane nherẽ, isimizaꞌreseꞌõ norĩ hã ꞌrãi waihuꞌu wasété wa, te za ꞌre idadâꞌâ zaꞌra mono zéb u hã ꞌre sisimro.
22 Uburé Danhibꞌapito nhimipawaptobzé wẽ zarina te za danhimarĩ hã dama ꞌre wairébé. Tahawa, duré niꞌwa ꞌrâwi tinhiptete na hã te te ãma sisiwi waihuꞌu õ di, tinhimarĩ na hã.
23 Isimizaꞌreseꞌõ norĩ ma hã marĩ ꞌmanharĩ wasété zé hã se ti, tãma hã. Tane nherẽ, iꞌrãi waihuꞌu wẽ norĩ ma hã rowaihu iwẽ si tãma ise zaꞌra hã.
24 Iwasété norĩ hã marĩ ma, ꞌre ipahi zaꞌra mono zéb zarina, te za tô tãma hã ꞌre romhâimana zaꞌra. Tane nherẽ, sena na iwẽ na ꞌre ihâimana zaꞌra mono norĩ si, te za te te sima ꞌre iwẽ zaꞌra mono hã te te sima ꞌre sani zaꞌra.
25 Rowaꞌu isiptede iwatobro ne, ropire hã sô ꞌre wairébé mono wamhã, te za iwasété norĩ hã ꞌre siꞌutõrĩ. Tane nherẽ, te za sena na iwẽ na ꞌre ihâimana zaꞌra mono norĩ hã tihâimana uꞌâsi zém na siptete na te te ãma ꞌre uzusi zaꞌra.
26 Iwaꞌa hã marĩ te te ꞌre ꞌmanharĩ mono da, da te ꞌre satõrĩ mono wamhã, aiwa â warĩrĩ vinagri te te ꞌre idaꞌwanhihâ zaꞌra mono ne, duré unhama nhizé hã te te ꞌre idatõmo rĩrĩ zaꞌra mono ne, te za dapẽꞌẽ ꞌremhã te te dawi ꞌre roꞌwaꞌré zaꞌra.
27 Uburé Danhibꞌapito, da te ꞌre wazéb zaꞌra mono wamhã, te za ꞌre idahâimana zaꞌra mono zé bâdâ hã dama ꞌre siꞌwani zaꞌra. Tane nherẽ, iwasété norĩ hã te za ꞌre idâꞌâ zaꞌra mono zé bâtâ wana ré hã ꞌre dâꞌâ zaꞌra.
28 Sena na ꞌre ihâimana zaꞌra mono norĩ hã iwẽ uptabi zô ꞌre isimipari zaꞌra mono zéb zarina te za robzei uptabi hã te te sima ꞌre sani zaꞌra. Tane nherẽ, iwasété norĩ hã te te sima ꞌre irowaꞌõtõ zaꞌra mono zé hã marĩ hã te te sima ãma ꞌre sani zaꞌra mono dai õ di.
29 Uburé Danhibꞌapito, iꞌuwaibaba na si ꞌre ihâimana zaꞌra mono norĩ ꞌwawimhã te ꞌre simapa. Tane nherẽ, marĩ iwasédé te te ꞌre iꞌmanharĩ zaꞌra mono norĩ ma hã te za te te ꞌre iꞌuprosi zaꞌra mono zéb da si, te te tãma ꞌre apisutu.
30 Sena na iꞌuwaibaba na si ꞌre ihâimana zaꞌra mono norĩ hã te ꞌmadâꞌâ pese na hã õne uꞌâ ꞌre hâimana zaꞌra. Tane nherẽ, iwasété norĩ hã tiꞌai ãma ꞌre hâimana hutu zaꞌra mono di.
31 Sena na ꞌre ihâimana zaꞌra mono norĩ hã te rowaihu iwẽ na si te te dama ꞌre waihuꞌu zaꞌra. Tane nherẽ, niꞌwa hã timreme wasété na si ꞌre mreme mono wamhã, te za da te ꞌre mreme nhihâri.
32 Sena na ꞌre ihâimana zaꞌra mono norĩ ma hã tãma waihuꞌu pese di, da te ꞌre iwapari ze zaꞌra mono zém na, te te dama ꞌre inharĩ zaꞌra mono zé hã. Tane nherẽ, iwasété norĩ ma hã senaiꞌõ na imreme si duré imreme wasété si tãma waihuꞌu pese di.
