Yuhanno 5:1-47
5 Bu hodisalardan so‘ng yahudiylarning bayrami boshlandi+ va Iso Quddusga ketdi.
2 Quddusda esa Qo‘y darvozasi+ yonida, atrofi beshta ustun bilan o‘ralgan hovuz bor edi. Ibroniychada u Baytzata, deb nomlanadi.
3 U yerda ko‘p kasallar, ko‘rlar, cho‘loqlar va oyoq-qo‘llari qurib qolganlar yotishardi.
4 * ——
5 Ular orasida 38 yildan buyon kasal bo‘lib yotgan kishi bor edi.
6 Iso bu odamning yotganini va ancha vaqtdan beri dardga chalinganini ko‘rib, undan: «Sog‘ayishni istaysizmi?»+ — deb so‘radi.
7 Bemor unga javoban: «Taqsir, suv to‘lqinlanganda meni hovuzga tushiradigan hech kimim yo‘q. O‘zim yetib borgunimcha, boshqasi mendan oldin tushib oladi»,— dedi.
8 Iso unga: «Qani, o‘rningizdan turib, to‘shagingizni ko‘taring-da, yuravering»+,— deb aytdi.
9 O‘sha odam shu ondayoq sog‘aydi va to‘shagini ko‘tarib, yura boshladi.
U kun Shabbat* edi.
10 Shu sababli ayrim yahudiylar sog‘aygan kishiga: «Bugun Shabbat va to‘shak ko‘tarib yurishing noqonuniy»+,— deyishdi.
11 Ammo u shunday dedi: «Meni sog‘aytirgan odam: “To‘shagingizni ko‘taring-da, yuravering”,— degan».
12 Ular bu kishidan so‘rashdi: «Kim u, senga: “To‘shagingizni ko‘taring-da, yuravering”,— degan?»
13 Sog‘aygan kishi uning kimligini bilmasdi, boisi Iso o‘sha yerdagi olomonga aralashib, ko‘zdan g‘oyib bo‘lgan edi.
14 Keyinroq Iso uni ma’badda uchratib, shunday dedi: «Mana, endi sog‘aydingiz. Bundan battariga yo‘liqmaslik uchun, boshqa gunoh qilmang».
15 Bu odam borib, ayrim yahudiylarga uni Iso sog‘aytirganini aytdi.
16 Shunda ular Isoni ta’qib qila boshlashdi, chunki u bunday ishlarni Shabbat kuni qilayotgan edi.
17 Iso esa ularga: «Otam hanuzgacha mehnat qilib kelyapti, men ham mehnat qilyapman»+,— dedi.
18 Ayrim yahudiylar buni eshitib, uni o‘ldirish payiga tushishdi. Axir u nafaqat Shabbat kunining qoidasini buzdi, balki Xudoni Otam deb atab+, o‘zini Unga tenglashtirdi+.
19 Shunda Iso ularga qarata quyidagilarni aytdi: «Ishonavering, O‘g‘il o‘z ixtiyori bilan hech narsa qila olmaydi, aksincha, Otasidan ko‘rganlarini qiladi+. Ota nimaiki qilsa, O‘g‘il ham shuni bajaradi.
20 Zero Ota O‘g‘lini sevadi+ va qilayotgan barcha ishlarini unga ko‘rsatmoqda hamda sizlarni taajjubga solish uchun bundan ham ortiqrog‘ini namoyon etadi+.
21 Ota o‘liklarni tiriltirib, hayot baxsh etayotgani kabi+, O‘g‘il ham istagan kishiga hayot baxsh etadi+.
22 Ota hech kimni hukm qilmaydi, balki hukm qilish huquqini butunlay O‘g‘ilga bergan+.
23 Toki barcha Allohni ulug‘laganiday, O‘g‘ilni ham sharaflasin. Kimki O‘g‘ilni hurmat qilmasa, uni yuborgan Otani ham hurmat qilmagan bo‘ladi+.
24 Ishonavering, so‘zimni tinglab, meni Yuborganga ishongan kishi, abadiy hayotga egadir+. U hukm etilmaydi, negaki u o‘limdan hayotga o‘tgan+.
25 Ishonavering, o‘lganlar Xudo O‘g‘lining ovozini eshitadigan vaqt kelyapti va o‘sha vaqt keldi ham. Uning ovoziga quloq tutganlar tiriladi.
26 Ota hayot ato etish qudratiga ega bo‘lganidek+, O‘g‘ilga ham hayotbaxsh kuch bergan+.
27 Shuningdek, unga hukm etish huquqini bergan+, zero u Inson O‘g‘lidir+.
28 Bunga taajjublanmanglar, chunki shunday vaqt kelyaptiki, mozorlarda* bo‘lgan hamma uning ovozini eshitib+
29 chiqadi: yaxshilik qilganlar yashash uchun, yomonlik qilganlar esa hukm etilish uchun tiriladi+.
30 Men o‘zimcha hech narsa qila olmayman. Eshitganim bo‘yicha hukm qilaman va mening hukmim adolatlidir+, boisi men o‘z xohishimni emas, meni Yuborganning irodasini bajarishga intilaman+.
31 Agar men o‘zim haqimda o‘zim shohidlik berayotgan bo‘lsam, unda shahodatim haqiqiy emas+.
32 Men haqimda boshqa shohidlik beruvchi bor va men Uning shohidligi chin ekanini bilaman+.
33 Sizlar Yahyoning yoniga odamlarni yubordingizlar va u haqiqat to‘g‘risida shohidlik berdi+.
34 Men insonning shohidligiga muhtoj emasman, lekin buni qutqarilishingiz uchun aytyapman.
35 Bu odam porlab, nur sochayotgan chiroq edi, ammo sizlar oz vaqt uning nurida quvonishni istadingiz+.
36 Biroq men Yahyoning shohidligidan ham buyukroq shohidlikka egaman. Chunki Otam menga bajarishni buyurgan va men bajarayotgan aynan shu ishlar, meni Otam yuborganidan shahodat berib turibdi+.
37 Ustiga-ustak, meni yuborgan Otamning O‘zi men haqimda shohidlik berdi+. Sizlar esa Uni hech qachon eshitmagansiz, qiyofasini ham ko‘rmagansiz+.
38 Uning so‘zlari ham ko‘ngillaringizdan joy olmaydi, negaki sizlar U yuborgan kishiga ishonmayapsiz.
39 Sizlar Muqaddas Yozuvlarni sinchiklab tekshirasiz+, chunki bular orqali abadiy hayotga erishamiz, deb o‘ylaysiz. Aynan ular men haqimda shohidlik beryapti-ku+.
40 Lekin sizlar hayotga ega bo‘lish uchun oldimga kelishni xohlamayapsiz+.
41 Men insonlardan shon-sharaf orttirishni istamayman.
42 Faqat shuni bilamanki, qalblaringizda Allohga muhabbat yo‘q.
43 Men Otamning nomidan keldim, ammo sizlar meni qabul qilmayapsiz. Bordi-yu, boshqa kimsa o‘z nomidan kelganida, uni qabul qilgan bo‘lardingiz.
44 Bir-biringizdan tahsin olasiz-u, Xudodan tahsin olishga intilmas ekansiz, unda qanday ishonishingiz mumkin?+
45 Sizlarni Otam oldida ayblayman, deb o‘ylamang. Sizlarni ayblovchi, o‘zingiz umid bog‘lagan Musodir+.
46 Agar Musoga ishonganingizda edi, menga ham ishonar edingiz. Zero u men haqimda yozgan+.
47 Uning yozganlariga ishonmas ekansiz, mening so‘zlarimga qanday ishonasiz?»
