Vahiy 11:1-19
11 Menga hassadek uzun qamish tayoq*+ berilib, mana bu so‘zlar aytildi: «Tur, Xudoning ma’badini*, qurbongohni va u yerda topinayotganlarni o‘lcha.
2 Ma’badning tashqarisidagi hovlini esa o‘lchama, chunki u boshqa xalqlarga berilgan. Ular muqaddas shaharni+ 42 oy+ poymol etishadi.
3 Men ikkita shohidimni yuboraman va ular jul kiyimda 1 260 kun bashorat qilishadi».
4 Ular ikkita zaytun daraxti+ va ikkita chiroqpoya+ sifatida tasvirlangan bo‘lib, yer yuzining Rabbi oldida turishibdi+.
5 Kimki ularga zarar yetkazmoqchi bo‘lsa, og‘izlaridan olov chiqib, dushmanlarini yo‘q qiladi. Ularga ziyon keltirishni istagan har kim shu tariqa o‘ldiriladi.
6 Bu kishilar bashorat qilayotgan vaqtda yomg‘ir yog‘masin+, deya osmon yuzini yopish qudratiga ega+. Shuningdek, ular suvni qonga aylantirish+ va istagan paytlarida yerni har turli balolarga duchor qilishga qodir.
7 Ular shohidlik qilishni tugatishganda, tubsizlikdan chiqayotgan yirtqich hayvon ular bilan jang qiladi va g‘olib chiqib, ularni o‘ldiradi+.
8 Ularning jasadi majoziy ma’noda Sado‘m va Misr deb ataladigan buyuk shaharning asosiy ko‘chasida, ularning Hazrati ustunga mixlangan joyda yotadi.
9 Barcha xalqlar, qabilalar, tillar va millatlardan bo‘lgan insonlar uch yarim kun ularning jasadlariga boqishadi-yu+, jasadlarini qabrga qo‘yishga ijozat berishmaydi.
10 Yer yuzida yashovchilar ularning o‘limidan quvonib, bayram qilishadi va bir-birlariga sovg‘alar yuborishadi. Sababi, bu ikkita payg‘ambar yer yuzida yashovchilarni azoblagan edi.
11 Ammo uch yarim kundan so‘ng ularga Allohdan kelgan hayot ruhi kirib+, ular oyoqga turishdi. Shunda buni ko‘rganlarni kuchli qo‘rquv bosdi.
12 Ular samodan: «Bu yerga chiqinglar»,— degan baland ovozni eshitishdi. Ular bulut ichida osmonga ko‘tarilishdi, dushmanlari esa ularni ko‘rib turishdi.
13 Shu onda qattiq zilzila yuz berib, shaharning o‘ndan bir qismi vayron bo‘ldi. Zilziladan 7 000 odam o‘ldi, qolganlari esa dahshatga tushib, samodagi Xudoga hamd-u sano aytdilar.
14 Ikkinchi kulfat+ o‘tib ketdi. Lekin uchinchi kulfat tezlik bilan yaqinlashib kelmoqda.
15 Yettinchi farishta karnayini chaldi+. Osmonda baland ovozlar yangradi: «Endi dunyo ustidan shohlik qilish Rabbimiz+ va Uning Masihiga tegishlidir+. U abadulabad hukm suradi»+.
16 Shunda Xudoning huzurida o‘z taxtlarida o‘tirgan 24 oqsoqol+ yuztuban tiz cho‘kib Allohga sajda qildi.
17 Ular: «Hozir bor, o‘tmishda ham bor bo‘lgan, Qodir Tangri Yahova*+, Senga shukrlar aytamiz. Zero Sen buyuk hokimiyatni egallab shohlik qila boshlading+.
18 Ammo xalqlar g‘azabga mindi, Sen ham O‘z g‘azabingni ko‘rsatding. O‘lganlarni hukm qilib, qullaring bo‘lmish payg‘ambarlarga+, muqaddas kishilarga, Sening ismingdan qo‘rqqan katta-yu kichikka mukofot berding+. Nihoyat, yerni xarob etuvchilarni xarob qilish uchun belgilangan vaqt keldi»+.
19 Osmonda Xudoning ma’badi* ochilib, Uning ahd sandig‘i ko‘rindi+. Shu onda chaqmoqlar chaqib, ovozlar yangradi, momaqaldiroq gumburlab, zilzila yuz berdi va kuchli do‘l yog‘di.
Izohlar
^ Yoki «o‘lchov tayog‘i».
^ Ya’ni Muqaddas xona va Eng muqaddas xonani o‘z ichiga oluvchi ma’badning markaziy hashamatli binosi.
^ Ya’ni ma’badning Eng muqaddas xonasi.