Ko oi te Igoa o te Atua? Ko te Atua eiloa ne fai mai penei: “Au ko Ieova. Tenā toku igoa.” (Isaia 42:8) A te igoa totino o te Atua e sae mai faka-7,000 taimi i te Tusi Tapu. Kae tiga i ei, e uke a nisi ‵fuliga o te Tusi Tapu ne sui ne latou a te igoa tenei ki se ‵tofi, e pelā mo te “Aliki.” E manako te Atua ke fai koe mo taugasoa o ia, tela la, e fakamalosi mai a ia ki a koe ke “kalaga atu ki tena igoa.”—Salamo 105:1.

Tofi o Ieova. E fakasino mai i te Tusi Tapu a tofi o Ieova e pelā me ko te “Atua,” “Atua Malosi Katoatoa,” “Mafuaga,” “Tamana,” “ Te Aliki,” mo “Te Aliki Sili.” E uke a ‵talo ne fakamau ki lalo i te Tusi Tapu e fakaaoga ei se ‵tofi fakatasi mo tena igoa totino, ko Ieova.—Tanielu 9:4.

 Foliga o te Atua. A te Atua se agaga telā e se mafai o lavea. (Ioane 4:24) Ne fakamautinoa mai ne te Tusi Tapu me e “seai se tino kai lavea ne ia te Atua.” (Ioane 1:18) E fakaasi mai i te Tusi Tapu ana lagonaga. E mafai o fakafanoanoa ne tino a ia, io me ‘aumai ne latou te fiafia ki a ia ia.’—Faataoto 11:20; Salamo 78:40, 41.

Uiga ‵Gali o te Atua. A te Atua e se fakailoga tino mai fenua mo koga kese‵kese. (Galuega 10:34, 35) A ia foki e “alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu.” (Esoto 34:6, 7) Kae e fa a uiga ‵gali kae tu ‵kese o te Atua.

Malosi. Ona i a ia se “Atua Malosi Katoatoa,” e se fakanafagina tena malosi ke fai ne ia so se mea ko oti ne tauto ke fai ne ia.—Kenese 17:1.

Poto. A te poto o te Atua e sili fakafia atu i lō poto o nisi tino. Me ne fai mai eiloa te Tusi Tapu me “ko ia fua tokotasi e poto.”—Loma 16:27.

Fai Mea Tonu. E fai faeloa ne te Atua te mea tonu. Ana faifaiga e “‵lei katoatoa,” kae ko ia “e se mafai o ‵se.”—Teutelonome 32:4.

Alofa. E fai mai te Tusi Tapu me i te “Atua ko te alofa eiloa a ia.” (1 Ioane 4:8) E se gata fua i te fakaasi atu ne ia te alofa—a ia ko te alofa eiloa. A tena alofa sē fuafuagina tenei e lavea atu i ana mea katoa e fai, kae e aoga ki a tatou i auala e uke.

Te Vā Fakataugasoa o te Atua mo Tino. A te Atua ko te ‵tou Tamana alofa i te lagi. (Mataio 6:9) Kafai e fakatuanaki tatou ki a ia, ka fai eiloa tatou mo ana taugasoa. (Salamo 25:14) A te ‵tonuga loa, e ‵kami ne te Atua koe ke fakapilipili atu ki a ia e auala i ‵talo kae ke “‵pei atu ei ne koutou otou manava‵sega katoa ki luga i a ia, me e atafai a ia ki a koutou.”—1 Petelu 5:7; Iakopo 4:8.

A Iesu e se ko te Atua. E ‵kese ‵ki a Iesu—ko ia tokotasi fua ne faite ne te Atua ki ana lima. Tenā te pogai e taku ei a ia i te Tusi Tapu me ko te Tama a te Atua. (Ioane 1:14) I te otiga ne faite a Iesu, ne fakaaoga ne Ieova tena uluaki e pelā me se “tufuga apo i te faite mea” ke faite a nisi mea aka katoa mo tino.—Faataoto 8:30, 31; Kolose 1:15, 16.

 Ne seki manako a Iesu Keliso ke ‵pau mo te Atua. I lō te fai penā, ne fai mai a ia: “I a au ko tena sui [Atua], kae ko te Atua telā ne uga mai ne ia au.” (Ioane 7:29) I te taimi ne faipati atu a ia ki se tokotasi o ana soko, ne kalaga atu a Iesu ki a Ieova “toku Tamana telā ko te otou Tamana” mo “toku Atua telā ko te otou Atua.” (Ioane 20:17) I te otiga ne mate a Iesu, ne fakatu aka ne Ieova a ia ki te ola i te lagi kae tuku atu ki ei te malosi pule i Tena lima fakaatamai.—Mataio 28:18; Galuega 2:32, 33.

Ka Fesoasoani Atu a Iesu Keliso ke Fakapilipili Atu Koe ki te Atua

Ne vau a Iesu ki te lalolagi nei o akoako tatou e uiga ki tena Tamana. Ko Ieova eiloa ne fai mai penei e uiga ki a Iesu: “Tenei eiloa taku tama, ko taku fagasele. Faka‵logo ki a ia.” (Maleko 9:7) E iloa ‵lei ne Iesu a te Atua i lō nisi tino aka. Ne fai mai a ia penei: “E seai foki se tino e iloa ne ia te Tamana kae na ko te Tama, mo so se tino telā e manako te Tama o fakaasi atu ki ei.”—Luka 10:22.

E fakaata katoatoa mai ne Iesu a uiga ‵gali o te Atua. Ne fakaakoako a Iesu ki uiga ‵gali o tena Tamana telā ne mafai o fai mai a ia penei: “So se tino e kilo mai ki a au ko kilo foki ki te Tamana.” (Ioane 14:9) Ne ‵taki atu ne Iesu a tino ki te Atua mai te fakaasi atu o te alofa o te Tamana e auala i ana pati mo faifaiga ki a latou. Ne fai mai a ia penei: “Au ko te auala mo te munatonu mo te ola. E seai se tino e fanatu ki te Tamana māfai e se auala mai i a au.” (Ioane 14:6) Ne toe fai mai foki a ia: “Ka tapuaki atu ei a tino tapuaki ‵tonu ki te Tamana i te agaga mo te munatonu, me e ‵sala eiloa te Tamana ki tino penei ke tapuaki atu ki a ia.” (Ioane 4:23) Ke mafau‵fau ki te mea tenei! A Ieova e ‵sala ki tino e penā mo koe kolā e ma‵nako o tauloto ki te munatonu e uiga ki a ia.