Te Tusi a Mataio 6:1-34
6 “Fakaeteete ke mo a ma fakaasiasi te otou amiotonu i mua o tino ko te mea ke matea ne latou;+ me ka seai se otou taui e maua mai i te otou Tamana telā i te lagi.
2 Tela la, kafai e avatu ne koe au meaalofa,* sa fakatagi mua ne koe se pu e pelā mo mea e fai ne tino ‵loi i sunako mo auala, ko te mea ke tavae latou ne tino. Au e fai ‵tonu atu ki a koutou, ko maua katoatoa eiloa ne latou te lotou taui.
3 Kae ko koe, kafai e avatu au meaalofa, ke mo a ma iloa ne tou lima fakamaui a te mea e fai ne tou lima fakaatamai,
4 ko te mea ke se iloa ne tino au meaalofa. Ko avatu ei ne tou Tamana telā e kilokilo mai i te koga sē lavea a tou taui.+
5 “Kafai foki koutou e ‵talo, sa fai pelā mo tino ‵loi+ me e fia ‵tu latou o ‵talo i sunako mo maga o auala ko te mea ke matea latou ne tino.+ Au e fai ‵tonu atu ki a koutou, ko maua katoatoa eiloa ne latou te lotou taui.
6 Kae kafai koe e ‵talo, ulu ki loto i tou potu, ‵pono te mataloa, kae ‵talo ki tou Tamana telā e nofo i te koga sē lavea.+ Tenā ko avatu ei ne tou Tamana telā e kilokilo mai i te koga sē lavea a tou taui.
7 Kafai koe e ‵talo, sa fakafoki‵foki au pati e pelā mo mea e fai ne tino o fenua fakaa‵tea, me e mafau‵fau latou me ka lagona olotou ‵talo i te fakaaogaga o pati e uke.
8 Tela la, sa fai pelā mo latou, me e iloa ne te otou Tamana a mea kolā e ma‵nako koutou ki ei+ kae koi tuai o fakatagi atu koutou ki a ia.
9 “E ‵tau mo koutou o ‵talo atu penei:+
“‘Te motou Tamana telā i te lagi, ke tapu+ tou igoa.+
10 Ke oko mai tou Malo.+ Ke fai te mea e loto+ koe ki ei i te lalolagi nei e pelā mo te faiga i te lagi.+
11 Tuku mai omotou meakai e ‵tau mō te aso nei;+
12 kae fakamagalo mai omotou agasala,* e pelā foki mo matou e fakamagalo atu ki tino kolā e agasala* mai ki a matou.+
13 Kae sa takitakigina matou ki se tofotofoga,+ kae faka‵sao mai matou mai te tino masei.’+
14 “Me kafai e fakamagalo ne koutou a agasala a tino, ka fakamagalo foki koutou ne te otou Tamana telā i te lagi;+
15 kae kafai e se fakamagalo ne koutou a agasala a tino ka se fakamagalo foki otou agasala ne te otou Tamana.+
16 “Kafai koutou e fakaliki‵liki+ sa mata fanoa‵noa e pelā mo tino ‵loi, me e fakama‵sei ne latou olotou mata* ko te mea ke foliga atu ki tino i a latou e fakaliki‵liki.+ Au e fai ‵tonu atu ki a koutou, ko maua katoatoa eiloa ne latou te lotou taui.
17 Kae ko koe, kafai e fakalikiliki, ‵mili tou ulu ki te sinu kae ‵fulu ou mata,
18 ko te mea ke se iloa ne tino i a koe e fakalikiliki, kae na ko tou Tamana fua telā e nofo i te koga sē lavea. Tenā ko tuku atu ei ne tou Tamana telā e kilokilo mai i te koga sē lavea a tou taui.
19 “Ko lava te fakaputu o koloa mō koutou i te lalolagi nei,+ me e oko ki ei a mogamoga* mo te pala kae oko foki ki ei a tino o kaisoa ne latou.
20 Kae fakaputu ne otou koloa i te lagi,+ me e se oko ki ei a mogamoga mo te pala kae e se oko foki ki ei+ a tino o kaisoa ne latou.
21 Me ko te koga e tuku i ei otou koloa, ka tuku foki i ei otou loto.
22 “A te moli o te foitino ko mata.+ Tela la, kafai e ‵saga tonu atu* ou mata, ka maina tou foitino kātoa.
23 Kae kafai ou mata e kaisanosano,*+ ka pouli tou foitino kātoa. Kafai la e pouli ‵ki te mainaga telā i loto i a koe, ko oko eiloa te lasi o te pouliga tenā!
24 “E seai se tino e mafai o tavini ki matai e tokolua; me ka takalialia a ia ki te tino e tokotasi kae alofa ki te suā tino,+ io me ka ‵piki a ia ki te tino e tokotasi kae e se fiafia ki te suā tino. E se mafai o tavini koutou ki te Atua fakatasi mo Koloa.+
25 “Ona ko te mea tenei, au e fai atu ki a koutou: Ko lava te manava‵se+ ki otou ola, ki mea ka ‵kai ei koutou io me ko mea ka inu ei koutou, io me ki otou foitino ki gatu ka ‵pei ei koutou.+ E mata, e se tāua atu te ola i lō meakai mo te foitino i lō gatu?+
26 Onoono faka‵lei ki manu eva i te lagi;+ e se ‵toki fuaga io me tau fuataga io me fakaputu meakai ki olotou fale koloa, kae e fagai eiloa latou ne te otou Tamana i te lagi. E a, e se sili atu la te tāua o koutou i lō latou?
27 Ko oi i a koutou konā, e mafai o fakaopoopo ne ia se kupita* e tasi ki tena ola ona ko te manavase?+
28 Kaia foki e manava‵se ei koutou ki gatu? Ke mafaufau faka‵lei ki te auala e ola ei a pulalakau o te vao, e se ga‵lue io me ‵laga gatu;
29 kae e fai atu au ki a koutou ke oko foki eiloa ki a Solomona+ i tena ‵malu katoatoa ne seki pei eiloa ki se gatu gali e penei mo se pulalakau e tasi i pulalakau konei.
30 Tela la, kafai tenei te auala ne fakalavalava ei ne te Atua a lakau o te vao kolā e ola mai i te aso nei kae taeao ko ‵pei ki te ogaumu, ka se sili atu la te fakalavalava ne ia o koutou konā e fo‵liki otou fakatuanaki?
31 Tela la, ke mo a ma manava‵se koutou+ kae fai aka, ‘Ne a ‵tou mea ka kai?’ io me, ‘Ne a ‵tou mea ka inu?’ io me ‘Ne a mea ka ‵pei tatou ki ei?’+
32 Me i mea katoa konei ko mea e ‵sala malosi ki ei a fenua fakaa‵tea. E iloa ne te otou Tamana i te lagi me ma‵nako koutou ki mea katoa konei.
33 “Tela la, ke ‵sala muamua faeloa ne koutou te Malo mo tena amiotonu, kae ka fakaopoopo atu a nisi mea katoa konei ki a koutou.+
34 Tela la, ke mo a ma manava‵se ki te aso ma taeao,+ me e manavase eiloa te aso ma taeao ki ana mea. E tofu eiloa te aso mo ana fakalavelave.
Fakamatalaga mai lalo
^ Eleni, “kaitalafu.”
^ Eleni, “kaitalafu i a matou.”
^ Io me “e se fia ‵saga atu ki olotou foliga.”
^ A te pati Eleni e fakasino ki se tamā manu telā e kai ne ia a gatu.
^ Io me “manino.” Eleni, “faigofie.”
^ Eleni, “masei; matagā.”