Salimo 36:1-12
Kwa wakulongozga sumu. Salimo la Davide, muteŵeti wa Yehova.
36 Ubudi ukuyowoya na muheni mukati mu mtima wake.Palije kopa Chiuta pamaso pake.+
2 Pakuti wakujipusika chomene mu maso ghake,Wakutondeka kumanya mphuvya zake na kuzitinkha.+
3 Mazgu gha mu mulomo wake ngakupweteka na ghakupusika.Walije mahara ghakuchitira viwemi.
4 Wakunozga viŵembu uku wali pa bedi lake.
Wakhazikika mu nthowa iyo njiwemi chara,Wakukana chara uheni.
5 A Yehova, lusungu* lwinu lukufika kuchanya,+Kugomezgeka kwinu kukufika ku mabingu.
6 Urunji winu uli nga ni mapiri ghakuru.*+Vyeruzgo vinu vili nga ni maji ghanandi ghakunyang’amira.+
Munthu na chinyama mukuvisunga,* mwe Yehova.+
7 Lusungu* lwinu ndwakuzirwa nadi, A Chiuta!+
Ŵana ŵa ŵanthu ŵakubisama,Mu mfwiri wa mapapindo ghinu.+
8 Ŵakumwa na gee vyakunowa* vya mu nyumba yinu,+Ndipo mukuŵamweska vya mu mlonga wa vinthu vinu vyakukondweska.+
9 Chisimi cha umoyo chili na imwe.+Na ungweru winu tikuwona kungweluka.+
10 Lutilirani kulongora lusungu* lwinu ku awo ŵakumumanyani,+Na urunji winu ku ŵakunyoloka mu mtima.+
11 Mungazomerezganga chara kuti lundi la wakujikuzga linikande,Panji woko la muheni kunichimbizga.
12 Ŵaheni ŵawira penepara.Ŵadwekulika pasi ndipo ŵangawuka chara.+
Mazgu Ghamusi
^ Panji kuti, “chitemwa chakugomezgeka.”
^ Mazgu gheneko, “nga ni mapiri gha Chiuta.”
^ Panji kuti, “mukuviponoska.”
^ Panji kuti, “Chitemwa chakugomezgeka.”
^ Mazgu gheneko, “vyamafuta.”
^ Panji kuti, “chitemwa chakugomezgeka.”
