Salimo 115:1-18
115 Kwa ise chara, A Yehova, kwa ise chara,*Kweni pelekani uchindami ku zina linu+Chifukwa cha lusungu* lwinu na kugomezgeka kwinu.+
2 Kasi ŵamitundu ŵayowoyerechi kuti:
“Chiuta wawo wali nkhu?”+
3 Chiuta withu wali kuchanya.Wakuchita chilichose icho wakhumba.
4 Ŵangoza ŵawo ni siliva na golide,Mulimo wa mawoko gha ŵanthu.+
5 Mulomo ŵali nawo kweni ŵakuyowoya yayi,+Maso, kweni ŵakuwona chara.
6 Makutu ŵali nagho kweni ŵakupulika chara,Mphuno, kweni ŵakunuska chara.
7 Mawoko ŵali nagho kweni ŵakukora chara,Malundi, kweni ŵakwenda chara.+Ŵakufumiska chara mazgu pa chigolomiro chawo.+
8 Ŵanthu awo ŵakuŵapanga ŵaŵenge nga ndiwo,+Na wose awo ŵakuŵathemba.+
9 We Israyeli, themba Yehova+—Ni movwiri wawo na chiskango chawo.+
10 We nyumba ya Aroni,+ themba Yehova—Ni movwiri wawo na chiskango chawo.
11 Imwe mukopa Yehova, thembani Yehova+—Ni movwiri wawo na chiskango chawo.+
12 Yehova wakutikumbuka ndipo watumbikenge,Watumbikenge nyumba ya Israyeli,+Watumbikenge nyumba ya Aroni.
13 Watumbikenge awo ŵakopa Yehova,Ŵachoko na ŵakuru wuwo.
14 Yehova wamwandaniskaninge,Imwe na ŵana ŵinu.+
15 Mutumbikike na Yehova,+Uyo wali kulenga kuchanya na charu chapasi.+
16 Kuchanya nkhwa Yehova,+Kweni charu chapasi wali kuchipeleka ku ŵana ŵa ŵanthu.+
17 Ŵakufwa ŵakumulumba chara Ya,+Nanga ni awo ŵakukhilira ku nyifwa uko kuli yii.+
18 Kweni ise tilumbenge YaKwamba sono m’paka muyirayira.
Lumbani Ya!*
Mazgu Ghamusi
^ Panji kuti, “Kwa ise kulije kalikose, A Yehova, kwa ise kulije kalikose.”
^ Panji kuti, “chitemwa chakugomezgeka.”
^ Panji kuti, “Aleluya.” “Ya” nkhudumura kwa zina lakuti Yehova.
