Fakatatau ki ha līpooti mei he Centers for Disease Control and Prevention ʻi ʻAmelika, ko e meimei vaeua ʻo e faʻahinga kotoa naʻe fakaʻekeʻeké mei he taʻu 15 ki he 19 naʻe kau ʻi he fehokotaki fakasino ngutú. “Kapau te ke talanoa ki ha toʻutupu [fekauʻaki mo e fehokotaki fakasino ngutú] te nau tala atu ʻoku ʻikai ko ha fuʻu meʻa lahi ia,” ko e lau ia ʻa Sharlene Azam, ko e faʻutohi ʻo e Oral Sex is the New Goodnight Kiss. “Ko hono moʻoní, ʻoku ʻikai te nau vakai ki ai ko ha fehokotaki fakasino ia.”

•  Ko e hā hoʻo fakakaukaú?

•  Ko e hā ʻa e ngaahi moʻoniʻi meʻá?

•  Ko e hā ʻoku mahuʻinga aí?

 Tali ʻa e ngaahi fehuʻi ko ení ʻio pe ʻikai.

1.   ʻE lava ha taʻahine ʻo feitama mei ha fehokotaki fakasino ngutu?

   1.  A. ʻIo

   2.  E. ʻIkai

2.   ʻOku uesia ʻe he fehokotaki fakasino ngutú ʻa hoʻo moʻui leleí?

   1.  A. ʻIo

   2.  E. ʻIkai

3.   Ko e fehokotaki fakasino ngutú ko e fehokotaki fakasino moʻoni?

   1.  A. ʻIo

   2.  E. ʻIkai

 Fakahoa hoʻo ngaahi talí mo e ngaahi meʻa ko ení.

1.   ʻE lava ha taʻahine ʻo feitama mei ha fehokotaki fakasino ngutu?

    Tali: ʻIkai. Ko e ʻuhinga ia ʻe taha ʻoku fakamulituku hala ai ʻa e kakai tokolahi ko e fehokotaki fakasino ngutú ʻoku ʻikai hano maumau.

2.   ʻOku uesia ʻe he fehokotaki fakasino ngutú ʻa hoʻo moʻui leleí?

    Tali: ʻIo. Ko ha taha ʻoku fehokotaki fakasino ngutu ʻe lava ke ne maʻu ʻa e hepataitisi (A pe B), lefetona ʻi he konga fakafanaú, konolia, hēpisi, ʻeitisi mo e sifilisi.

3.   Ko e fehokotaki fakasino ngutú ko e fehokotaki fakasino moʻoni?

    Tali: ʻIo. Ko ha faʻahinga founga pē ʻoku kau ki ai hono ngāueʻaki ha konga fakafanau ʻo ha taha, ʻo kau ai e fehokotaki fakasino ngutu, fehokotaki fakasino he halanga tuʻumamaʻó mo hono ngāngaahi ha konga fakafanau ʻo ha taha, ʻoku kaunga kotoa ia ki he fehokotaki fakasinó.

 Fakakaukau angé ki ha ngaahi veesi ʻi he Tohi Tapú ʻoku felāveʻi pea mo e kaveinga ʻo e fehokotaki fakasino ngutú.

 ʻOku pehē ʻe he Tohi Tapú: “Ko e finangalo eni ʻo e ʻOtuá, ʻoku totonu ke mou . . . fakaʻehiʻehi mei he fehokotaki fakasino taʻetāú.”​—1 Tesalonaika 4:3.

 Ko e muʻaki foʻi lea naʻe liliu ko e “fehokotaki fakasino taʻetāú” ʻoku ʻuhinga ia ki he kotoa ʻo e fehokotaki fakasino ʻi tuʻa ʻi he nofo malí, kau ai e fehokotaki fakasino ngutu, fehokotaki fakasino he halanga tuʻumamaʻó mo hono ngāngaahi ha konga fakafanau ʻo ha taha. Ko ha taha ʻoku fehokotaki fakasino taʻetaau ʻe lava ke ne utu ha nunuʻa mātuʻaki fakamamahi, ka ko e kovi tahá ko ʻene maumauʻi ʻa hono vahaʻangatae mo e ʻOtuá.​—1 Pita 3:12.

 ʻOku pehē ʻe he Tohi Tapú: “ʻIlonga ʻa ia ʻokú ne tōʻongaʻaki ʻa e fehokotaki fakasino taʻetāú ʻoku faiangahala ia ki hono sino pē ʻoʻoná.”​—1 Kolinitō 6:18.

 Ko e fehokotaki fakasino ngutú ʻoku lava ke ʻi ai hono nunuʻa fakamamahi fakaesino mo fakalaumālie. ʻOku toe lava ke fakamamahi fakaeongo. “Ko e ongoʻi feifeitamakí, fakaʻiseʻisá pe ongoʻi tuēnoa ʻi he hili ʻa e fehokotaki fakasino ngutú ʻoku ʻikai toe kehe ia mei he fehokotaki fakasino anga-mahení,” ko e lau ia ʻa e tohi Talking Sex With Your Kids. “Ko e kotoa ʻo e ngaahi ongoʻi feifeitamaki ʻa ha taha mei he fehokotaki fakasino ʻi ha tuʻunga halá ʻoku lava ke ne maʻu ia mei ha faʻahinga fehokotaki fakasino pē ʻi ha founga hala. Ko e fehokotaki fakasinó ko e fehokotaki fakasino.”

 ʻOku pehē ʻe he Tohi Tapú: “Ko au Sihova, ko ho ʻOtuá, ʻa e Tokotaha ʻokú ne akoʻi koe ke ke maʻu ʻaonga aí.”​—ʻAisea 48:​17.

 ʻOkú ke tui ko e ngaahi lao ʻa e ʻOtuá fekauʻaki mo e fehokotaki fakasinó ʻoku ʻaonga moʻoni kiate koe? Pe ʻokú ke fakakaukau ʻokú ne fakangatangata koe? Ke tokoniʻi koe ke tali e ngaahi fehuʻi ko iá, fakakaukau ki ha fuʻu hala femoʻuekina ʻoku tuʻu ai ha vave fakangatangata, ngaahi fakaʻilonga hala mo e ngaahi fakaʻilonga tuʻu. ʻOkú ke vakai ki he ngaahi fakaʻilonga ko iá ko ha fakangatangata pe ko ha maluʻi? Ko e hā ʻe hokó kapau ʻe tukunoaʻi ʻe koe mo e kau fakaʻuli kehé ʻa e ngaahi fakaʻilongá?

 ʻOku meimei tatau ia mo e ngaahi tuʻunga ʻa e ʻOtuá. Kapau te ke tukunoaʻi kinautolu, kuo pau ke ke utu ʻa e meʻa naʻá ke toó. (Kalētia 6:7) “Ko e lahi ange hoʻo tukunoaʻi hoʻo tuí mo e meʻa ʻokú ke fakamahuʻingaʻí pea kau ʻi he ngaahi ngāue ʻoku ʻikai ke ke ongoʻi ʻoku tonú, ko e siʻi ange ia hoʻo fakaʻapaʻapaʻi koé,” ko e lau ia ʻa e tohi Sex Smart. ʻI hono kehé, kapau te ke moʻui ʻo fakatatau ki he ngaahi tuʻunga ʻa e ʻOtuá, te ke fakahaaʻi ai e ʻulungaanga lelei moʻoní. Hiliō aí, te ke tauhi maʻu ha konisēnisi maʻa.​—1 Pita 3:16.