Diane 12:1-28
12 Motho yo o ratang kgakololo o rata kitso,+Mme yo o tlhoileng kgalemelo ga a na tlhaloganyo.*+
2 Motho yo o molemo o amogelwa ke Jehofa,Mme Modimo o kgala motho yo o logang maano a a bosula.+
3 Ga go na motho yo o sirelediwang ke bosula,+Mme le ka motlha basiami ga ba kitla ba kumolwa.
4 Mosadi yo o nang le mekgwa e mentle ke serwalo mo monneng wa gagwe,+Mme mosadi yo o itshwarang ka tsela e e tlhabisang ditlhong o tshwana le sebodu mo marapong a monna wa gagwe.+
5 Dikakanyo tsa basiami di siame,Mme kaelo ya badirabosula ke tsietso.
6 Mafoko a badirabosula a tshwana le balaledi ba ba kotsi,*+Mme molomo wa basiami o a ba golola.+
7 Fa badirabosula ba bolawa, ga ba tlhole ba nna teng,Mme ntlo ya basiami e tla tswelela e eme.+
8 Motho o bakwa ka ntlha ya molomo wa gagwe o o botlhale,+Mme yo o nang le pelo e e sokameng o tla nyadiwa.+
9 Go botoka go tseelwa kwa tlase mme gone o na le motlhankaGo na le go ikgalaletsa mme o se na dijo.*+
10 Mosiami o tlhokomela diruiwa tsa gagwe,+Mme yo o bosula o akanya gore o kutlwelobotlhoko mme a le setlhogo.
11 Yo o lemang tshimo ya gagwe o tla roba dijo tse dintsi,+Mme yo o lelekisang dilo tse di se nang mosola ga a botlhale.
12 Modirabosula o eletsa se batho ba bangwe ba ba bosula ba se tshwereng,Mme mosiami o tshwana le setlhare se se ntshang maungo.
13 Motho yo o bosula o tsena mo mathateng ka ntlha ya puo ya gagwe e e bosula,+Mme mosiami o falola mo matshwenyegong.
14 Motho o kgotsofadiwa ke maungo a se a se buang,*+E bile tiro ya diatla tsa gagwe e tla mo duela.
15 Tsela ya seeleele e siame mo matlhong a sone,+Mme yo o botlhale o amogela kgakololo.+
16 Seeleele se bontsha ka bonako* gore se tenegile,+Mme yo o botlhale o itlhokomolosa* go tlhapadiwa.
17 Yo o ntshang bosupi ka boikanyegi o tla bua boammaaruri,*Mme mosupi wa maaka o a tsietsa.
18 Go bua o sa akanye go tshwana le go tlhaba ga tšhaka,Mme loleme lwa ba ba botlhale ke phodiso.+
19 Molomo o o buang boammaaruri o tla nnela ruri,+Mme loleme lo lo buang maaka lo tla nna teng ka nakwana fela.+
20 Go tsietsa go mo pelong ya ba ba logang maano a a bosula,Mme ba ba dirang gore go nne le* kagiso ba a itumela.+
21 Mosiami ga a kitla a utlwisiwa botlhoko ke sepe,+Mme badirabosula ba tla nna le masetlapelo a mantsi.+
22 Yo o buang maaka o makgapha mo go Jehofa,+Mme ba ba dirang dilo ka boikanyegi ba a mo itumedisa.
23 Motho yo o botlhale o fitlha se a se itseng,Mme seeleele se phatloga fela se bua boeleele.+
24 Batho ba ba tlhoafetseng ba tla busa,+Mme ditshwakga di tla patelediwa go bereka.+
25 Go tlhobaela go dira gore motho a tshwenyege thata mo maikutlong,*+Mme lefoko le le molemo le dira gore a itumele.+
26 Mosiami o tlhopha mafulo a gagwe ka kelotlhoko,Mme tsela e badirabosula ba tshelang ka yone e a ba timetsa.
27 Setshwakga ga se lelekise phologolo e se batlang go e tsoma,+Mme go dira ka natla ke letlotlo le le tlhwatlhwakgolo la motho.
28 Go itshwara sentle go tla dira gore motho a tshele;+Mme ga a na go swa.
Dintlha Tse di Kwa Tlase
^ Kgotsa “ga a akanye.”
^ Seheb., “a lalela madi.”
^ Seheb., “senkgwe.”
^ Seheb., “a molomo wa gagwe.”
^ Kgotsa “ka lone letsatsi leo.”
^ Seheb., “bipa.”
^ Seheb., “se se siameng.”
^ Seheb., “Mme bagakolodi ba ba.”
^ Seheb., “gore pelo ya motho e imelwe.”
