Ken hanma kasua yô, Mbashiada mba Yehova ka ve nyôr mbamkombo sha ajiir a ve civir Aôndo her, a i yer ér Ayou a Tartor la. Ka i er mkombo hen Iyou i Tartor nena? Man aluer u ngu zan mbamkombo mba shon yô, a wase u nena?

•  Ka i er mkombo hen Iyou i Tartor nena?

•  Gba u u zaan mbamkombo sha ci u nyi?

•  Kwagh u mbakwav wou ve ôr yô

 Iyou i Tartor ka ijiir i i henen kwagh u Bibilo i tese, u una wase se ken uma wase yô. Aluer u ngu zan mbamkombo mba ka i nyôr her la yô, a wase u sha igbenda ne:

•   u fa mimi sha kwagh u Aôndo.

•   u fa er i hii ve mbamzeyol ve lu sha tar hegen kpishi nahan yô.

•   u hingir orfankwagh.

•   u zua a azende a hemban doon.

 U fa kpa? Mba yilan ijiir i Mbashiada mba Yehova ve nyôron mkombo her la ér Iyou i Tartor sha ci u ka kwagh u Tartor u Aôndo i hemban henen her ye.—Mateu 6:9, 10; 24:14; Luka 4:43.

 Akaa a ka i za hen la aa wase u. Akaawan a Bibilo a ka i za hen ken mbamkombo mba Mbashiada mba Yehova la aa wase u u “zua a kwaghfan.” (Anzaakaa 4:5) Inja na yô, Bibilo ia wase u u fa u tsuan akaa a dedoo a u er ken uma wou yô. Shi Bibilo ia wase u u zuan a mbamlumun sha mbampin mba hange hange, er mban nahan:

•   Ityôkyaa i se lu uma jim yô ka nyi?

•   Ka Aôndo a ne se lu yan ican yee?

•   Ka nyi ka i er or zum u nan kpe kera laa?

 Hanma mkombo u sha iyange i Lahadi cii ka se ungwa kwaghôron sha ma itinekwagh. Ka atineakaa shon agen je ne:

•   Er Nan Ve i Doo u Bibilo ia Hemen We?

•   Ka Han U Zua Iwasen ken Ashighe Icana?

•   Kwagh u Tartor u Aôndo U Lu Eren sha Ci Wase Hegen La.

 “Kwa gen la, wanyemakeranta u se lu kelase môm yô, va mkombo. Yange tema vea tsombor wase, nahan se na un ityakeda i se lu a mi la. Mba been mkombo yô, a kaa a mo ér, mbamlumun mba ashen ior ve lu nan sha aaven a i lu pinen mbampin la ve doo un dedoo. Shi a kaa ér ken côôci ve yô, ve mba a ityakeda i henen kwagh a mi er se nahan ga.”—Mkaanem ma gumkwase ugen, iti na ér Brenda.

 U fa kpa? Mba nyôron mkombo ken Iyou i Tartor sha inyar ga, shi mba zenden a gbande ker ér ior ve er iyua kpaa ga.

 Mba u kohol a ve imôngo la vea taver we ishima. Bibilo kaa ér gba u se Mbakristu se kohol imôngo sha ci u ‘taver hanma wase ishima.’ (Mbaheberu 10:24, 25) Er ior kpishi ken tar ne ve hembe wan ayol a ve ikyo nahan kpa, aluer hanma shighe u ngu lun vea ior mba kwagh u Aôndo man kwagh u mbagenev a hembe gban ve ishima a akaa a ve ne yô, a saan we iyol kpishi.

 “Ashighe agen ka mea za makeranta yô, m zua a ishimavihin shi m vôr, kpa mea zaan mkombo ken Iyou i Tartor yô, ior ve na ishima i pever mo. Nahan a duen mkombo yô, m yem ken ya saan saan. Kwagh la ka a taver mo ishima, nahan m kegh iyol u nôngon a mbamzeyol iyange igen kpaa.”—Mkaanem ma gumkwase ugen, iti na ér Elisa.

 U fa kpa? Atôônanongo a Mbashiada mba Yehova hemba 120,000 sha tar cii; ajiir a ve nyôron mbamkombo la di hemba 60,000 hegen. Er ingyegh ki ior mba van mkombo ki lu seer a seer yô, hanma inyom ka i maa Ayou a Tartor i kuma er 1,500 nahan sha tar, sha er ajiir a nyôron mkombo aa yina ga yô. a