Pase ve zayol wou. Ôr mbamaren ou ve fa er kwagh ne a vihi u shi u fe kwagh u ú lu sha mi ga yô. Adooga vea pase u kwagh u a lu zan hemen yô, nahan ishima ia pande a gba u shimi.

 Aluer mbamaren na u iwasen i u keren la ga yô, u fatyô u zan hen ma ijende iyou i i kav ishigh yô.—Anzaakaa 17:17.

 U hemban cii yô, u fatyô u zuan a iwasen hen Ter wase u sha, u a “ongo msen” la. (Pasalmi 65:2) Ôron un ishima you cii ‘gadia ka Un A koson we ye.’—1 Peteru 5:7.

 De we kwagh shima ga. Gumor ugen mba yer un ér Daniel, mbamaren nav yange ve pav ivaa shighe u lu anyom ataankarahar yô. A kaa wener: “Mbamaren av yange ve hemba soon ayol a ve tseegh, yange ve hen sha kwagh wase ga, kua kwaghbo u ieren ve ne ia va se a mi la kpaa ga.”

 Aluer Daniel de ér ishima i zer vihin un sha kwagh ne gbem yô, u hen wer ka nyi kwaghbo ia fatyô u duen kere?—Zua a iwasen: Ôr Anzaakaa 29:22.

 Er nan ve i hembe doon u Daniel una nôngo a de mbamaren nav kwaghbo u ve er un nee?—Zua a iwasen: Ôr Mbaefese 4:31, 32.

 Palegh ieren i ia vihi uma wou la. Wannomso ugen mba yer er Denny. Un di yange kaa wener: “Shighe u mbamaren av pav ivese la, yange vihin shi m ure kpishi. Nahan m hii u lun a mbamzeyol ken makeranta, shi m gba ikyaren inyom môm. Bee heela kera yô, . . . m hingir or u hômon akaa ken kelase wam er ka or u shin iyol nahan, shi m nôngon num kpoghuloo.”

 U hen wer ka nyi yange Denny soo u zuan a mi ve va hingir or u hômon akaa ken kelase kua or u nôngon num hama shighee?

 A er nan man kwaghwan u ken Mbagalatia 6:7 la una wase ior er Denny nahan u palegh ieren i ia vihi uma ve laa?

 Kwagh ka una er or u vihin nan yô, shighe ka a kar cii ve i va sambe nan shin ishima ye. Er uma wou un va hingir vough yô, za iyol mban vea pande.