• Kwagh shon doo nena?

• Doo u u pine iyol wer nyi?

• Ka hanma kwaghwan u Bibilo una wase u we?

 Gumor ugen iti na ér Ryan, a kaa ér, “Akav a ior ve gberen sha kwavyolough la agen ka a doo u nengen tsung.”

 Ityôkyaa i ka i na ve or gber ikyav sha kwavyolough u nan la ia na yô, we kpa a sar u u gberen. U tesen ikyav yô, gumkwase ugen iti na ér Jillian, a kaa ér: “Wankwase ugen u m ze makeranta vea na yô, yange ngô na kpe undu un lu cuku je. Va hian yô, a tôô iti i ngô na a gber ikyav a mi sha mon, vegher u ken ijime. M nenge mer me gber ikyav sha kwavyolough er ngira nahan, a doo dedoo.”

 Wea lu a ityôkyaa i injaa shin injaa ga kpa, gba u u hen sha kwagh u gberen ikyav sha kwavyolough la a za ica shi u hen sha mi dông cii ve u mase tsuan wer i gber u ma ikyav i koghun ga sha kwavyolough wou ye! Aluer u ngu henen sha kwagh u gberen ikyav sha kwavyolough wou yô, doo u u pine iyol you we nyi? Man ka akaawan a Bibilo a han nahan aa wase u u tsuan kwagh u i hembe doon u u ere?

 Ka mbamzeyol mba nyi nahan me zua a mi ken iyol yama? Ijiir i sha Intanet i Mayo Clinic kaa ér: “Or ka nana gber akaa iyol yô, kwavyolough u nan u hingir tsuasaa, inja na yô, nana fatyô u zuan a angev mbu sha kwavyolough kua iangev mbi sha awambe je kpaa. Ashighe agen yô, atundu ka a mura i ningir i tser ikyav i nan gber la. Shi abembe shin asundu kpa a due nan iyol.” Ijiir i sha Intanet la i môm shi kaa ér: “Aluer anar u i kômbo sha iyol you la ngu wang ga yô, u zua a iangev atô kposo kposo hen mba lun a iangev mbi tsaren sha awambe, mba i vande gberen ve ikyav sha anar shon yô.”

 Ior vea nenge u nena? Wea soo shin wea soo ga kpa, mluashe wou una pase injaor i u lu la. Mluashe wou una na ior vea nenge u ér u kav kwagh shin u ngu a kav kwagh ga, gayô u ngu a mimi iyol shin u ngu or u mimi ga. Gumkwase ugen iti na ér Samantha, a kaa ér, “Ka mea nenge or a gber kwagh iyol yô, m tôô mer nan ngu or u man msôrom shin or u zenden upati.”

 Melanie, gumkwase u anyom 18 pase mnenge na sha kwagh ne. A kaa ér: “Mo yô, or ka nana gber akaa iyol yô, nan kera kumam ashe er ma nan lu sha marami la ga. Ka i lum er ambaaior la soo ér i de fe mluashe ve jim jim ga ve, ve gber akaa iyol ér vea yer mluashe ve la nahan.”

 U soo u lun a mi gbem kpa? Shighe ka una karen yô, or nan seer kehen shin ayange a nan a seer, nahan ikyav i nan gber sha kwavyolough la i nalegh maa i hingir nyua nyua. Gumor ugen iti na ér Joseph, a kaa ér, “M nenge a ior mba ve gber akaa iyol i tse i kom anyom akundu imôngo yô, akav a ve gber la doo ashe ga.”

 Gumor u anyom 21, iti na ér Allen, a kaa ér, “Shighe ka una karen yô, ikyav i or nan gber sha kwavyolough u nan la i ya tsegh. Ikyav i yange nan nengen ér ngi nan a inja yum la, anyom ka aa karen kpuaa yô, i kera lu nan a inja ga.”

 Kwagh u Allen a ôr ne ka mimi. Jighilii yô, ior ka vea nguren tsan seer yô, mbamnenge vev man mlu ve vea ior vev man asaren a ve a geman, kpa akaa a ve gber sha kwavyolough ve la yô, ka nahan ga. Gumkwase ugen iti na ér Teresa, a kaa ér, “Ka mea nenge ikyav i m gber sha kwavyolough wam ne je i gba lun mo er m bume nahan. M kera soo u eren ma kwagh u anyom a kar ve shi me gba vaan afanyô ga.”

 Orkavenkwagh ka nana soo u eren ma kwagh yô, nan vande tôôn shighe nan hen sha atôakyaa a a ne ve nan soo u eren kwagh shon la. (Anzaakaa 21:5; Mbaheberu 5:14) Sha nahan yô, nenge ase akaawan a Bibilo a aa fatyô u wasen we sha gbaa u gberen akaa sha kwavyolough la yô.

•  Mbakolose 3:20: “Ne ônov . . . ungwan nen imo i mbamaren enev ken akaa cii, gadia ka kwagh u doon Ter je ne.”

    Aluer u ngu hen ya vea mbamaren ou kpa u ngu ungwan kwaghwan ve ga yô, ka akaa a vihin a nyi nahan aa fatyô u eren we?

•  1 Peteru 3:3, 4: “Hwe wen a̱ de luun u ken won tsô ga, er gbatyou u gban nahan, shin u wan akaa a hweegh a zenaria shin akondo a zeren ga. Kpa i̱ lu or u ken myer u ken ishima la, a hwe u saan ishe ga, u ishima i legh legh man u lun ving la.”

    U hen wer, hii nan ve Bibilo i ôr kwagh u “or u ken myer u ken ishima la” var var nahana?

•  1 Timoteu 2:9: “Shi sarem pe kasev di kpaa ve̱ wuhan ayol a ve daalaa, i̱ lu sha kwaghfan man akuma akuma kpaa.”

    Ishember i “akuma akuma” la, inja na ér nyi? Er nan ve u wuhan iyol akuma akuma la ka i va hemba doon ken hemen, a u gberen akaa sha kwavyolough laa?

•  Mbaromanu 12:1, NW: “Gema nen ayol a en na nen nagh ku uma a mi, icighannaagh ku doon Aôndo, ka u civir Aôndo shi henen sha kwagh na je la.”

    Er nan ve kwagh a gbe a Aôndo sha gbenda u eren a iyol you laa?

 Atôakyaa ne na yô, ior kpishi tsua ér vea gber ikyav i môm sha kwavyolough ve ga. Jighilii yô, ve zua a kwagh u a hembe doon a u gberen akaa sha kwavyolough la yô. Teresa, u se vande ôron kwagh na la, kaa ér: “Aluer ma ishember doo u ishima tsung, shin ma or ngu u nan gbe u kwagh kpishi yô, lu a ishember la ken ishima, shin pase or la shin kwase la er u nengen nan yô. De gberen ikyav iyol ga, kpa gema er kwagh u u ne jighjigh wer ka u vough la.”