Een, sha ci u Aôndo soo ér ior ve kohol imôngo ve civir un. Bibilo kaa ér: “Se waan nen hanma wase ikyo sha er ishima ia taver se u tesen dooshima shi eren akaa a dedoo yô; se bunden nen mbamkombo asev” ga.—Mbaheberu 10:24, 25.

 Shighe u Yesu kaa ér: “Ka sha kwagh ne man ior cii vea fa er ne lu mbahenen av ye, aluer ne doo ayol a en yô” la, lu u tesen ér mbadondon un vea kohol imôngo vea civir Aôndo. (Yohane 13:35) Gbenda u vesen u mbadondon Kristu vea tese ér ve doo ayol a ve yô, ka u kohol imôngo vea mbajighjigh mbagenev. Gba u vea kohol ken atôônanongo hanma shighe vea civir Aôndo. (1 Mbakorinte 16:19) Nahan ve cii vea hingir anmgbianev sha tar cii.—1 Peteru 2:17.

Gba u or a er kwagh a hemba di u lun ken ma nongo u kwaghaôndo la

 Er Bibilo i tese ér gba u ior vea kohol imôngo vea civir Aôndo nahan kpa, shi i tese ér aluer or ngu ken ma nongo u kwaghaôndo tsô maa nana lu eren ishima i Aôndo ga. Saa kwaghaôndo u or lu ker la una tesen nan akaa a aa wase nan ken uma ayange ayange la ve, Aôndo una lumun nan ye. Ikyav i tesen yô, Bibilo kaa ér: “Kwaghaôndo u wang, u a lu a acôghor sha ishigh ki Ter wase Aôndo ga yô, ka un ne: ka u nengen sha ancôgholov man kasev mba côgholov ken ican ve, shi lun wang sha u palegh akaa a taregh.”—Yakobu 1:27, ngeren u shin kpe.