Gumor ugen u yer un ér Will yô kaa ér: “Aluer u fa gbenda u injaa u u ôr Bibilo ga yô, a maa u iyol u ôron i ga.”

 U soo u fan kwagh u u er ve a maa u iyol u ôron Bibilo yôô? Ngeren ne una wase u.

•  Tôô wer yange u lu ape kwagh u u lu ôron ken Bibilo la lu eren kpôô kpôô la

•  Tôv sha mi!

•  Akaa a mbakwav wou ve ôr yô

 Tôô wer u ngu ape kwagh u u lu ôron la yange er la. U fatyô u eren kwagh ne:

1.   Tsua ma kwagh u ken Bibilo u u soo u henen yô. U fatyô u tsuan ma kwagh u yange er i nger ken Bibilo shin kwagh u i nger ken ityakeda i Ivangeli la, gayô za ungwan ma Bibilo i ôron sha inja i iniumbe i eren sha jw.org.

2.   Ôr kwagh shon. U fatyô u ôron we tswen gayô ôron vea azende a ou shin vea ior mba hen tsombor wou. Ne fatyô u paven ker kposo kposo, orgen nana lu ôron sha ityough ki orngeren takeda u Bibilo la, mbagenev di vea lu ôron sha ityough ki ior mbagen mba i ôr kwagh ve la.

3.   Kar mhen môm shin i hemba nahan ken mbamhen mba i dugh a mi shin heen ne:

   •   Kpela ufoto mba tesen kwagh u yange za hemen la. Shin kpela ufoto mba ve tese akaa a yange za hemen la sha dondo dondo. Hen hanma foto yô, nger kwagh u a lu zan hemen la her.

   •   Shighe u u lu ôron kwagh u ma orjighjigh ken Bibilo yô, nger aeren a nan man inja i nan kua averen a yange nan zua a mi la.

   •   Gema kwagh u u lu ôron ken Bibilo la a hingir we er ka abaver nahan. Ôr kwagh shon er u ngu nan abaver sha igbenda kposo kposo nahan; tôv azende ou shin ior mba hen tsombor wou la vough er u ngu tôvon ior mba kwagh shon yange er ve kua mba kwagh shon yange er ve nenge la nahan.

   •   Aluer orgen ken ior mba u lu ôron kwagh ve la yange nan er kwagh sha inja ga yô, hide hen er yange nana er kwagh sha inja ve, kwagh shon ma kure doo yô. Ikyav i tesen yô, hen sha kwagh u Peteru nyiman Yesu la. (Marku 14:66-72) Peteru yange ma er kwagh sha inja hen shighe u i hingir a na hang la nena?

   •   Aluer maa u iyol yum je yô, u fatyô u ngeren derama wou sha ma kwagh u ken Bibilo. Shi ngeren akaa a se fatyô u henen ken kwagh shon la kpaa.—Mbaroma 15:4.

 Aluer u tôv sha akaa a kiriki a i ter ken kwagh u u lu ôron ken Bibilo la zulee yô, u fatyô u zuan a akaainjaa a we a ver ishima ga yô, ma u zough a mi ga yô. Ashighe agen je yô, a ter ishember i môm shin asember ahar nahan ken Bibilo kpa, u zua a kwagh u vesen ker.

 Ikyav i tesen yô, tôô ase Mateu 28:7 kar sha Marku 16:7.

•    Er nan ve Marku yange kaa ér ica a gba ga je tsô, Yesu una ande hen mbahenen nav “kua Peteru”?

•  Zua a iwasen: Marku yange nenge akaa a yange za hemen la sha ashe na ga; ikyav tese ér lu Peteru ôr un akaa la ye.

•  Kwagh u injaa u wea ver ishima ga ve ma u zough a mi ga yô: Shighe u Peteru ungwa ér Yesu soo u nengen a na la, kwagh la yange una sur un ishima sha ci u nyi? (Marku 14:66-72) Yesu yange tese ér un ngu ijende i Peteru i mimi nena? U fatyô u dondon ikyav i Yesu la nahan lun mbagen ijende i mimi nena?

 Ka wea ôron Bibilo man wea nengen a kwagh u u lu ôron la ken ishima you shi wea ver ishima sha akaa a kiriki yô, Bibilo i ôron i hemba maan we iyol!