“Ka mea tagher a mbamzeyol sha makeranta yô, m hen kwagh u or u m soo kwagh u nan shi m ne nan icivir, u nan kpa yange nan tagher a mbamzeyol mba shon yô, nahan kwagh ne a wasem kpishi. Maa m nôngo m dondo ikyav i or shon. Ka mea lu a or u m lu dondon ikyav i nan yô, i kera taver mo u hemban mbamlu mba taver mba m tagher a mi la ga.—Mkaanem ma Haley, gumkwase ugen.

 Or u u lu dondon ikyav i nan la nana wase u u palegh mbamzeyol shi nana wase u u eren akaa a u tsough u eren la. Kpa kwagh u vesen yô, tsua or u dedoo u u dondo ikyav i nan yô.

•  Gba u u tsua or u u dondo nan la sha kwaghfan sha ci nyi?

•  Er u tsua yô

•  Kwagh u mbakwav wou ve ôron yô

•   Ior mba u tsough u dondon ve la, vea bende a gbenda u u eren kwagh ken uma la.

   Bibilo kaa a Mbakristu ér ve ver ishima sha ior mba ve ver ikyav i dedoo la, ér: “Ver nen ishima sha mkur u zende ve man shi kav nen jighjigh ve u nan kpaa.”—Mbaheberu 13:7.

   Kwaghwan: Er i lu u ior mba u tsough u dondon ikyav ve la vea bende a we sha gbenda u dedoo shin u bo yô, tsua ior mba u dondo ve mba ve lu a aeren a dedoo la, i de lu sha ci u i fa ve wuee gayô ve nôngo u lun kwav môm a we di tsô ga.

   M hen kwagh kpishi ken Orkristu ugen, u i yer un ér Adam la; m hen kwagh ken inja na man ken ieren na cii. Kpiligh mo iyol er hegen je kpa m lu umbur akaa jighilii a yange a eren shi a ôron la yô. Yange fa er gbenda u eren kwagh ken uma na la u bende a mo ga.—Mkaanem ma Colin, gumor ugen.

•   Ior mba u tsough u dondon ikyav ve la vea bende a gbenda u u henen kwagh la man mnenge wou.

   Bibilo kaa ér: “De tsughun nen ayol a en ga, ujende mba bov mba vihin mbamlu mba dedoo.”—1 Mbakorinte 15:33.

   Kwaghwan: Tsua or u nan lu a aeren a dedoo yô, i de lu or u mluashe u nan a doo ashe u kenger tseegh tsô la ga. Aluer ka nahan yô, alaghga u ngu zan sha gbenda u ua va na u ahenge a van yô.

   “Aluer u ngu tôôn iyol you karen sha ior mba ve dooashe kpishi la hanma shighe cii yô, kwagh ne una na a lu u ken ishima inja er u gba kwagh ga shi u doo ashe ga nahan. Kwagh ne una fatyô u nan we u gema ishima you cii u ver sha kwagh u mdoo tseegh.”—Mkaanem ma Tamara, gumkwase ugen.

   Hen sha kwagh ne: Aluer se tsua u dondon ikyav i mbanan msaanyol mba duenati man mbaeren anumbe yô, alaghga a lu kwaghbo u nyi se gba kere?

•   Mba u tsough u dondon ikyav ve la, vea fatyô u wasen we u eren akaa a u tsough u eren ken uma wou la shin eren a ga.

   Bibilo kaa ér: “Zende a mbafankwagh imôngo, nahan we kpaa ú hingir orfankwagh.”—Anzaakaa 13:20.

   Kwaghwan: Tsua ior mba u dondo ikyav ve mba ve lu a aeren a dedoo a u soo u lun a mi la yô. Er u lu nengen er ve eren akaa la, alaghga u zua a igbenda jighilii i ia fatyô u wasen we u eren kwagh u u tsough wer u er la yô.

   “U we kaan wer ‘m soo u seer lun or u injaa’ la yô, hemba doon u u kaa wer, ‘m soo u seer lun or u injaa er Jane nahan. Ka a va mkombo faa shi nengen mbaasaimenti mba i ne un la ér ka beerkwagh ga.’”—Mkaanem ma Miriam, gumkwase ugen.

   Jindikwagh: Aluer u tsua u dondon ikyav i or u dedoo yô, u fatyô u hingir or u u soo wer u lu ken uma wou la.

 U fatyô u tsuan or u u dondo ikyav i nan la sha igbenda ihiar.

1.   U fatyô u tsuan ma ieren i u soo u lun a mi yô, maa keren or u u soo kwagh u nan shi u ne nan icivir kpishi, u nan lu a ieren shon yô.

2.   U fatyô u tsuan or u u soo kwagh u nan shi u ne nan icivir kpishi la, maa tsuan ma ieren i nan lu a mi, i u soo u lun a mi la.

 Kwatakerada u henen kwagh a mi u u lu ken ngeren ne la ua wase u u eren kwagh ne.

 Ior mba u tsua u dondon ikyav ve yô, a fatyô u lun:

•  Mbakwav wou. M soo u lun a aeren a ijende yam i ishima ishima la. Mayange wan kwase ne ngeen a akaa ave je ka hingir un ican, u tamber tesen orgen ikyo i wan ga. M ngu tamen a na, kpa m nenge a aeren na a dedoo a m lu a mi ga yô, nahan m soo u dondon ikyav na la.”—Mkaanem ma Miriam, gumkwase ugen.

•  Mbaganden. Afatyô u lun mbamaren ou shin mba u civir Aôndo a ve imôngo yô. “Ka u henen a hen ga, ka mbamaren av m dondon ikyav ve ye. Mba a aeren a doon tsung. Er m nengen a mbamshi vev nahan kpa, shi m nenge er mbamshi vev mbara ve yange ve u zan hemen u civir Yehova sha mimi ga yô. M na jighjigh mer shighe u me vese me lu er ve nahan la, a fatyô u ôron mkaanem man sha a mo.”—Mkaanem ma Annette, gumkwase ugen.

•  Ior mba ken Bibilo. “M tsua ior mba ken Bibilo kposo kposo mba m soo u dondon ikyav ve yô, er Timoteu man Rutu man Yobu man Peteru kua wankwase u kiriki u ken Iserael la nahan, sha atôakyaa kposo kposo. Ka mea seer henen kwagh u ior mba ken Bibilo yô, ve hemba lun mo ior kpôô kpôô. Ka i doom kpishi u ôron kwagh u ior mba i er kwagh ve ken takerada u Kav Jighjigh Ve u Nan la man ngeren u a lu a itinekwagh ér, ‘Role Model Index’ u a lu ken tihi u sha môm man u sha uhar u takerada u Questions Young People Ask—Answers That Work” la.—Mkaanem ma Melinda, gumkwase ugen.

 Kwaghwan: De luun a or môm tseegh u u dondon ikyav i nan la ga. Apostoli Paulu yange kaa a mba ve lu Mbakristu a na imôngo la ér: “Nenge nen sha mba ve lu zenden er ne nenge ikyav sha a mo nahan la.”—Mbafilipi 3:17.

 U Fa Kpa? U fatyô u veren orgen ikyav i nana dondo yô! Bibilo kaa ér: “Hingir mbananjighjigh ikav sha kwaghôron man sha zende man sha dooshima man sha jighjigh u nan man mlu u wang kpaa.”—1 Timoteu 4:12.

 “Er we kpa i lu u u seer sôron inja you nahan kpa, hen shighe shon môm, u fatyô u wasen mbagenev u seer lun a anza a dedoo. Mayange u fa or u nan lu nengen ken a we ga shi mayange u fa er kwagh u u ôr la una fatyô u geman uma u orgen ga.”—Mkaanem ma Kiana, gumkwase ugen.