ኒኮላን ሰሊንን ከኣ ካልእ ብድሆ እዩ ኣጋጢምዎም። ካብ ጨንፈር ፈረንሳ ናብ ሓድሽ ጉባኤ ኺግዕዙ ምድብ ተዋህቦም። ብዛዕባኡ ኸምዚ ይብሉ፦ “ንፈተውትና ስለ ዝናፈቕናዮም፡ እቲ ናይ ፈለማ ታሕጓስ ምስ ሃሰሰ ኸቢዱና ነይሩ። ምስቶም ኣብ ሓድሽ ጉባኤ ዚርከቡ ኣሕዋትና ገና ድልዱል ርክብ ኣይመሰረትናን ኔርና።” a ነዚ ብድሆታት እዚ ኣብ ግምት ብምእታው፡ ንሓድሽ ጉባኤ ብኸመይ ክትለምዶ ትኽእል፧ ካልኦት ብኸመይ ኪሕግዙ ይኽእሉ፧ ኣብ ሓድሽ ጉባኤኻኸ እንታይ መንፈሳዊ በረኸት ክትረክብን ከተካፍልን ትኽእል፧

ክትለምድ ዚሕግዘካ ኣርባዕተ ስርዓታት

1. ብየሆዋ ተኣመን። (መዝ. 37:5) ኣብ ጃፓን እትነብር ካዙሚ፡ ሰብኣያ ብስራሕ ናብ ካልእ ቦታ ምስ ገዓዘ፡ ካብታ 20 ዓመት ዝጸንሓትላ ጉባኤ ኽትግዕዝ ተገደደት። እሞ ደኣ ኸመይ ገይራ እያ ‘መገዳ ንየሆዋ ኣማዕቊባቶ’፧ ከምዚ ትብል፦ “ብዛዕባ ዅሉ እቲ እተሰምዓኒ ስምባድን ጽምዋን ጭንቀትን፡ ኣብ ልበይ ዘሎ ናብ የሆዋ ኣፍሲሰ። ከምኡ ብዝገበርኩ መጠን ከኣ፡ ንሱ ዜድልየኒ ብርታዐ ይህበኒ ነይሩ።”

ከመይ ጌርካ ኢኻ ኣብ የሆዋ ዘሎካ እምንቶ ኸተዕዝዝ እትኽእል፧ ከምቲ ተኽሊ ንምብቋል፡ ማይን ኣብ ሓመድ ዚርከብ መዓዛታትን ዜድልዮ፡ እምነትና ምእንቲ ኽትዓቢ እውን ክትዕንገል ኣለዋ። እቲ ኣቐዲሙ እተጠቕሰ ኒኮላ ብዛዕባ እቶም ፍቓድ ኣምላኽ ንምግባር ብዙሕ መስዋእቲ ዝኸፈሉ እኒ ኣብርሃምን የሱስን ጳውሎስን ምስትንታን፡ ነቲ ኣብ ደገፍ የሆዋ ዘለዎ እምንቶ ኣደልዲሉሉ እዩ። ስሩዕ መደብ ብሕታዊ መጽናዕቲ መጽሓፍ ቅዱስ ኣብ ህይወትካ ንዜጋጥመካ ዝዀነ ለውጢ ኽትጻወር ኣብ ርእሲ ምሕጋዙ፡ ነቶም ኣብ ሓድሽ ጉባኤኻ ዚርከቡ ኣሕዋት መንፈሳዊ ውህበት ንምክፋል እውን ኬዕጥቐካ እዩ።

 2. ኣይተወዳድር። (መክ. 7:10) ዡል ካብ በኒን ናብ ሕቡራት መንግስትታት ኣመሪካ ምስ ገዓዘ፡ ሰፊሕ ባህላዊ ጋግ ኣጋጠሞ። ብዛዕባ እቲ ግዜ እቲ ድማ፡ “ንዝረኸብክዎ ዘበለ ሰብ፡ ታሪኽ ህይወተይ ከዘንቱ ኸም ዘሎኒ ዀይኑ ተሰሚዑኒ ነይሩ” ብምባል ተዘክሮኡ ይገልጽ። እዚ ነገር እዚ ኻብቲ ኣቐዲሙ ዝለመዶ ኣመና እተፈለየ ብምንባሩ ኸኣ፡ ገዛእ ርእሱ ኻብ ጉባኤ ኺፈሊ ጀመረ። ንኣሕዋትን ንኣሓትን እናፈለጦም ምስ ከደ ግና፡ ኣረኣእያኡ ለወጠ። ብዛዕባ እዚ ኸምዚ ይብል፦ “ኣብ ምድሪ ኣብ ዝሃለና ንሃሉ፡ ደቂ ሰብ ሕደ እዮም። ሓሳቦም ዚገልጹሉ መገዲ ጥራይ እዩ ዚፈላለ። ንሰባት ከም ዘለውዎ ምቕባል ኣገዳሲ ነገር እዩ።” ስለዚ፡ ምስ ናይ ቀደም ጉባኤኻ ኣይተወዳድር። ኣን-ሊዝ ዝስማ ፈላሚት፡ “ነቲ ዝሓደግክዎ ኽረክብ ኣይኰንኩን ግዒዘ። ሓድሽ ነገራት ክረክብ እየ ግዒዘ” ትብል።

ሽማግለታት እውን ምስ ናይ ቀደም ጉባኤኦም ኬወዳድሩ የብሎምን። እተፈልየ ሜላታት ግድን ጌጋ እዩ ማለት ኣይኰነን። ሓሳባት ቅድሚ ምቕራብኩም፡ ኣብቲ ዓዲ ዘሎ ዅነታት እንተ ፈለጥኩም ይሓይሽ። (መክ. 3:1, 7ለ) ኣረኣእያኹም ኣብ ጉባኤ ኻብ ምጽዓን፡ ብኣብነት እንተ መራሕኩም ይሓይሽ።—2 ቈረ. 1:24።

3. ተሓወስ። (ፊል. 1:27) ናብ ካልእ ቦታ ምግዓዝ ብዙሕ ግዜን ጕልበትን ዚሓትት እኳ እንተ ዀነ፡ ካብ መጀመርታ ኣትሒዝካ፡—እንተ ተኻኢሉ ብኣካል፡—ኣብ ኣኼባታት ጉባኤ ምእካብ ኣዝዩ ኣገዳሲ እዩ። እቶም ኣብ ሓድሽ ጉባኤ ዘለዉ ፈጺሞም ዘይርእዩኹም ወይ ሳሕቲ ዚርእዩኹም እንተ ዀይኖም፡ ከመይ ገይሮም ኪድግፉኹም ይኽእሉ፧ ምስ ክልተ ደቃ ኣብ ደቡብ ኣፍሪቃ ናብ እትርከብ ዓባይ ከተማ ዝገዓዘት ሉሲንዳ ኸምዚ ብምባል ተዘክሮኣ ትገልጽ፦ “ምስ ጉባኤ ኽሕወስ፡ ምስ ካልኦት ከገልግል፡ ኣብ ኣኼባታት ከኣ ክሳተፍ ምኽሪ ተዋሂቡኒ ነይሩ። ኣብ ቤትና ኣኼባ ኣገልግሎት ወፍሪ ኺግበር እውን ሓሳብ ኣቕሪብና ኔርና።”

ኣብ ቲኦክራስያዊ ንጥፈታት ምስቶም ኣብ ሓድሽ ጉባኤ ዘለዉ ኣሕዋትን ኣሓትን ‘ብሓባር ትጽዕር’ እንተ ዄንካ፡ “ስለ እምነት እቲ ብስራት” እጃምካ ኸተበርክት ትኽእል ኢኻ። እታ ኣቐዲማ እተጠቕሰት ኣን-ሊዝ፡ ምስ ኵሎም ኣስፋሕቲ ናብ ስብከት ክትከይድ ካብ ሽማግለታት መተባብዒ ተዋህባ። እሞኸ እዚ እንታይ ኣፍርዩላ፧ “እዚ ነገር እዚ ምስታ ጉባኤ ንምውህሃድ ወሳኒ ነገር ምዃኑ ብቕልጡፍ እየ ተገንዚበ” ብምባል ባዕላ ትምልስ። ብተወሳኺ፡ ንኸም ጽሬትን ክንክንን ኣዳራሽ መንግስቲ ኣምላኽ ዝኣመሰለ ንጥፈታት ገዛእ ርእስኻ ተቕርብ እንተ ዄንካ፡ ነቲ ሓድሽ ጉባኤ ኸም ጉባኤኻ ጌርካ ኸም እተቐበልካዮ እዩ ዜርኢ። ምስቲ ጉባኤ ብዝያዳ ብእተሓወስካ መጠን፡ ብቕልጡፍ ተቐባልነት ክትረክብ ኢኻ፡ ክፍሊ እቲ ሓድሽ መንፈሳዊ ስድራ ቤት ከም ዝዀነካ እውን ኪስምዓካ እዩ።

4. ሓድሽ ዕርክነት ኣማዕብል። (2 ቈረ. 6:11-13) ዕርክነት ንምምዕባል ዚሕግዝ ብሉጽ መገዲ፡ ብሕታዊ ተገዳስነት ምርኣይ እዩ። ስለዚ፡ ቅድምን ድሕርን ኣኼባታት ምስ ካልኦት ንምቅርራብን ንዓታቶም ንምፍላጥን  እኹል ግዜ መድብ። ስማቶም ንምፍላጥ ጻዕሪ ግበር። ስማት ሰባት ምዝካር፡ ፈቃርን ተቐራብን ከኣ ምዃን፡ ካልኦት ከም ዚቐርቡኻ ይገብር እዩ፣ እዚ ድማ ናብ ሓድሽ ዕርክነት ይመርሕ እዩ።

ብኣሕዋትን ብኣሓትን ተቐባልነት ብዛዕባ ምርካብ እምብዛ ኣብ ክንዲ እትጭነቕ፡ ብሓቂ መን ምዃንካ ኺፈልጡኻ ኣጋጣሚ ኽፈተሎም። ካብ ሉሲንዳ ኽትምሃር ትኽእል ኢኻ። ንሳ ኸምዚ ትብል፦ “ተበግሶ ወሲድና ንኻልኦት ናብ ገዛና ስለ ዝዓደምና፡ ሎሚ ናይ ቀረባ ፈተውቲ ኣለዉና።”

“ንሓድሕድኩም ተቓባበሉ”

ዘይትፈልጦም ሰባት ናብ ዝመልእዎ ሓድሽ ኣዳራሽ መንግስቲ ኣምላኽ ምእታው ንገሊኦም ይኸብዶም ይኸውን። እሞ ደኣ ኸመይ ጌርካ ኢኻ ንሓደስቲ ኸተቕልለሎም እትኽእል፧ ሃዋርያ ጳውሎስ፡ “ከምቲ ክርስቶስ እተቐበለኩም፡ ንሓድሕድኩም ተቓባበሉ” ኢሉ ኣተባቢዑና ኣሎ። (ሮሜ 15:7) ሽማግለታት ኣብነት ክርስቶስ ብምስዓብ፡ ንሓደስቲ ጽቡቕ ገይሮም ኪቕበልዎም ይኽእሉ እዮም። (“ ኣገዓዕዛኻ ጥጡሕ ምእንቲ ኪኸውን፡ ኣበርክቶ ዚገብር ነገራት” ዘርእስታ ሳጹን ርአ።) ይኹን እምበር፡ ኣብ ጉባኤ ዘለዉ ዅሎም ክርስትያናት፡ እንተላይ ቈልዑ፡ ሓድሽ ዕርክነት ኣብ ምምስራት እጃም ኪህልዎም ይኽእል እዩ።

ንኻልኦት ንቕበሎም ኪብሃል ከሎ፡ ናብ ቤትና ምዕዳምን ግብራዊ ሓገዝ ምሃብን የጠቓልል እዩ። ንኣብነት፡ ሓንቲ ሓብቲ ኽቡር ግዜኣ ብምስዋእ ንሓንቲ ሓዳስ ዝመጸት ሓብቲ ምስታ ኸተማ ኣላለየታ፡ ብኸመይ ህዝባዊ መጕዓዝያ ኸም እትረክብ እውን ገለጸትላ። እዚ ተግባራ ነታ ሓዳስ ዝመጸት ሓብቲ ልባ ተንከያ፡ ክትለምድ እውን ሓገዛ።

ክትዓቢ እተኸፍተልካ ኣጋጣሚ

ኣንበጣ ኺዓቢ ኸሎ፡ ምንፋር ቅድሚ ምጅማሩ፡ ቈርበቱ ብተደጋጋሚ እናቐንጠጠ ይቕይር እዩ። ብተመሳሳሊ፡ ናብ ሓድሽ ጉባኤ ኽትግዕዝ ከለኻ፡ ኣብ ኣገልግሎት የሆዋ ኣኽናፍካ ንምዝርጋሕ ዚዓግተካ ዝዀነ ይኹን ስክፍታ ኽትቅንጥጥ ኣሎካ። ኒኮላን ሰሊንን፡ “ምግዓዝ ብሉጽ ስልጠና እዩ።  ሓደስቲ ሰባትን ሓድሽ ከባብን ምልማድ፡ ሓድሽ ባህርያት ከነማዕብል ኣተባቢዑና እዩ” ይብሉ። እቲ ኣብ መእተዊ እተጠቕሰ ዣን-ሻርለ ኸኣ ስድራ ቤቱ ብኸመይ ከም እተጠቕሙ ኺገልጽ ከሎ፡ “እቲ ለውጢ ንደቅና ኣብ ሓድሽ ጉባኤ ኺዓብዩ ኣኽኢልዎም። ድሕሪ ሒደት ኣዋርሕ፡ ጓልና ኣብ ኣኼባ መንጎ ሰሙን ክፍሊ ተዋሂብዋ፡ ወድና ኸኣ ዘይተጠምቀ ኣስፋሒ ዀይኑ” ይብል።

ብሰንኪ ዅነታት ክትግዕዝ እንተ ዘይከኣልካኸ፧ ንበል ዝያዳ ዓየይቲ ናብ ዜድልይዎ ኽትግዕዝ እንተ ዘይከኣልካኸ፧ ኣብቲ ዘለኻዮ፡ ነዚ ኣብ ላዕሊ ዘሎ ሓሳባት ንምንታይ ዘይትፍትኖ፧ ብየሆዋ እናተኣመንካ፡ ምስ ካልኦት ሓቢርካ ብምግልጋልን ሓደስቲ ኣዕሩኽ ብምምዕባልን ንዝነበረ ዕርክነትካ ብምሕዳስን ምሳታቶም ኣጸቢቕካ ተሓወስ። ንሓደስቲ ወይ ንእተሸገሩ ግብራዊ ሓገዝ ክትህቦም ትኽእልዶ፧ ፍቕሪ መለለዪት ናይ ሓቂ ክርስትያናት ካብ ኰነት፡ ከምኡ ምግባር ንመንፈሳዊ ዕቤትካ ኣበርክቶ ይገብር እዩ። (ዮሃ. 13:35) ሓደ ነገር ርግጸኛ ኽትከውን ትኽእል ኢኻ፦ “ኣምላኽ በዚ ኸምዚ ዝኣመሰለ መስዋእትታት ባህ ይብሎ እዩ።”—እብ. 13:16።

ብዙሓት ክርስትያናት ብድሆታት እናሃለወ ኽነሱ፡ ንሓድሽ ጉባኤኦም ለሚዶምዎ እዮም፣ ንስኻ እውን ክትለምዶ ትኽእል ኢኻ! ኣን-ሊዝ፡ “ጉባኤ ምቕያር፡ ልበይ ጋህ ኬብል ሓጊዙኒ እዩ” ትብል። ካዙሚ ኸኣ ምግዓዝ ዜምጽኦ ጥቕሚ ኽትገልጽ ከላ፡ “ቅድሚኡ ብዘይረኣኻዮ መገድታት ደገፍ የሆዋ ትርኢ ኢኻ” ትብል። ዡል ድማ፡ “እቲ ዝመስረትክዎ ዕርክነት ከይጋየሽ ሓጊዙኒ እዩ። ሕጂ ኽፍሊ እዚ ሓድሽ ጉባኤይ ከም ዝዀንኩ ስለ ዚስምዓኒ፡ ካብዚ ምግዓዝ ይኸብደኒ እዩ” ይብል።