Roma 14:1-23

  • Keta tesi-lia ba malu (1-12)

  • Keta halo ema seluk sidi (13-18)

  • Hakaʼas an atu haburas dame no unidade (19-23)

14  Simu ema neʼebé fraku iha fiar,+ no keta tesi-lia ba nia tuir imi-nia hanoin rasik.*  Ema ida iha fiar atu han buat hotu, maibé ema neʼebé fraku han deʼit modo.  Ema neʼebé han buat hotu labele hatún ema neʼebé la han, no ema neʼebé la han labele tesi-lia ba ema neʼebé han,+ tanba Maromak simu ema neʼe.  Ó mak sé atu tesi-lia ba ema seluk nia atan?+ Nia hamriik ka monu iha ninia naʼi nia oin.+ Tuir loloos, nia sei hamriik, tanba Jeová* bele halo nia hamriik.  Ema ida hanoin katak loron ida folin liu fali loron seluk,+ maibé ema seluk hanoin katak loron hotu mak hanesan deʼit.+ Ema ida-idak tenke fiar metin katak ninia desizaun mak loos.  Ema neʼebé hafolin loron ida, nia halo nuneʼe ba Jeová.* No mós, ema neʼebé han, nia halo nuneʼe ba Jeová,* tanba nia fó agradese ba Maromak.+ No ema neʼebé la han, nia halo nuneʼe ba Jeová,* no nia mós fó agradese ba Maromak.+  Tuir loloos, ita hotu la moris deʼit ba ita-nia an rasik,+ no ita mós la mate deʼit ba ita-nia an rasik.  Tanba se ita moris, ita moris ba Jeová,*+ no se ita mate, ita mate ba Jeová.* Entaun, ita moris ka mate, ita mak Jeová* nian.+  Tan razaun neʼe mak Kristu mate no moris hiʼas fali, atu nuneʼe nia bele sai nuʼudar Naʼi ba ema mate no ema moris.+ 10  Maibé tanbasá mak ó tesi-lia ba ó-nia maun-alin?+ Ka tanbasá mak ó hatún ó-nia maun-alin? Tanba ita hotu sei hamriik iha Maromak nia kadeira tesi-lia nia oin.+ 11  Tanba hakerek nanis ona: “‘Haʼu jura hodi haʼu-nia moris’,+ Jeová* dehan, ‘ema hotu sei hakneʼak ba haʼu, no ema hotu* sei fó sai iha ema nia oin katak haʼu mak Maromak’.”+ 12  Entaun, ita ida-idak sei hatán ba Maromak kona-ba ita-nia hahalok rasik.+ 13  Tan neʼe, mai ita la tesi-lia tan ba malu,+ maibé hakaʼas an atu la tau fatuk sidi nian iha imi-nia maun-alin nia oin ka tau buat ruma neʼebé halo nia monu.+ 14  Haʼu hatene no haʼu fiar duni iha Naʼi Jesus katak la iha buat ida neʼebé sai la moos mesak deʼit,+ maibé kuandu ema hanoin buat ruma mak la moos, neʼe la moos ba nia. 15  Se imi halo imi-nia maun-alin laran-kanek tan deʼit ai-han, imi la laʼo ona tuir domin.+ Kristu mate ba imi-nia maun-alin, tan neʼe keta estraga* ninia fiar tan deʼit ai-han.+ 16  Tan neʼe, keta halo tuir buat neʼebé imi hanoin katak diʼak se ida-neʼe halo ema seluk koʼalia la diʼak kona-ba imi. 17  Tanba Maromak nia Ukun* laʼós kona-ba han no hemu,+ maibé kona-ba hahalok loos, dame no haksolok ho espíritu santu. 18  Tanba ema neʼebé iha hahalok sira-neʼe nuʼudar Kristu nia atan mak ema neʼebé Maromak simu no ema sei respeitu nia. 19  Entaun, mai ita buka atu halo buat neʼebé haburas dame+ no buat neʼebé hametin malu.+ 20  Keta halo rahun Maromak nia serbisu tan deʼit ai-han.+ Tuir loloos ai-han hotu mak moos, maibé se ema han ai-han ruma no neʼe halo ema seluk sidi, ida-neʼe la diʼak.*+ 21  Diʼak liu atu la han naʼan, la hemu tua-uvas ka la halo buat naran deʼit neʼebé halo imi-nia maun-alin sidi.+ 22  Kona-ba fiar neʼebé imi iha, fiar neʼe entre imi ho Maromak. Ksolok ba ema neʼebé la tesi-lia ba ninia an rasik kona-ba buat neʼebé nia deside ona atu halo. 23  Maibé se ema neʼe han maski nia laran-rua, nia tesi-lia ona ba ninia an, tanba nia han la tuir ninia fiar. Tuir loloos, buat hotu neʼebé la tuir fiar mak sala.

Nota-rodapé

Ka karik “tuir ninia laran-rua”.
Haree Ap. A5.
Haree Ap. A5.
Haree Ap. A5.
Haree Ap. A5.
Haree Ap. A5.
Haree Ap. A5.
Haree Ap. A5.
Haree Ap. A5.
Orj., “nanál hotu”.
Ka “halakon”.
Ka “Reinu; Governu”.
Ka “sala”.