Job 1:1-22
1 Iha rai-Uz, iha mane ida naran Job.*+ Nia mak ema neʼebé laran-loos no laran-metin.*+ Nia hamtaʼuk Maromak no hadook an husi buat neʼebé aat.+
2 Nia iha oan-mane naʼin-hitu no oan-feto naʼin-tolu.
3 Ninia animál sira mak bibi-malae 7.000, kuda-kamelu 3.000, karau 1.000* no kuda-burru* 500. Nia mós iha atan barak tebes, nuneʼe nia sai ema neʼebé naran-boot liu fali ema hotu iha área Leste.
4 Baibain, Job nia oan-mane sira halo festa iha sira-nia uma tuir sira ida-idak nia loron.* Sira bolu sira-nia feton naʼin-tolu atu han-hemu hamutuk ho sira.
5 Bainhira sira-nia loron festa nian liutiha, Job bolu sira atu halo santu* sira iha Maromak nia oin. Iha dadeer-saan Job hadeer no hasaʼe sakrifísiu sunu nian+ ba nia oan-mane ida-idak, tanba Job dehan: “Karik haʼu-nia oan-mane sira halo ona sala no hatete aat Maromak iha sira-nia laran.” Neʼe mak Job nia toman neʼebé nia halo.+
6 Iha loron neʼebé anju sira*+ halibur hamutuk no hamriik iha Jeová nia oin,+ Satanás+ mós tama iha sira-nia leet.+
7 Entaun Jeová husu ba Satanás: “Ó foin mai husi neʼebé?” Satanás hatán ba Jeová: “Haʼu foin laʼo bá-mai haleʼu mundu.”+
8 Jeová hatete ba Satanás: “Ó haree ona* haʼu-nia atan Job ka? Iha mundu, la iha ema ida hanesan nia. Nia mak ema neʼebé laran-loos no laran-metin,*+ hamtaʼuk Maromak no hadook an husi buat neʼebé aat.”
9 Rona tiha neʼe, Satanás hatán ba Jeová: “Se Job la hetan buat ida, nia sei hamtaʼuk nafatin Maromak ka lae?+
10 Ita mak tau lutu haleʼu nia, ninia uma no buat hotu neʼebé nia iha hodi proteje nia,+ loos ka lae? Ita mós haraik ona bensaun ba serbisu hotu neʼebé nia halo ho nia liman,+ no ninia animál sira sai barak iha rai.
11 Maibé agora, lolo Ita-nia liman bá no foti buat hotu neʼebé nia iha, no nia sei hatete aat duni ba Ita.”
12 Ho ida-neʼe, Jeová dehan ba Satanás: “Buat hotu neʼebé ninian iha ona ó-nia liman.* Maibé ó-nia liman keta kona nia!” Nuneʼe, Satanás sai husi Jeová nia oin.+
13 Iha loron neʼebé ninia oan-mane no oan-feto sira han hamutuk no hemu tua-uvas iha sira-nia maun boot nia uma,+
14 ema ida mai fó-hatene ba Job, hodi dehan: “Ohin, bainhira ema uza hela karau hodi fila rai no kuda-burru sira han hela duʼut iha sira-nia sorin,
15 ema Sabeu sira mai ataka no hadau animál hotu, sira oho atan sira ho surik. Haʼu mesak deʼit mak konsege halai atu fó-hatene Ita.”
16 Bainhira nia sei koʼalia hela, ema ida tan mai no dehan: “Ahi husi Maromak* tun husi lalehan no han bibi-malae ho atan sira hotu! Haʼu mesak deʼit mak konsege halai atu fó-hatene Ita.”
17 Bainhira nia sei koʼalia hela, ema ida seluk mai fali no dehan: “Ema Kaldeia sira+ halo grupu tolu hodi ataka no hadau kuda-kamelu hotu, sira oho atan sira ho surik. Haʼu mesak deʼit mak konsege halai atu fó-hatene Ita.”
18 Bainhira nia sei koʼalia hela, ema ida seluk tan mai no dehan: “Ita-nia oan-mane no oan-feto sira han hamutuk hela no hemu tua-uvas iha sira-nia maun boot nia uma.
19 Derrepente deʼit, anin boot huu husi rai-fuik, baku uma nia lidun haat, halo uma neʼe naksobu hodi hanehan Ita-nia oan sira, no sira hotu mate. Haʼu mesak deʼit mak konsege halai atu fó-hatene Ita.”
20 Rona tiha neʼe, Job hamriik, lees ninia roupa no tesi hotu nia fuuk. Tuirmai, nia hakneʼak no hakruʼuk ho oin ba rai,
21 hodi dehan:
“Haʼu moris mai husi haʼu-nia inan nia knotak la ho buat ida,Nuneʼe mós haʼu sei mate* la lori buat ida.+
Jeová mak fó,+ no Jeová mak foti fali.
Haʼu hein katak Jeová nia naran sei hetan hahiʼi nafatin.”
22 Kona-ba buat hotu neʼe, Job la halo sala no la duun katak Maromak mak halo buat neʼebé aat.*
Nota-rodapé
^ Karik naran neʼe katak “Ema neʼebé sira odi”.
^ Ka “no iha integridade”.
^ Orj., “karau pár 500”.
^ Orj., “kuda-burru inan”.
^ Ka “sira halo festa troka malu iha sira ida-idak nia uma”.
^ Haree “Halo santu” iha Glosáriu.
^ Orj., “Maromak nia oan-mane sira”.
^ Orj., “tau ó-nia laran ba”.
^ Ka “no iha integridade”.
^ Ka “ó mak kontrola”.
^ Ka karik “Rai-lakan”.
^ Ka “fila fali”.
^ Ka “halo buat neʼebé la loos”.