Ebreu 5:1-14
5 Ema ida-idak neʼebé simu knaar nuʼudar amlulik boot, nia ajuda ema kona-ba sira-nia adorasaun ba Maromak,+ atu nuneʼe nia bele hasaʼe prezente no sakrifísiu ba ema nia sala.+
2 Nia bele hatudu laran-sadiʼa* ba sira neʼebé la hatene buat neʼebé loos no halo sala, tanba nia mós hatene ninia* fraku rasik,
3 no tan neʼe mak nia tenke hasaʼe sakrifísiu ba ninia sala rasik hanesan nia halo ba povu.+
4 Ema ida labele hili ninia an rasik atu halaʼo knaar neʼe hodi hetan glória, maibé Maromak deʼit mak hili nia, hanesan uluk nia hili Arão.+
5 Nuneʼe mós Kristu la fó glória ba ninia an rasik+ hodi sai amlulik boot, maibé nia simu glória neʼe husi Maromak, neʼebé dehan ba nia: “Ó mak haʼu-nia oan-mane; ohin haʼu sai ona ó-nia aman.”+
6 Nia mós koʼalia iha parte seluk, hodi dehan: “Ó mak amlulik ba nafatin hanesan Melkizedek.”+
7 Durante Kristu moris iha rai,* nia harohan ho laran no mós halo orasaun hodi husu ba Maromak neʼebé bele salva nia husi mate; nia halo nuneʼe ho lian makaʼas no ho matan-been,+ no Maromak rona duni ninia orasaun tanba nia hamtaʼuk Maromak.
8 Maski nia mak oan-mane, maibé nia aprende atu halo tuir liuhusi terus neʼebé nia hasoru.+
9 Bainhira nia sai perfeitu ona,*+ nia simu responsabilidade atu fó salvasaun ba nafatin ba ema hotu neʼebé halo tuir nia,+
10 tanba Maromak hili nia atu sai nuʼudar amlulik boot hanesan Melkizedek.+
11 Ami iha buat barak atu koʼalia kona-ba nia, maibé susar atu esplika ida-neʼe tanba imi neineik atu komprende.*
12 Tuir loloos, agora imi tenke sai ona mestre, maibé imi sei presiza ema atu hanorin fali imi buat báziku+ husi Maromak nia liafuan sagradu; no imi presiza fali susubeen hanesan bebé, laʼós ai-han neʼebé ema boot sira han.
13 Tanba ema hotu neʼebé hemu nafatin susubeen, nia la hatene liafuan neʼebé hanorin kona-ba hahalok loos, tanba nia sei hanesan labarik kiʼik.+
14 Maibé ai-han toos mak ba ema maduru, ba sira neʼebé uza beibeik sira-nia kbiit atu tetu didiʼak,* hodi halo nuneʼe sira treinu ona sira-nia kbiit neʼe atu hatene saida mak loos no saida mak sala.
Nota-rodapé
^ Ka “Nia la siʼak; Nia laran-diʼak”.
^ Ka “nia mós iha”.
^ Orj., “Iha loron sira bainhira nia sei iha isin”.
^ Ka “Bainhira nia kumpre ona kritéria hotu”.
^ Ka “atu rona”.
^ Ka “kbiit atu hanoin”.
