Deuteronómio 4:1-49
4 “Agora, oh ema Izraél, rona ba ukun-fuan no lei sira neʼebé haʼu hanorin ba imi atu halo tuir, atu nuneʼe imi bele moris+ no tama hodi foti rai neʼebé Jeová, imi-nia beiʼala nia Maromak, fó ba imi.
2 Imi labele aumenta tan liafuan ida ba buat neʼebé haʼu fó sai ba imi, no imi mós labele hasai liafuan ida husi ida-neʼe,+ atu nuneʼe imi bele halo tuir mandamentu sira husi Jeová, imi-nia Maromak.
3 “Imi rasik haree ona buat neʼebé Jeová halo tanba Baal husi Peor; Jeová, imi-nia Maromak, halakon tiha sira hotu husi imi-nia leet tanba sira laʼo tuir Baal husi Peor.+
4 Maibé imi neʼebé kaer metin ba Jeová, imi-nia Maromak, imi hotu moris hela ohin loron.
5 Haree bá, haʼu hanorin ona imi ukun-fuan no lei sira,+ hanesan Jeová, haʼu-nia Maromak, haruka haʼu atu halo, hodi nuneʼe imi bele halo tuir buat sira-neʼe iha rai neʼebé imi sei foti nuʼudar imi-nian.
6 Imi tenke halo tuir buat sira-neʼe ho didiʼak,+ tanba nasaun seluk neʼebé sei rona kona-ba ukun-fuan sira-neʼe hotu sei haree katak imi iha matenek+ no iha kbiit atu komprende,+ no sira sei dehan: ‘Nasaun boot neʼe mak povu neʼebé matenek no iha kbiit atu komprende.’+
7 Tanba la iha nasaun boot ida neʼebé ninia maromak sira besik sira hanesan Jeová, ita-nia Maromak, besik ita bainhira ita bolu nia.+
8 No la iha nasaun boot ida iha ukun-fuan neʼebé loos no lei neʼebé diʼak liu fali Ukun-Fuan tomak neʼebé haʼu hatoʼo ba imi ohin.+
9 “Imi tenke kuidadu no tau matan didiʼak ba imi-nia an, atu nuneʼe imi labele haluha buat neʼebé imi-nia matan haree ona hodi buat sira-neʼe labele dook husi imi-nia laran durante imi-nia moris tomak. Imi mós tenke fó-hatene neʼe ba imi-nia oan no bei-oan sira.+
10 Iha loron neʼebé imi hamriik iha Jeová, imi-nia Maromak, nia oin iha Horeb, Jeová dehan mai haʼu: ‘Halibur povu neʼe hamutuk hodi nuneʼe sira bele rona haʼu-nia liafuan,+ no sira bele aprende atu hamtaʼuk haʼu+ durante loron hotu neʼebé sira moris iha rai neʼe no atu sira bele hanorin neʼe ba sira-nia oan.’+
11 “Entaun imi hakbesik no hamriik iha foho hun, no foho neʼe lakan ho ahi toʼo lalehan; iha neʼebá iha nakukun no kalohan metan.+
12 Jeová komesa koʼalia ba imi, no ninia lian sai husi ahi neʼe.+ Imi rona liafuan, maibé imi la haree ilas ida,+ só rona lian deʼit.+
13 No nia fó sai ninia aliansa ba imi,+ no nia haruka imi atu halo tuir, no aliansa neʼe mak Ukun-Fuan Sanulu.*+ Depois neʼe, nia hakerek neʼe iha fatuk-belar rua.+
14 Iha tempu neʼebá, Jeová haruka haʼu atu hanorin ba imi ukun-fuan no lei sira, neʼebé imi tenke halo tuir iha rai neʼebé imi sei tama atu foti nuʼudar imi-nian.
15 “Nuneʼe, kuidadu didiʼak imi-nia an, tanba imi la haree ilas ida iha loron neʼebé Jeová koʼalia ba imi husi ahi laran iha Horeb.
16 Tan neʼe imi labele halo hahalok aat hodi halo ba imi-nia an estátua tuir modelu naran deʼit hanesan mane ka feto,+
17 hanesan animál ruma iha rai ka manu sira neʼebé semo iha lalehan,+
18 hanesan animál ruma neʼebé dolar iha rai ka ikan sira neʼebé iha bee laran.*+
19 No bainhira imi foti matan ba lalehan no haree loro-matan, fulan no fitun sira, katak tropa lalehan nian hotu, imi keta monu ba lasu hodi hakruʼuk ba sira no serbí sira.+ Jeová, imi-nia Maromak, fó ona buat sira-neʼe ba ema hotu iha lalehan nia okos.
20 Maibé imi mak ema neʼebé Jeová foti no lori sai husi rai-Ejitu neʼebé hanesan fornu manas, hodi sai nuʼudar ninia povu rasik,*+ hanesan agora daudaun.
21 “Jeová sai hirus ba haʼu tanba imi,+ no nia jura katak haʼu labele hakur Mota Jordaun no labele tama ba rai diʼak neʼebé Jeová, imi-nia Maromak, sei fó ba imi nuʼudar liman-rohan.+
22 Haʼu sei mate iha rai neʼe; no haʼu sei la hakur Mota Jordaun neʼe,+ maibé imi sei hakur ba mota sorin no foti rai diʼak neʼe nuʼudar imi-nian.
23 Kuidadu bá atu imi labele haluha aliansa neʼebé Jeová, imi-nia Maromak, halo ona ho imi,+ no keta halo ba imi-nia an estátua tuir modelu naran deʼit neʼebé Jeová, imi-nia Maromak, bandu.+
24 Tanba Jeová, imi-nia Maromak, mak hanesan ahi neʼebé han mohu buat hotu,+ no nia mak Maromak neʼebé hakarak ema atu adora nia mesak deʼit.+
25 “Se imi iha oan no bei-oan sira no imi hela iha rai neʼe ba tempu kleur ona no imi halo hahalok aat no halo estátua tuir modelu naran deʼit+ no imi halo buat neʼebé aat iha Jeová, imi-nia Maromak, nia haree hodi hakanek ninia laran,+
26 haʼu halo lalehan no rai sai nuʼudar sasin hasoru imi iha loron neʼe, katak imi sei mate lalais duni husi rai neʼebé imi sei foti nuʼudar imi-nian bainhira imi hakur Mota Jordaun. Imi sei la hela kleur iha neʼebá, maibé imi sei lakon mohu.+
27 No Jeová sei halo imi namkari iha nasaun sira-nia leet,+ no imi uitoan deʼit mak sei moris+ iha nasaun sira neʼebé Jeová sei duni imi bá.
28 Iha neʼebá imi sei serbí maromak sira husi ai no fatuk neʼebé ema nia liman mak halo,+ maromak sira neʼebé labele haree ka rona ka han ka horon.
29 “Se imi buka Jeová, imi-nia Maromak, husi neʼebá, no se imi buka nia ho imi-nia laran tomak no ho imi-nia moris* tomak,+ imi sei hetan duni nia.+
30 Bainhira imi hasoru susar boot no bainhira liafuan hotu neʼe sai loos ona ba imi, ikusmai imi sei fila fali ba Jeová, imi-nia Maromak, no rona ba ninia liafuan.+
31 Tanba Jeová, imi-nia Maromak, mak Maromak neʼebé laran-sadiʼa.+ Nia sei la husik hela imi ka halakon imi ka haluha aliansa neʼebé nia jura ona ba imi-nia beiʼala sira.+
32 “Agora, husu toʼok kona-ba buat neʼebé akontese ona antes imi-nia tempu, husi tempu neʼebé Maromak kria ema iha rai; no buka bá husi lalehan nia sorin ida toʼo lalehan nia sorin seluk. Uluk buat boot ruma hanesan neʼe akontese ona ka lae? Sé mak rona ona kona-ba buat hanesan neʼe?+
33 La iha povu seluk neʼebé rona ona Maromak nia lian neʼebé sai husi ahi hanesan imi rona ona no kontinua moris, loos ka lae?+
34 No Maromak mós la koko atu foti nasaun ida seluk ba nia an husi nasaun seluk nia leet, loos ka lae? Nia mós seidauk halo nuneʼe ho tesi-lia, milagre sira, sinál sira,+ funu,+ liman neʼebé forte,+ liman neʼebé iha kbiit, no ho hahalok neʼebé hamosu taʼuk,+ hanesan Jeová, imi-nia Maromak, halo ba rai-Ejitu iha imi-nia oin, loos ka lae?
35 Buat sira-neʼe hotu hatudu ona ba imi hodi imi hatene katak Jeová mak Maromak neʼebé loos;+ la iha Maromak seluk, só nia deʼit.+
36 Nia halo imi rona ninia lian husi lalehan atu korrije imi, no iha rai nia halo imi haree ninia ahi neʼebé boot, no imi rona ninia liafuan sai husi ahi.+
37 “Nia lori imi sai husi rai-Ejitu iha ninia oin, ho ninia kbiit boot, tanba nia hadomi imi-nia beiʼala sira no hili ona sira-nia bei-oan.+
38 Husi imi-nia oin mak nia duni sai nasaun sira neʼebé boot no forte liu fali imi, atu lori imi tama ba sira-nia rai no fó ba imi rai neʼe nuʼudar imi-nia liman-rohan, hanesan ohin loron.+
39 Tan neʼe agora, hatene bá no tau ida-neʼe iha imi-nia laran, katak Jeová mak Maromak loos iha lalehan no iha rai.+ La iha Maromak seluk.+
40 Imi tenke halo tuir ninia ukun-fuan no lei sira neʼebé haʼu fó sai ba imi ohin, atu nuneʼe buat hotu bele sai diʼak ba imi no ba imi-nia oan sira, no imi bele kontinua hela kleur iha rai neʼebé Jeová, imi-nia Maromak, sei fó ba imi.”+
41 Iha tempu neʼebá, Moisés haketak sidade tolu iha Mota Jordaun nia sorin parte leste.+
42 Se ema ruma oho ninia maluk la ho neon no uluk nia la odi ninia maluk neʼe,+ nia tenke halai ba sidade sira-neʼe ida atu nia bele kontinua moris.+
43 Sidade sira-neʼe mak: sidade Bezer+ neʼebé iha rai-fuik tetuk iha foho leten ba suku Ruben, sidade Ramot+ iha Gilead ba suku Gad, no sidade Golan+ iha Basan ba suku Manasés.+
44 Neʼe mak Ukun-Fuan+ neʼebé Moisés fó sai ba ema Izraél.
45 Neʼe mak avizu, ukun-fuan no lei sira neʼebé Moisés fó ba ema Izraél bainhira sira sai tiha husi rai-Ejitu,+
46 iha área Mota Jordaun nian, iha rai-tetuk neʼebé iha Bet-Peor nia oin,+ iha ema Amoreu nia liurai Sihon nia rai, liurai neʼebé hela iha Hesbon,+ neʼebé Moisés no ema Izraél manán bainhira sira sai tiha husi rai-Ejitu.+
47 No sira foti Liurai Sihon nia rai no mós Liurai Og+ husi Basan nia rai, katak ema Amoreu nia liurai naʼin-rua neʼebé hela iha área Mota Jordaun nia sorin parte leste,
48 no rai sira-neʼe hahú husi Aroer,+ neʼebé iha Foho-Leet* Arnon nia ninin toʼo Foho Sión, neʼe mak Foho Hermon,+
49 no área Araba tomak iha Mota Jordaun nia sorin parte leste, toʼo Tasi Araba,* iha foho-lolon Pisga nia hun.+
Nota-rodapé
^ Orj., “Liafuan Sanulu”.
^ Ka “ninia liman-rohan”.
^ Haree “Nefes” iha Glosáriu.
^ Neʼe katak Tasi Masin, ka Tasi Mate.
