Segundu Timóteo 2:1-26
2 Tan neʼe, haʼu-nia oan,+ kontinua hetan kbiit liuhusi laran-diʼak boot neʼebé iha Kristu Jesus.
2 Kona-ba buat sira neʼebé ó rona husi haʼu, neʼebé ema barak mós sai sasin ona,+ ó tenke fó sai buat sira-neʼe ba mane sira neʼebé laran-metin atu nuneʼe sira mós bele kumpre kritéria atu hanorin ema seluk.
3 Nuʼudar Kristu Jesus nia soldadu neʼebé diʼak,+ sai prontu bá atu hasoru terus.+
4 Ema neʼebé sai nuʼudar soldadu la envolve an ho negósiu atu buka moris* tanba nia hakarak atu halo kontente ema neʼebé hatama nia nuʼudar soldadu.
5 Nuneʼe mós, se ema ruma hola parte iha jogu ida no la tuir regra, nia sei la hetan prémiu.*+
6 Toʼos-naʼin neʼebé serbisu makaʼas mak tenke han uluk rezultadu husi ninia toʼos.
7 Kontinua hanoin didiʼak kona-ba buat neʼebé haʼu dehan ba ó; Naʼi sei halo ó komprende* buat hotu.
8 Hanoin-hetan katak Jesus Kristu moris hiʼas ona husi mate+ no nia mak David nia bei-oan;+ ida-neʼe mak liafuan diʼak neʼebé haʼu haklaken,+
9 no kona-ba neʼe mak haʼu hetan terus no tama komarka hanesan kriminozu ida.+ Maski nuneʼe, la iha ema ida mak bele kesi metin Maromak nia liafuan.+
10 Tan neʼe mak haʼu kontinua tahan buat hotu tanba sira neʼebé Maromak hili ona,+ atu nuneʼe sira mós bele hetan salvasaun liuhusi Kristu Jesus no hetan glória ba nafatin.
11 Ita bele fiar duni liafuan tuirmai neʼe: Se ita mate hamutuk ho nia, ita mós sei moris hamutuk ho nia.+
12 Se ita kontinua atu tahan, ita mós sei ukun hamutuk ho nia nuʼudar liurai.+ Se ita nega nia, nia mós sei nega ita.+
13 Maski ita la hatudu laran-metin ba Maromak, nia nafatin laran-metin ba ita, tanba nia labele nega ninia an rasik.
14 Kontinua fó-hanoin sira kona-ba buat sira-neʼe, hanorin sira* iha Maromak nia oin atu labele haksesuk malu kona-ba liafuan sira, tanba ida-neʼe la iha folin duni no estraga* sira neʼebé rona.
15 Hakaʼas an makaʼas atu Maromak simu ó, nuʼudar serbisu-naʼin neʼebé la moe kona-ba serbisu neʼebé ó halo ona, hodi uza ho loloos liafuan lia-loos nian.+
16 Maibé keta simu liafuan sira neʼebé la iha folin no kontra buat santu,+ tanba buat sira-neʼe sei lori ema ba hahalok aat liután, hahalok neʼebé la tuir Maromak nia hakarak,
17 no sira-nia liafuan sei habelar lalais hanesan kanek neʼebé han mohu tiha isin.* Ema sira-neʼe inklui Himeneu no Fileto.+
18 Mane sira-neʼe laʼo sees ona husi lia-loos, hodi dehan katak moris-hiʼas akontese tiha ona,+ no sira estraga ona ema balu nia fiar.
19 Maski nuneʼe, Maromak tau ona uma nia fundasaun neʼebé metin nafatin no tau sinál* ho liafuan tuirmai neʼe: “Jeová* hatene sira neʼebé ninian”+ no “Sira hotu neʼebé bolu Jeová* nia naran+ tenke husik tiha buat sira neʼebé la loos”.
20 Iha uma boot ida nia laran iha sasán* sira neʼebé halo husi osan-mean no osan-mutin, no iha mós sasán sira neʼebé halo husi ai no rai-mean, balu uza ba buat neʼebé importante no balu uza ba buat neʼebé ladún importante.
21 Tan neʼe, se ema ida hasees an husi ema neʼebé hanesan ho sasán neʼebé uza ba buat neʼebé ladún diʼak, nia sei sai nuʼudar sasán* neʼebé uza ba buat neʼebé diʼak, katak santu no diʼak ba ninia naʼin, no prepara ona ba serbisu diʼak hotu.
22 Tan neʼe, halai sees husi hakarak joven nian, maibé buka hahalok loos, fiar, domin, dame, hamutuk ho sira neʼebé bolu Naʼi ho laran-moos.
23 Liután neʼe, hasees an husi haksesuk malu neʼebé beik no folin-laek,+ tanba ida-neʼe hamosu deʼit istori malu.
24 Naʼi nia atan la presiza istori malu, maibé presiza hatudu laran-diʼak* ba ema hotu,+ iha kbiit atu hanorin, kontrola an kuandu ema halo sala hasoru nia,+
25 no hanorin ho laran-maus ba sira neʼebé la simu ninia liafuan.+ Karik Maromak sei husik sira arrepende an,* atu nuneʼe sira bele hetan koñesimentu neʼebé loos kona-ba lia-loos,+
26 no sira bele hanoin momoos fali no halai sai husi Diabu nia lasu, tanba Diabu kaer moris ona sira atu halo ninia hakarak.+
Nota-rodapé
^ Ka karik “ho atividade loroloron nian”.
^ Orj., “koroa”.
^ Ka “hatene tetu didiʼak”.
^ Orj., “fó sasin ho didiʼak ba sira”.
^ Ka “halo aat; harahun”.
^ Ka “hanesan gangrena”.
^ Ka “sanan”.
^ Ka “instrumentu; sanan”.
^ Ka “koʼalia ho respeitu”.
^ Ka “troka sira-nia hanoin”.
